"რაღაც კოლუმბიური სერიალია... არ გვიკვირს ის დაპირისპირება, რომელსაც ვხედავთ ამ გაუგებარ ე.წ. რვიანში" - ლევან მახაშვილი

"რასაც ჩვენ ვაკვირდებით, ეს არის ძალიან არასერიოზული, რაღაც კოლუმბიური სერიალი ჩვეულებრივი. არც არის გასაკვირი, იმიტომ, რომ ამ ადამიანებს რეალურად არ აერთიანებთ არაფერი სერიოზული, ან იდეა ან მიზანი", - ამის შესახებ პარლამენტის ევროპასთან ინტეგრაციის კომიტეტის თავმჯდომარემ, ლევან მახაშვილმა განაცხადა, რითაც ოპოზიციურ პარტიებს შორის უთანხმოებას გამოეხმაურა.

"ეს გაერთიანება არის სიძულვილის გარშემო გაერთიანება, ერთი პარტიის წინააღმდეგ გაერთიანება, ამიტომ არ არის გასაკვირი ის დაპირისპირება, რომელსაც ჩვენ ვხედავთ. ეს არის მათი სახე და ეს არის რეალურად, რაც მათ შეუძლიათ. შეუძლიათ არა რაღაცის გარშემო გაერთიანება, მიზნის დასახვა, შენება, არამედ სიძულვილი, დაპირისპირება, რევოლუციების მოწყობა. ამიტომ, ჩვენ არ გვიკვირს ის დაპირისპირება, რომელსაც ვხედავთ ამ ე.წ. გაუგებარ რვიანში", - აღნიშნა ლევან მახაშვილმა.

ცნობისთვის, ბოიკოტში მყოფი ოპოზიციის ცალკეული წევრები ბოიკოტს უკვე ერთმანეთს უცხადებენ. დიდი პოლიტიკური დავის სათავეში ისევ "ნაციონალური მოძრაობაა". სააკაშვილის პარტია ოპოზიციური რვიანიდან თამარ ჩერგოლეიშვილის გარიცხვას ისევ ითხოვს და ოფიციალურ განცხადებაში ამბობს, რომ ცალკეული ინდივიდების გარდა, რომელთა ქმედებები ყოველგვარ ეთიკურ ნორმებს სცდება, ურთიერთობას ყველა ძალასთან გააგრძელებს. თავად ჩერგოლეიშვილისთვის "ნაციონალური მოძრაობის" მუქარა გაუგებარი, ტონი კი მიუღებელია.