ტენდერი

მათთან ხელშეკრულება შეწყდა - სავარაუდოდ, ამ კომპანიასთან ჩვენ გვექნება სასამართლო დავა იმ თანხებთან დაკავშირებით, რომელიც პირგასამტეხლოთი არის გათვალისწინებული - პაატა სალია „ილი ჯგუფის“ შესახებ

იუსტიციის მინისტრის, პაატა სალიას განცხადებით, პენიტენციურმა სამსახურმა „ილი ჯგუფს“ ხელშეკრულება ვადაზე ადრე შეუწყვიტა. როგორც მინისტრმა აღნიშნა, კომპანია ხელშეკრულებით ნაკისრ ვალდებულებას ხშირად არღვევდა.პაატა სალიას თქმით, ბაზრის კვლევის შედეგად ახალი კომპანია უკვე გამოვლენილია, რომელთანაც რამდენიმეთვიანი ხელშეკრულება გაფორმდა.„ამ კომპანიასთან ჩვენ გვქონდა გარკვეულწილად გართულებული ურთიერთობა, ისინი ხშირად არღვევდნენ ხელშეკრულებით ნაკისრ ვალდებულებებს. სავარაუდოდ, ამ კომპანიასთან ჩვენ გვექნება სასამართლო დავა იმ თანხებთან დაკავშირებით, რომელიც პირგასამტეხლოთი არის გათვალისწინებული.მათთან ხელშეკრულება შეწყდა. დღეის მდგომარეობით, მოხდა ბაზრის კვლევა და შესაბამისად, ბაზრის კვლევით გამოვლინდა ერთ-ერთი კომპანია, რომელთანაც დაიდო ხელშეკრულება რამდენიმე თვით. ამ პერიოდშიც უკვე გამოცხადდება ტენდერი. ჩვენ მივიღეთ გადაწყვეტილება, რომ ორ ნაწილად გავყოთ ეს ტენდერი და აღმოსავლეთ და დასავლეთ საქართველოზე გადავანაწილოთ. შესაბამისად, იმედი გვაქვს, რომ ორი სხვადასხვა კომპანია გაიმარჯვებს. ანუ, ხელს შევუწყობთ უფრო კონკურენციას და ეს მომავალში, თავისთავად, გადაგვაზღვევს ისეთი შემთხვევებისგან, რაც „ილი ჯგუფთან“ გვქონდა“, - აღნიშნა პაატა სალიამ.მინისტრმა იმედი გამოთქვა, რომ ახალი ხელშეკრულება და ახალი ტენდერით გამოვლენილი პირები უფრო პასუხისმგებლობით მოეკიდებიან საქმეს და მათთან ნაკლები პრობლემები ექნებათ.

პოლიტიკა • 1773304752

რეგიონული პოლიტიკისა და თვითმმართველობის კომიტეტმა სარატიფიკაციო დოკუმენტები განიხილა

