ღეროვანი უჯრედებით მკურნალობა - პირველი ქვეყანა მსოფლიოში, რომელმაც ასეთი თერაპია დაუშვა

იაპონიაში ნებადართული გახდა ღეროვანი უჯრედებით მკურნალობის ორი ინოვაციური მეთოდი

იაპონიაში პირველად დაუშვეს მკურნალობის მეთოდები გადაპროგრამებული ღეროვანი უჯრედების გამოყენებით, რომლებიც სხვადასხვა ტიპის ქსოვილად გარდაქმნას შეძლებენ. ქვეყნის მარეგულირებლებმა ერთდროულად დაამტკიცეს ორი ინოვაციური თერაპია - პარკინსონის დაავადებისა და გულის მძიმე უკმარისობის სამკურნალოდ. მოსალოდნელია, რომ ეს მეთოდები პაციენტებისთვის უკვე უახლოეს თვეებში გახდება ხელმისაწვდომი.

პარკინსონის დაავადების სამკურნალოდ ერთ-ერთ იაპონურ ფარმაცევტულ კომპანიას მიეცა ნებართვა პრეპარატ Amchepry-ის წარმოებისა და გაყიდვისთვის. მკურნალობა გულისხმობს ღეროვანი უჯრედების ტვინში გადანერგვას, რომლებიც დოფამინის გამომუშავებელი ნეირონების წინამორბედებად გარდაიქმნება - სწორედ ამ ნეირონების ნაკლებობა იწვევს პარკინსონის დაავადებას.

კიოტოს უნივერსიტეტის მიერ ჩატარებულ კვლევაში მონაწილეობდა 50–69 წლის ასაკის შვიდი პაციენტი. თითოეულ მათგანს ტვინის ორივე ნახევარსფეროში 5–10 მილიონი უჯრედი ჩაუნერგეს. ორწლიანი დაკვირვების შედეგად სერიოზული გვერდითი ეფექტები არ გამოვლენილა, ხოლო ოთხ პაციენტში დაავადების სიმპტომების გაუმჯობესება დაფიქსირდა.

იაპონიის ჯანდაცვის სამინისტრომ ასევე დაამტკიცა ReHeart თერაპია, რომელიც სტარტაპმა Cuorips-მა შექმნა. მეთოდი გულის ზედაპირზე ლაბორატორიაში გაზრდილი გულის კუნთის ქსოვილის ფენების გადანერგვას გულისხმობს. ეს ფენები ხელს უწყობს ახალი სისხლძარღვების ფორმირებას და გულის ფუნქციის გაუმჯობესებას.

ორივე თერაპია შესაძლოა ბაზარზე უახლოეს თვეებში გამოჩნდეს და გახდეს მსოფლიოში პირველი კომერციულად ხელმისაწვდომი სამედიცინო პროდუქტები, რომელიც გადაპროგრამებულ ღეროვან უჯრედებს იყენებს.