1756669954
შაორის ახალგაზრდული ბანაკი მონაწილეების მიერ დადგმული ნომრით დაიხურა.
ღონისძიებას ესწრებოდა ახალგაზრდობის სააგენტოს ხელმძღვანელის მოვალეობის შემსრულებელი, ვახტანგ ბააკაშვილი, რომელმაც სიტყვით მიმართა ახალგაზრდებს და ბანაკების განხორციელების მნიშვნელობაზე გაამახვილა ყურადღება. საუბრისას მან მადლობა გადაუხადა ბანაკის სათანადო ფუნქციონირებაზე პასუხისმგებელ ყველა პირსა და უწყებას.
2025 წელს შაორის ბანაკმა, რომელიც საქართველოს განათლების, მეცნიერებისა და ახალგაზრდობის სამინისტროს და ახალგაზრდობის სააგენტოს მიერ განხორციელდა, 800-მდე ახალგაზრდას უმასპინძლა. საბანაკე პროგრამა ხუთდღიანი იყო და ბანაკის მონაწილეები ჩაერთნენ მრავალფეროვან საგანმანათლებლო, სპორტულ და შემეცნებით აქტივობებსა და შეხვედრებში. მათთვის ჩატარდა ტრენინგები სხვადასხვა აქტუალურ თემაზე.
აფხაზეთის ავტონომიური რესპუბლიკის მთავრობისა და აფხაზეთის კულტურის, სპორტის და ახალგაზრდულ საქმეთა სააგენტოსთან თანამშრომლობით, შაორის ბანაკის ერთი ნაკადი აერთიანებდა მხოლოდ აფხაზეთიდან დევნილ ახალგაზრდებს. ასევე საგარეო საქმეთა სამინისტროსთან თანამშრომლობით, ბანაკმა ერთ ნაკადად ქართული დიასპორის წარმომადგენლებს უმასპინძლა.
ბანაკის გახსნამდე, 200-მდე შერჩეულ ახალგაზრდას ლიდერობის გადასამზადებელი ტრენინგი ჩაუტარდა. ისინი გაეცნენ ახალგაზრდული ბანაკების მუშაობის პრინციპსა და მრავალფეროვან პროგრამას, რომელიც შეესაბამება ბანაკის მონაწილეთა ინტერესებს. ტრენინგის შემდეგ, შერჩეული საუკეთესო ლიდერები დასაქმდებიან შაორისა და ანაკლიის საზაფხულო ბანაკებში.