პარლამენტის რეგიონული პოლიტიკისა და თვითმმართველობის კომიტეტის სხდომაზე დეპუტატებმა სასესხო შეთანხმებების ვადის გაგრძელების საკითხები განიხილეს.ინფრასტრუქტურის მინისტრის მოადგილემ მზია გიორგობიანმა კომიტეტს „2019 წლის 27 ნოემბრის „საქართველოსა და აზიის განვითარების ბანკს შორის სასესხო შეთანხმების (ჩვეულებრივი ოპერაციები) (აღმოსავლეთ-დასავლეთის მაგისტრალის გაუმჯობესების პროექტი) N2 ცვლილების წერილ-შეთანხმება“ გააცნო. რატიფიცირებისათვის წარმოდგენილი დოკუმენტის თანახმად, სესხის დახურვის და პროექტის დასრულების ვადა გრძელდება.მინისტრის მოადგილის თქმით, პროექტის ძირითადი სამუშაოები დასრულებულია, თუმცა ჯერ კიდევ არის დარჩენილი ორი მნიშვნელოვანი კომპონენტი - აღმოსავლეთ-დასავლეთის ჩქაროსნულ ავტომაგისტრალზე წონის კონტროლის დინამიური სისტემის საპილოტე პროექტი და გზების მოვლა-შენახვის სტრატეგიისა და სახელმძღვანელო დოკუმენტის მოსამზადებლად, შესაბამისი საკონსულტაციო კომპანიის შერჩევა, რის გამოც პროექტის დასრულების ვადად 2025 წლის 30 ივნისის ნაცვლად 2027 წლის 30 სექტემბერი განისაზღვრა.სხდომაზე ეკონომიკისა და მდგრადი განვითარების მინისტრის პირველმა მოადგილემ ნინო ენუქიძემ „2019 წლის 9 დეკემბრის „საქართველოსა და აზიის განვითარების ბანკს შორის სასესხო შეთანხმების (ჩვეულებრივი ოპერაციები) (საცხოვრებლად ვარგისი ქალაქების საინვესტიციო პროგრამა) N2 ცვლილების წერილ-შეთანხმება“ წარადგინა. მისი თქმით, პროექტით გათვალისწინებული ზოგიერთი ტენდერის ჩაშლამ და ტექნიკური დავალებების ნაწილის შეუსრულებლობამ პროექტის დასრულების ვადის გახანგრძლივება განაპირობა. წარმოდგენილი წერილ-შეთანხმების თანახმად, პროექტის დასრულება 2025 წლის 31 აგვისტოს ნაცვლად 2028 წლის 31 მაისს იგეგმება.რეგიონული პოლიტიკისა და თვითმმართველობის კომიტეტის წევრებმა სარატიფიკაციო დოკუმენტების პლენარულ სხდომაზე გატანას მხარი დაუჭირეს.

მსოფლიო • 1773151936

მოვუწოდებთ ისრაელს, დასავლეთ სანაპიროზე მშენებლობებისგან თავი შეიკავოს - ფრიდრიხ მერცი

გერმანიის კანცლერი ფრიდრიხ მერცი „დიდ შეცდომად“ აფასებს ისრაელის მიერ მდინარე იორდანეს დასავლეთ სანაპიროზე, იერუსალიმიდან აღმოსავლეთით, ახალი დასახლებების მშენებლობას.მისი თქმით, გერმანიის მთავრობა მოუწოდებს ისრაელს, თავი შეიკავოს მსგავსი ნაბიჯებისგან.როგორც გერმანიის კანცლერი აცხადებს, E1 პროექტის ხელშეწყობა გაართულებს ორი სახელმწიფოს პრინციპის რეალიზებას.ცნობისთვის, ისრაელმა E1 პროექტის მშენებლობას ე.წ. მწვანე შუქი ჯერ კიდევ გასული წლის აგვისტოში აუნთო. პროექტის ფართობია 12 კვადრატული კილომეტრი. ისრაელის ხელისუფლებამ იანვარში ტენდერი გამოაცხადა ამ ტერიტორიაზე 3 400-მდე საცხოვრებელი სახლის ასაშენებლად.ისრაელის მიერ დასავლეთ სანაპიროზე მშენებლობებს მკაცრად გმობს ასევე საერთაშორისო საზოგადოება. გაერო-ს გენერალური მდივნის პრესსპიკერის თქმით, ისრაელის მხრიდან მსგავსი გაფართოება, „ეგზისტენციურ საფრთხეს“ უქმნის პალესტინის სახელმწიფოს მომავალს.

