ისრაელი ადასტურებს, რომ ღაზის სექტორში ცეცხლი 19 იანვარს, ადგილობრივი დროით 08:30 საათზე შეწყდება

ისრაელის თავდაცვის ძალებმა დაადასტურეს, რომ ღაზის სექტორში ცეცხლის შეწყვეტის შესახებ შეთანხმების შესრულება 19 იანვარს, ადგილობრივი დროით 08:30 საათზე დაიწყება.

მანამდე აღნიშნული ინფორმაცია კატარშიც დაადასტურეს.

„ისრაელის თავდაცვის ძალები მზად არიან მძევლების მისაღებად „ჰამასის“ ტყვეობიდან გათავისუფლების შემდეგ და მუშაობენ შესაბამისი ფიზიკური და ფსიქოლოგიური მხარდაჭერის უზრუნველსაყოფად, ყველა დეტალის გულმოდგინე გათვალისწინებით“, – ნათქვამია ისრაელის თავდაცვის ძალების განცხადებაში.

მათი განცხადებით, შეიარაღებული ძალები „გააგრძელებენ მოქმედებას“ ღაზის სექტორის სიახლოვეს მცხოვრები ისრაელის მოქალაქეების უსაფრთხოების უზრუნველსაყოფად.