American Airlines-ის თვითმფრინავი, 12-საათიანი ფრენის შემდეგ, იძულებული გახდა, უკან დაბრუნებულიყო

American Airlines-ის თვითმფრინავი, რომელიც ნიუ-იორკიდან იაპონიაში მიფრინავდა, 12-საათიანი ფრენის შემდეგ, კვლავ აშშ-ში დააბრუნეს. ინფორმაციას daily mail-ი ავრცელებს.

მედიის ცნობით, მიუხედავად იმისა, რომ თვითმფრინავს 14-საათიანი ფრენიდან 12 საათი უკვე ჰაერში ჰქონდა გატარებული, ის უკან დააბრუნეს. American Airlines-მა დაადასტურა, რომ უკან დაბრუნება ტექნიკურო მომსახურების პრობლემებს უკავშირდებოდა.

FlightAware-ის მონაცემების თანახმად, American Airlines-ის რეისი 167, რომელიც ტოკიოს, ჰანედას აეროპორტისკენ მიემართებოდა, ჯონ კენედის საერთაშორისო აეროპორტიდან ორშაბათს, დილის 10:45 საათზე აფრინდა. Boeing 787-9 Dreamliner-მა მთელი კონტინენტური შეერთებული შტატები გადალახა და წყნარი ოკეანის თავზე, ალასკას სანაპიროსთან დაფრინავდა, როდესაც პილოტები იძულებულნი გახდნენ, შემობრუნებულიყვნენ. დასავლეთ სანაპიროს აეროპორტში დაბრუნების ნაცვლად, თვითმფრინავმა შეერთებული შტატების ნახევარი გადალახა და Dallas Fort Worth-ის საერთაშორისო აეროპორტში, დაახლოებით საღამოს 10 საათზე დაეშვა.

აღნიშნულმა ფაქტმა, მგზავრებს შორის დიდი უკმაყოფილება გამოიწვია, რომელსაც ისინი სოციალურ ქსელში აქტიურად აფიქსირებდნენ.