საზოგადოება • 1772792781

კახა კალაძემ „თბილსერვის ჯგუფის“ განახლებული ტექნიკა დაათვალიერა

შპს „თბილსერვის ჯგუფის“ ავტობაზა 22 ერთეული სპეცმანქანით განახლდა. შესყიდვა ორ ეტაპად განხორციელდა, რომლის ფარგლებშიც დედაქალაქში MAN-ისა და RENAULT-ის 10, 15, 21-კუბიანი ნაგავმზიდები, ასევე, FORD-ის მარკის ნარჩენების გადამზიდი ტექნიკა (ე.წ. ჰუკლიპტი) შემოვიდა.ახალი ტექნიკა დედაქალაქის მერმა, კახა კალაძემ, მერის მოადგილესთან, ირაკლი ბენდელიანსა და „თბილსერვის ჯგუფის“ დირექტორთან, გიორგი პაპავასთან ერთად დაათვალიერა.„„თბილსერვის ჯგუფმა“ 22 ერთეული სპეცტექნიკა შეიძინა. გარდა ამისა, წელს ველოდებით 40 ერთეულ ტექნიკას, რომელიც კიდევ უფრო გააუმჯობესებს აღნიშნული სამსახურის გამართულ მუშაობას. ჩვენთვის ძალიან მნიშვნელოვანია ნარჩენების დროულად, ეფექტურად გატანა. ქალაქი ყოველთვის უნდა იყოს სუფთა, მოწესრიგებული, ამაში კი განსაკუთრებული როლი აქვს შესაბამისი ტექნიკის არსებობას და მის განახლებას. აღნიშნული შესყიდვის შემდეგ „თბილსერვის ჯგუფს“ 40%-ზე მეტი განახლებული ტექნიკა ექნება, რაც ძალიან კარგია და მისასალმებელია. ჩვენ ამ მიმართულებით მუშაობას განვაგრძობთ, რადგან, როგორც გითხარით, ჩვენთვის მნიშვნელოვანია, ქალაქი იყოს სუფთა და ყველანაირად მოწესრიგებული“, – განაცხადა კახა კალაძემ.აღსანიშნავია, რომ ორივე ტენდერის ფარგლებში შემოყვანილი მანქანების საერთო ღირებულება 8 628 673 ლარია, მომწოდებელი კომპანიები კი შპს „ჯითი გრუპი“ და შპს „თეგეტა მოტორსი“ არიან.„თბილსერვის ჯგუფი“ მიმდინარე წელსაც შეისყიდის ნაგავმზიდ მანქანებს და ასევე, სხვა მიმართულების ტექნიკას. შესაბამისი ტენდერები გამოცხადებულია და მანქანები დედაქალაქს სხვადასხვა პერიოდში მიეწოდება.დასუფთავების მიმართულებით ავტობაზის განახლების შედეგად დედაქალაქის მასშტაბით ეტაპობრივად უმჯობესდება ნარჩენების გატანის პროცესი და შესაბამისი სერვისები.ინფორმაციას თბილისის მერია ავრცელებს.

საზოგადოება • 1772180129

აბასთუმანში ინფრასტრუქტურის რეაბილიტაციის პროექტირება-მშენებლობისთვის ტენდერი გამოცხადდა - უნიკალური კურორტის განვითარებისათვის სახელმწიფომ და ბიძინა ივანიშვილის საქველმოქმედო ფონდმა „ქართუმ“ არაერთი ინფრასტრუქტურული პროექტი განახორციელეს

