„73 წლის ფერმერმა მოკლულის ცხედარი დაანაწევრა და კასრში დამალა...“ - საქმე 6 წლის შემდეგ გაიხსნა

დიდ ბრიტანეთში, სამხრეთ იორკშირში, 73 წლის ფერმერს, კრისტოფერ რაიტს, 55 წლის რიჩარდ დაისონის მკვლელობისთვის სამუდამო პატიმრობა მიუსაჯეს. მამაკაცმა მკვლელობის შემდეგ ცხედარი დაანაწევრა და ბეტონით სავსე კასრში დამალა, სადაც ნეშტი ექვსი წლის განმავლობაში დარჩა.

დაისონი რაიტის ფერმაში ცხოვრობდა და სხვადასხვა სამუშაოს ასრულებდა. გამოძიების ინფორმაციით, 2019 წლის ნოემბერში მათ შორის კონფლიქტი მას შემდეგ დაიწყო, რაც რაიტმა დაისონი იარაღის მოპარვაში დაადანაშაულა.

დაპირისპირება მკვლელობით დასრულდა - რაიტმა მას სანადირო თოფიდან ესროლა. შემდეგ, როგორც სასამართლომ დაადგინა, რამდენიმე დღის განმავლობაში ცხედარს ანაწევრებდა, ნარჩენები კასრში მოათავსა და კასრი ცემენტით შეავსო.

ამის შემდეგ მან კასრი მისაბმელში მოათავსა და მეზობელ ფერმერს სთხოვა, სატრანსპორტო საშუალება მის ტერიტორიაზე დროებით შეენახა. მეზობელმა არ იცოდა, რას შეიცავდა ჩაკეტილი მისაბმელი.

რიჩარდ დაისონის გაუჩინარების შესახებ ოჯახმა პოლიციას 2019 წლის ნოემბერში შეატყობინა, თუმცა მისი კვალის პოვნა წლების განმავლობაში ვერ მოხერხდა. გამოძიება ხელახლა გააქტიურდა 2025 წელს, როდესაც სამართალდამცველებმა ახალი მტკიცებულებები, მათ შორის სატელეფონო მონაცემები და ფერმის ჩანაწერები შეისწავლეს. ჩხრეკისას მათ მისაბმელში ბეტონით სავსე ლურჯი კასრი აღმოაჩინეს, რომელშიც ადამიანის ნეშტი იყო. დნმ-ის ექსპერტიზამ დაადასტურა, რომ ის რიჩარდ დაისონს ეკუთვნოდა.

საქმის გამოძიებისას პოლიციამ ასევე აღმოაჩინა იარაღი და საბრძოლო მასალა, რომლებიც მკვლელობის დროს გამოყენებულ იარაღთან იყო დაკავშირებული. სასამართლომ რაიტი მკვლელობაში, მართლმსაჯულებისთვის ხელის შეშლის მიზნით შეთქმულებასა და იარაღთან დაკავშირებულ სხვა დანაშაულებებში დამნაშავედ ცნო.

რაიტს სამუდამო პატიმრობა მიესაჯა და მინიმუმ 33 წელი და 353 დღე ციხეში უნდა გაატაროს. მის ბავშვობის მეგობარს, რომელიც დანაშაულის დაფარვაში დაეხმარა, სამი წლით თავისუფლების აღკვეთა მიესაჯა.

რიჩარდ დაისონის ოჯახისთვის სიმართლე მხოლოდ ექვსი წლის შემდეგ გახდა ცნობილი. მისმა ქალიშვილმა სასამართლოში განაცხადა, რომ ამ წლების განმავლობაში პასუხის გარეშე ცხოვრება მისთვის მძიმე იყო და მამის ბედის შესახებ სიმართლის არცოდნამ გლოვის შესაძლებლობაც კი წაართვა.