აშშ-ის საზღვაო ძალები ირანზე შესაძლო დარტყმების წინ ბაჰრეინში პერსონალის რაოდენობას „კრიტიკულ დონემდე“ ამცირებს - „ფოქს ნიუსი“

აშშ-ის საზღვაო ძალები ირანზე შესაძლო დარტყმების წინ ბაჰრეინში პერსონალის რაოდენობას „კრიტიკულ დონემდე“ ამცირებს. ინფორმაციას „ფოქს ნიუსი“ რამდენიმე ამერიკელ მაღალჩინოსანზე დაყრდნობით ავრცელებს.

მათივე ცნობით, ამჟამად ობიექტზე 100-ზე ნაკლები პერსონალი რჩება.

გამოცემა წერს, რომ ოპერაცია „შუაღამის ჩაქუჩის“ დაწყებამდე, რომლის დროსაც  აშშ-მა ირანის ბირთვულ ობიექტებს დაარტყა, მე-5 ფლოტის შტაბ-ბინიდან ევაკუაცია მსგავსი წესით განხორციელდა.

„ფოქს ნიუსის“ ინფორმაციით, აშშ ბოლო კვირების განმავლობაში ახლო აღმოსავლეთში სამხედრო აქტივობას ზრდის, რადგან აშშ-სა და ირანს შორის თეირანის ბირთვული პროგრამის მომავალთან დაკავშირებით მოლაპარაკებები შესაძლოა, შედეგის გარეშე დასრულდეს.