შაქარზე 3500-ჯერ ტკბილი ახალი დამატკბობელი შექმნეს, რომელსაც 0 კალორია აქვს - რას ამბობენ მეცნიერები

შაქრის შემცვლელების ძიებაში მეცნიერებმა შესაძლოა მნიშვნელოვანი ალტერნატივა შექმნეს. ბიოტექნოლოგიურმა კომპანია Amai Proteins Ltd-მ ახალი დამატკბობელი, Sweelin შეიმუშავა, რომელიც საქაროზაზე დაახლოებით 3500-ჯერ ტკბილია და ადრეულ კლინიკურ კვლევაში სისხლში გლუკოზისა და ინსულინის დონის მნიშვნელოვანი მატება არ გამოუწვევია.

ახალი პროდუქტის შექმნის იდეა დასავლეთ და ცენტრალურ აფრიკაში გავრცელებულ ტროპიკულ მცენარეს, Dioscoreophyllum cumminsii-ს უკავშირდება. მცენარე შეიცავს მონელინს, ერთ-ერთ ყველაზე ტკბილ ბუნებრივ ცილას. მეცნიერებმა ხელოვნური ინტელექტის დახმარებით ამ ცილის გაუმჯობესებული, ლაბორატორიულად მიღებული ვერსია შექმნეს, რომლის საფუძველზეც Sweelin შეიმუშავეს.

დამატკბობელი თეთრი ფხვნილის სახით არის წარმოდგენილი და სითხეში ადვილად იხსნება. მისი მაღალი სიტკბოს გამო, ერთი ჭიქა ცივი ჩაის დასატკბობად 3 მილიგრამზე ნაკლები Sweelin-იც კი საკმარისი აღმოჩნდა. პროდუქტი ასევე შედარებით მაღალი ტემპერატურის პირობებში სტაბილურობას ინარჩუნებს და გარკვეულ რეცეპტებში შაქრის მნიშვნელოვანი ნაწილის ჩანაცვლება შეუძლია.

რა აჩვენა ადამიანებზე ჩატარებულმა კვლევამ?

თელ-ავივის სურასკის სამედიცინო ცენტრში ჩატარებულ რანდომიზებულ კლინიკურ კვლევაში 19 ადამიანი მონაწილეობდა. მკვლევრები აკვირდებოდნენ მათ სისხლში გლუკოზის, ინსულინისა და GLP-1 ჰორმონის დონეს დამატკბობლის შემცველი სასმლის მიღებიდან ორი საათის განმავლობაში.

მონაწილეები სხვადასხვა დღეს წინასწარ განსაზღვრული თანმიმდევრობით იღებდნენ Sweelin-ით, სტევიითა და დექსტროზით დამტკბარ სასმელებს. კვლევა ისე იყო ორგანიზებული, რომ მონაწილეებმა არ იცოდნენ, კონკრეტულად რომელ პროდუქტს იღებდნენ.

შედეგების მიხედვით, Sweelin-ის მიღების შემდეგ სისხლში გლუკოზისა და ინსულინის ცვლილებები სტევიის მსგავსად დაბალი იყო. დექსტროზასთან შედარებით, გლუკოზის მატება დაახლოებით 31-ჯერ, ხოლო ინსულინის პასუხი დაახლოებით 81-ჯერ ნაკლები აღმოჩნდა. ამასთან, Sweelin-ს GLP-1-ის დონის მნიშვნელოვანი ზრდა არ გამოუწვევია.

მკვლევართა შეფასებით, ასეთი შედეგები განსაკუთრებით საინტერესოა იმ ადამიანებისთვის, რომლებსაც აქვთ პრედიაბეტი, მეორე ტიპის დიაბეტი ან სიმსუქნე, რადგან შაქრის შემცირება ხშირად მათი კვების მართვის მნიშვნელოვანი ნაწილია.

ახალი დამატკბობლის უსაფრთხოებასთან დაკავშირებით კომპანიამ აშშ-ის სურსათისა და მედიკამენტების ადმინისტრაციის (FDA) შესაბამისი პროცედურაც გაიარა. პროდუქტი უკვე ხელმისაწვდომია აშშ-ში, სინგაპურსა და ისრაელში.

თუმცა მეცნიერები ხაზს უსვამენ, რომ კვლევაში მონაწილეთა რაოდენობა მცირე იყო და Sweelin-ის გრძელვადიანი უსაფრთხოებისა და ეფექტების შესაფასებლად უფრო ფართომასშტაბიანი კვლევებია საჭირო.