67 წლის კაცი, რომელიც 11 წლის ნათესავის სექსუალურ შევიწროებაში ამხილეს, გარდაცვლილი იპოვეს
1787496967
ბახრეინი - კუნძულოვანი სახელმწიფოა სპარსეთის ყურეში, ახლო აღმოსავლეთში. სწორედ აქ პენსიაზე გასულმა სამგზავრო ავიალაინერმა Boeing 747-მა წყლის სიღრმეში ახალი თავშესაფარი ჰპოვა და თევზებისა თუ წყალქვეშა ფაუნის სახლად იქცა, წერს Times of India.
როგორც ბახრეინის მრეწველობისა და ვაჭრობის სამინისტროში განაცხადეს, 2019 წელს 70-მეტრიანი გიგანტი ჯართად ქცევის ბედს გადაარჩინეს. ის ღია ზღვაში გაიყვანეს და ფრთხილად დაუშვეს 20–22 მეტრის სიღრმეზე. ასე შეიქმნა უნიკალური წყალქვეშა თემატური პარკის, Dive Bahrain-ის პირველი და საკვანძო ობიექტი.
იმისთვის, რომ თვითმფრინავი ფსკერზე უსაფრთხოდ დაშვებულიყო, სპეციალისტებმა საგულდაგულო საინჟინრო მომზადება ჩაატარეს. კონსტრუქცია გაასუფთავეს, პოტენციური დამაბინძურებლებისგან გააუვნებლეს და წყალში ჩაძირეს. დღეს ფიუზელაჟის ტევადი განყოფილებები და ტექნოლოგიური ღიობები თევზების გუნდების საიმედო საფარს წარმოადგენს, ხოლო ფრთებისა და კორპუსის ზედაპირი თანდათანობით მარჯნებისა და საზღვაო ორგანიზმების კოლონიებით იფარება.
სამეცნიერო საზოგადოება ასეთ წამოწყებას დადებითად აფასებს. 39 პროფილური კვლევის კომპლექსურმა ანალიზმა აჩვენა, რომ ხელოვნური რიფები ზუსტად იმავე რაოდენობის საზღვაო ბინადარს იზიდავს, რასაც ბუნებრივი ეკოსისტემები. გადამწყვეტ როლს ლოკაციის სწორად შერჩევა და უსაფრთხო მასალები თამაშობს.
პარკის ფუნქციონირებას ოფიციალური სტარტი 2019 წლის 8 სექტემბერს მიეცა. მომავალში ექსპოზიციის შევსება იგეგმება ხელოვნური მარჯნის რიფებით, შთამბეჭდავი ქანდაკებებითა და მარგალიტით მოვაჭრის ტრადიციული სახლის ზუსტი ასლითაც კი, რაც იმ რეწვის სიმბოლური გახსენებაა, რომელიც საუკუნეების განმავლობაში აყალიბებდა ბახრეინის ისტორიასა და კულტურას.
ბახრეინის ხელისუფლება იმედოვნებს, რომ დაივინგ-პარკი არა მხოლოდ მოხიბლავს წყალქვეშა ტურიზმის მოყვარულებს, არამედ ოკეანოლოგებისთვის ღია ლაბორატორიის როლსაც შეასრულებს.
