„ბრიუსელში, ბევრი ელოდება სიტყვის ცენზურას... კომუნიზმისა და სხვა ტოტალიტარული რეჟიმებისას, უკვე ვნახეთ, სად მივყავართ მასობრივ ცენზურას" - ევროპარლამენტარი სტეფან ბარტულიცა

ევროპარლამენტარმა სტეფან ბარტულიცამ ევროკავშირში მოქმედი „ციფრული სერვისების შესახებ კანონი“ გააკრიტიკა და აღნიშნა, რომ ის სინამდვილეში თავისუფალი სიტყვის ცენზურისთვის გამოიყენება.

„ბრიუსელში მყოფ ბევრ ადამიანს აქვს ტოტალიტარული იმპულსი, რომლებიც უბრალოდ ელოდებიან სიტყვის ცენზურას, სიტყვის, რომელიც მათ არ მოსწონთ... კომუნიზმისა და სხვა ტოტალიტარული რეჟიმების დროს ჩვენ ვნახეთ, სად მივყავართ მასობრივ ცენზურას. ეს არ არის სასიამოვნო სურათი“, - თქვა ბარტულიცამ ევროპარლამენტში გამართული მოსმენის დროს.

აღნიშნული კანონი გააკრიტიკა აგრეთვე პოლ კოულმანმა, რომელიც ადამიანის უფლებათა დარგში საერთაშორისო იურისტია და ორგანიზაცია ADF International-ის აღმასრულებელი დირექტორია. „სიტყვის თავისუფლება ამ კონტინენტზე კვლავ საფრთხის ქვეშაა როგორც არასდროს, მას შემდეგ, რაც რამდენიმე ათწლეულის წინ ევროპაში კოშმარული ავტორიტარული რეჟიმები დასრულდა“, - აღნიშნა იურისტმა.

„ციფრული სერვისების შესახებ კანონი“ ევროკავშირში 2024 წლის 17 თებერვალს ამოქმედდა. კანონი სოციალურ ქსელებს ავალდებულებს გაატარონ ზომები არალეგალური კონტენტისა და მომსახურებისგან მომხმარებლების დაცვის მიზნით. სოციალურ ქსელებში განთავსებული პოსტები, რომლებიც სიძულვილს და დეზინფორმაციას ავრცელებენ, დაუყოვნებლივ უნდა წაიშალოს. აღნიშნული კანონი განსაკუთრებულ პასუხისმგებლობას აკისრებს ისეთ მსხვილ ონლაინ პლატფორმებს, როგორიცაა Facebook, Amazon და Google.