დონალდ ტრამპის მიერ ტარიფების გამოცხადების შემდეგ, მსოფლიოში საფონდო ბირჟებზე აქციების ფასები დაეცა

აშშ-ის პრეზიდენტის, დონალდ ტრამპის მიერ ტარიფების გამოცხადების შემდეგ, მსოფლიოში საფონდო ბირჟებზე ვარდნის ტენდენცია შეინიშნება.

აზია-წყნარი ოკეანისა და ევროპის საფონდო ბაზრებზე აქციების ფასები დაეცა და ასევე მოსალოდნელია, რომ აშშ-ის ბაზრებიც შემცირებული მონაცემებით გაიხსნება.

იაპონიის Nikkei 225 ინდექსი 2.8 პროცენტით შემცირებული ფასებით დაიხურა. ერთპროცენტიანი შემცირება ჰქონდა სამხრეთ კორეის Kospi-ს ინდექსს. 1.5 პროცენტით ნაკლებით დაიხურა ჰონგ-კონგის Hang Seng-ის ინდექსი. ევროპაში, რეგიონის საორიენტაციო Stoxx 600 ინდექსი ვაჭრობდა 1.3 პროცენტით დაბალი ფასებით. ლონდონის FTSE 100 ამავე დროს 1.3 პროცენტით დაეცა.

რაც შეეხება აშშ-ს, Dow-ის ფიუჩერსები 2.5 პროცენტით, ხოლო S&P 500-ის 3 პროცენტით დაბალი იყო. ტექნოლოგიური Nasdaq-ის გახსნა 3.3 პროცენტიანი შემცირებით არის მოსალოდნელი.

აშშ-ის პრეზიდენტის, დონალდ ტრამპის მიერ სხვადასხვა ქვეყნისთვის დაწესებული ტარიფები 10%-იდან 49%-მდეა. ამასთან, ტრამპმა ევროკავშირს – 20%-იანი, დიდ ბრიტანეთს კი 10%-იანი ტარიფები დაუწესა. როგორც აშშ-ის პრეზიდენტმა აღნიშნა, ტარიფები აშშ-ს ეკონომიკის აღდგენაში დაეხმარება. ასევე, ტრამპმა 25%-იანი ტარიფი დააწესა უცხოური წარმოების ყველა ავტომობილზე.