ვინ იყო ბავშვების მკვლელი შეყვარებული წყვილი, რომლის დანაშაულების შემზარავი ჩანაწერები პოლიციამ იპოვა - ბრალდებულებს სამუდამო პატიმრობა მიესაჯათ

1960-იანი წლების დასაწყისში ბრიტანეთი დანაშაულების სერიამ შეძრა, რომელიც ისტორიაში ერთ-ერთ ყველაზე სასტიკ შემთხვევად დარჩა.

მირა ჰინდლი და მისი პარტნიორი იან ბრედი 1963-1965 წლებში არასრულწლოვან ბავშვებს იტაცებდნენ, მათზე სექსუალურად ძალადობდნენ და შემდეგ სასტიკად კლავდნენ. 

მირა ჰინდლი 1942 წელს მანჩესტერში დაიბადა ღარიბ ოჯახში. 1961 წელს, 18 წლის ასაკში, მან მუშაობა დაიწყო ტიპისტად და სწორედ ამ დროს შეხვდა იან ბრედის, რომელიც ნაცისტური იდეოლოგიით იყო გატაცებული და კრიმინალური წარსულიც ჰქონდა.

წყვილის ურთიერთობა სწრაფად გადაიზარდა ავადმყოფურ კავშირში — ისინი საუბრობდნენ დანაშაულებზე და ფანტაზიას აყოლილები, საბოლოოდ, მკვლელობის გზას დაადგნენ.

პირველი მსხვერპლი 1963 წელს გახდა 16 წლის პოლინ რეიდი. ბრედიმ და ჰინდლიმ ის მოტყუებით წაიყვანეს მორსში, სადაც ბრედიმ გოგონა გააუპატიურა და მოკლა. რამდენიმე თვეში იგივე ბედი ეწია 12 წლის ჯონ კილბრაიდს. ორივეს სხეული მორსში დამარხეს.

1964 წელს წყვილმა გაიტაცა 12 წლის ქით ბენეტი, რომლის ცხედარიც დღემდე ვერ მიაგნეს. მომდევნო მსხვერპლი 1964 წლის დეკემბერში გახდა 10 წლის ლესლი ენ დაუნი. ბრედიმა და ჰინდლიმ გოგონა სახლში წაიყვანეს, აწამეს და შემდეგ მოკლეს. დანაშაულის შემზარავი მტკიცებულებები - ფოტოები და აუდიოჩანაწერები — მოგვიანებით პოლიციამ იპოვა.

1965 წლის ოქტომბერში წყვილმა სასტიკად მოკლა 17 წლის ედუარდ ევანსი. სწორედ ამ მკვლელობის დროს იყო იქ მირას სიძე დევიდ სმიტი, რომელმაც დანახული საშინელება პოლიციას მოუყვა. სწორედ სმიტის ჩვენების საფუძველზე დაიწყო გამოძიება, რომელმაც მორისის სხვა მსხვერპლთა ამბავიც გაამჟღავნა.

1966 წელს სასამართლომ იან ბრედი სამ მკვლელობაში, მირა ჰინდლი კი ორ მკვლელობაში ცნო დამნაშავედ და ორივეს სამუდამო პატიმრობა მიუსაჯა.

წლების განმავლობაში ჰინდლი ამტკიცებდა, რომ ბრედი მას აშანტაჟებდა და თავად არ იყო დამნაშავე, თუმცა 1985 წელს მან აღიარა დანაშაულის სრული სურათი და პოლიციას ერთ-ერთი მსხვერპლის, პოლინ რეიდის დამარხული ცხედარიც ანახა.

მირა ჰინდლი 2002 წელს ციხეში გარდაიცვალა. იან ბრედი სიცოცხლის ბოლომდე ფსიქიატრიულ საავადმყოფოში იმყოფებოდა და 2017 წელს გარდაიცვალა.

მიუხედავად იმისა, რომ საქმე დასრულებულად ითვლება, ქით ბენეტის ოჯახისათვის ტრაგედია კვლავაც გრძელდება -  ბიჭის ცხედარი დღემდე არ არის ნაპოვნი.

მორსის მკვლელობების ამბავი ბრიტანეთის ისტორიაში დარჩა როგორც უმძიმესი და ყველაზე შემზარავი დანაშაულების სერია, რომელმაც მთელი ქვეყანა შეძრა და საზოგადოებას სამუდამოდ დაამახსოვრა მირა ჰინდლის სახელი, როგორც „ბრიტანეთის ყველაზე უწმინდური ქალი“.