კანადაში ტყის ხანძრებს ებრძვიან

კანადაში მასშტაბურ ტყის ხანძრებს ებრძვიან. „სქაი ნიუსის“ ცნობით, ქვეყანაში ხანძრის 835 აქტიური კერიდან 100-ზე მეტი კონტროლს არ ექვემდებარება. გამოცემა წერს, რომ ხანძარმა უკვე გაანადგურა 1.9 მილიონი ჰექტარი ტერიტორია, აქედან 1.1 მილიონი ტყის ფართობი იყო.

კანადის გარემოსდაცვითი უწყებების წარმომადგენლებმა მოსახლეობა გააფრთხილეს, რომ გარე აქტივობებისგან თავი შეიკავონ.

აღსანიშნავია, რომ ტორონტოში ჰაერის ხარისხი მსოფლიოს მსხვილ ქალაქებს შორის ყველაზე საშიშია. ორგანიზაციამ ქალაქში არსებული ჰაერის ხარისხის ინდექსი კი 10+ მაჩვენებლით შეაფასა, რაც „ძალიან მაღალ რისკს“ ნიშნავს.

ცნობისთვის, უკვე რამდენიმე დღეა, რაც კანადაში მასშტაბურ ხანძრებს ებრძვიან. ხანძრის უმეტესი ნაწილი ქვეყნის ცენტრალურ ნაწილში მძვინვარებს.