ისტორიაში პირველად, კოკაინზე დამოკიდებულების საწინააღმდეგო ვაქცინა შექმნეს

ბრაზილიელმა მეცნიერებმა ახალი ვაქცინის შექმნის შესახებ განაცხადეს. ვაქცინა კოკაინზე დამოკიდებულების სამკურნალოდ შეიმუშავეს. ინფორმაციას უცხოური მედია ავრცელებს. 

ცნობისთვის, ბრაზილია კოკაინის ერთ-ერთი ყველაზე დიდი მომხმარებელი ქვეყნაა.

ვაქცინას Calixcoca ჰქვია და მან ცხოველებზე ჩატარებულ ცდებში დამაიმედებელი შედეგები აჩვენა. მკვლევრების თქმით, ვაქცინა იმუნურ პასუხს იწვევს და კოკაინს თავის ტვინამდე მიღწევაში ხელს უშლის. ეს ნარკოტიკზე დამოკიდებულებს ნივთიერებისგან გათავისუფლებაში უნდა დაეხმაროს.

უფრო მარტივად რომ ვთქვათ, კოკაინზე დამოკიდებულები ნივთიერების ეფექტს ვეღარ იგრძნობენ.

„თუ მკურნალობა მარეგულირებელის დასტურს მიიღებს, ეს იქნება პირველი შემთხვევა, როდესაც კოკაინზე დამოკიდებულების მკურნალობა ვაქცინით მოხდება", - თქვა ფრედერიკო გარსიამ, მკვლევარმა და ვაქცინის შემქმნელმა.

გასულ კვირას პროექტმა 500 000 ევროს დაფინანსება მოიპოვა. ეს ლათინური ამერიკის მედიცინის ინოვაციების დაფინანსებაა, რომელსაც Euro Health განაგებს.

ვაქცინა იმუნურ სისტემას ანტისხეულებს აწარმოებინებს, რომელიც სისხლის მიმოქცევაში კოკაინის მოლეკულებს აფერხებს. ანუ, მათ ზომაში იმდენად ზრდის, რომ ისინი ტვინამდე ვეღარ აღწევს.

მსგავსი კვლევები აშშ-შიც ჩატარდა. მიუხედავად ამისა, ცდები აღარ გაგრძელდა, რადგან აღინიშნა, რომ კვლევამ შესაბამისი შედეგები არ გამოიღო.

თუმცა, Calixcoca ეფექტიანი აღმოჩნდა და ახლა მის გამოცდას ადამიანებზე გეგმავენ.

ვაქცინის შემქმნელების თქმით, ამჟამად კოკაინზე დამოკიდებულების მოხსნის რეგისტრირებული პრეპარატი არ არსებობს. სპეციალისტებს ძირითადად ფსიქოლოგიური კონსულტაციის, სოციალური დახმარებისა და სხვა მსგავსი მეთოდების გამოყენება შეუძლიათ. ახლა ვაქცინას ამ მხრივ რევოლუციის მოხდენა შეუძლია.

ვაქცინა ლაბორატორიაში შექმნილი ქიმიური ნაერთებით მზადდება და არა ბიოლოგიური ინგრედიენტებით. ეს იმას ნიშნავს, რომ მისი წარმოება ბევრად უფრო იაფი იქნება, ვიდრე სხვა ვაქცინების.

მკვლევრები იმასაც აღნიშნავენ, რომ ახალი ვაქცინის მიმართ ინტერესი დიდია და მათ უკვე 3 000-მდე ადამიანი დაუკავშირდათ.

ასევე ნახეთ:

„გამიკვირდა, გავშრი, არ ველოდი ...“ - ხელის თხოვნის შემდეგ, თათა გიორგობიანი პირადზე

„ცოლი რომ მყავდეს, შენ კი არ შეგაჭმევინებდი აქ ნერვებს...“ - „ბზიკოს“ და ანას დაპირისპირება

კატასტროფას გადარჩენილი ბორტი - დაკავებულია პილოტი, რომელიც ფრენისას ძრავის გამორთვას ცდილობდა