აზერბაიჯანი, ყაზახეთი, ყირგიზეთი და უზბეკეთი ლათინურ ანბანზე დაფუძნებულ საერთო თურქული ანბანის მიღებაზე შეთანხმდნენ

თურქული სახელმწიფოების ორგანიზაციის წევრი ქვეყნები ლათინურ ანბანზე დაფუძნებულ საერთო თურქული ანბანის მიღებაზე შეთანხმდნენ. ორგანიზაციის წევრები არიან აზერბაიჯანი, ყაზახეთი, ყირგიზეთი, თურქეთი და უზბეკეთი.

თურქულ სახელმწიფოთა ორგანიზაციის მიერ შექმნილი თურქული სამყაროს საერთო ანბანის კომისიის მესამე სხდომა 2024 წლის 9-11 სექტემბერს ბაქოში გაიმართა.

"მიღწეული იქნა შეთანხმება საერთო თურქული ანბანის წინადადებაზე, რომელიც შედგება 34 ასოსგან. შემოთავაზებული ანბანის თითოეული ასო წარმოადგენს თურქულ ენებში არსებულ სხვადასხვა ფონემებს", - ნათქვამია ოფიციალურ განცხადებაში.
თურქულმა აკადემიამ ხაზი გაუსვა ამ მოვლენის ისტორიულ მნიშვნელობას.

"საერთო თურქული ანბანის შემუშავება ხელს უწყობს თურქ ხალხებს შორის ურთიერთგაგებასა და თანამშრომლობას მათი ენობრივი მემკვიდრეობის შენარჩუნებით", - ნათქვამია განცხადებაში.