საქართველოს რკინიგზა ინფორმაციას ავრცელებს

საქართველოს რკინიგზა ინფორმაციას ავრცელებს, რომლის თანახმად, 2022 წლის პირველი ნახევარი რკინიგზამ რეკორდული 161 მილიონი ლარის მოგებით დაასრულა.

„საოპერაციო შემოსავლები 12%-ით გაიზარდა და 311 მილიონი ლარი შეადგინა.

გაუმჯობესებული მაჩვენებლები გადაზიდვების რეკორდული ზრდითა და სამგზავრო გადაყვანების მატებით არის გამოწვეული.

რაც შეეხება, თანამშრომლების ხელფასებსა და სხვა ხარჯებს, მათი ჯამური მაჩვენებელი 97 მილიონი ლარია. როგორც მოგეხსენებათ, 2021 წლის მე-3 კვარტალში კომპანიამ 12,000-ზე მეტ დასაქმებულს ხელფასი გაუზარდა, რაც ბუნებრივია სახელფასო ხარჯებში აისახა, ხოლო საშუალო ხელფასმა 1300 ლარზე მეტი შეადგინა.

წმინდა ფინანსურმა შემოსავალმა 59 მილიონი ლარი შეადგინა, რაც ძირითადად განპირობებულია 2021 წლის რეფინანსირების შედეგად შემცირებული საპროცენტო ხარჯითა და ლარის გამყარებით დოლართან მიმართებაში.

ასევე გაუმჯობესდა ლიკვიდურობის მაჩვენებელიც. ორგანიზაციის ბალანსზე 2022 წლის 30 ივნისის მდგომარეობით არსებული ფულადი სახსრები 252 მილიონ ლარს შეადგენდა, რაც 2021 წლის 30 ივნისის მდგომარეობით არსებულ ფულადი სახსრების ბალანსს - 68 მილიონი ლარით, ხოლო 2021 წლის ბოლოსთვის არსებულ ფულად სახსრებს - 40 მილიონი ლარით აღემატება“, - წერს საქართველოს რკინიგზა.