ინფრასტრუქტურის სამინისტროს მუნიციპალური განვითარების ფონდმა ადიგენის მუნიციპალიტეტის დაბა აბასთუმანში ინფრასტრუქტურის მასშტაბური რეაბილიტაციის პროექტირება-მშენებლობისთვის ტენდერი გამოაცხადა. მუნიციპალური განვითარების ფონდის ინფორმაციით, შესასრულებელი სამუშაოს პირველ ეტაპზე დაგეგმილი წინასაპროექტო კვლევების შედეგად განისაზღვრება ის ინფრასტრუქტურა, რომელიც საერთო ურბანული კონცეფციის მიხედვით რეაბილიტაციას საჭიროებს.„პროექტის ფარგლებში დაგეგმილია ისტორიული და კულტურული მნიშვნელობის მქონე შენობა-ნაგებობების აღდგენა, საზოგადოებრივი დანიშნულების ტურისტული და რეკრეაციული ობიექტების კეთილმოწყობა, ქუჩებისა და გზების განახლება და ნაპირსამაგრი ნაგებობებისა და სახიდე გადასასვლელების მშენებლობა-რეკონსტრუქცია. პროექტის მთავარი მიზანია აბასთუმნის ისტორიული გარემოსა და კულტურული თავისებურებების შენარჩუნება და ამავდროულად, რეაბილიტაციის პროცესში თანამედროვე და ინოვაციური ტექნოლოგიების გამოყენება. აბასთუმნის ინფრასტრუქტურის რეაბილიტაცია ხელს შეუწყობს რეგიონის ტურისტული და ეკონომიკური პოტენციალის გაძლიერებას, ისტორიული მემკვიდრეობის დაცვას და კომფორტული გარემოს შექმნას ადგილობრივი მოსახლეობისა და ვიზიტორებისთვის. უნიკალური კურორტის, აბასთუმნის განვითარებისათვის სახელმწიფომ და ბიძინა ივანიშვილის საქველმოქმედო ფონდმა „ქართუმ“ არაერთი ინფრასტრუქტურული პროექტი განახორციელეს.მათ შორის, აშენდა და უახლესი ტექნოლოგიებით აღიჭურვა ფილტვის ქრონიკულ პათოლოგიათა მკურნალობის ახალი ცენტრი და ამბულატორია, დასრულდა კურორტის ცენტრალურ ქუჩაზე ისტორიული სახლების, ეროვნული ასტროფიზიკური ობსერვატორიის, საბაგირო სადგურის და ცენტრალური პარკის სრული რეაბილიტაცია. შემუშავდა კურორტ აბასთუმნის გენგეგმა, დასრულდა კურორტის წყალმომარაგება-წყალარინების სისტემებისა და წყალარინების გამწმენდი ნაგებობის მშენებლობა-რეაბილიტაცია. კურორტის განვითარებისათვის, გრძელდება ბაღდათი-აბასთუმნის გზის სრული რეაბილიტაცია, აბასთუმნის შემოვლითი გზის მშენებლობა და სასტუმრო-კომპლექს „პარაგრაფის“ მშენებლობა. გამოცხადებული ტენდერის ფარგლებში განხორციელებული სამუშაოები კურორტის რეაბილიტაციის დასკვნით ეტაპს წარმოადგენს. პროექტის დასრულების შემდეგ აბასთუმანი სრულად ჩამოყალიბდება თანამედროვე, საერთაშორისო სტანდარტების შესაბამის კურორტად და გაიძლიერებს პოზიციას მსოფლიო ტურისტულ რუკაზე“, - აღნიშნულია ინფორმაციაში.

პოლიტიკა • 1772010064

შპს "თბილსერვის ჯგუფის" ავტობაზის განახლება გრძელდება

შპს "თბილსერვის ჯგუფმა" 22 ერთეული სპეცმანქანა - MAN-ისა და RENAULT-ის 10, 15, 21-კუბიანი ნაგავმზიდები, ასევე, FORD-ის მარკის ნარჩენების გადამზიდი ტექნიკა შეისყიდა - ამის შესახებ თბილისის მერმა კახა კალაძემ მუნიციპალიტეტის მთავრობის დღევანდელ სხდომაზე განაცხადა.მისივე განმარტებით, შესყიდვა ორ ეტაპად განხორციელდა, ავტობაზის განახლების პროცესი კი მომავალშიც გაგრძელდება."ორივე ტენდერის ფარგლებში, შემოყვანილი მანქანების საერთო ღირებულება, დაახლოებით, ცხრა მილიონი ლარია. დასუფთავების მიმართულებით ავტობაზის განახლების შედეგად, ქალაქის მასშტაბით ეტაპობრივად უმჯობესდება ნარჩენების გატანის პროცესი. ყველაფერს გავაკეთებთ, რომ ამ მიმართულებით არანაირი პრობლემა არ შეიქმნას. ჩვენი ქალაქი უნდა იყოს ყველაზე სუფთა, მოწესრიგებული. სპეცტექნიკის განახლება მომავალშიც გაგრძელდება, რათა ტექნიკის თვალსაზრისით, შესაბამის სამსახურს არ ჰქონდეს შეფერხებები", - განაცხადა კახა კალაძემ.

აღმოსავლეთ-დასავლეთის მაგისტრალზე საგზაო მოძრაობის უსაფრთხოების გასაუმჯობესებლად ტენდერი გამოცხადდა

საზოგადოება • 1771912211

თბილისის შემოვლითი გზის ავჭალა-აეროპორტის მონაკვეთის მშენებლობისთვის ტენდერი გამოცხადდა

საქართველოს ინფრასტრუქტურის სამინისტროს საავტომობილო გზების დეპარტამენტმა თბილისის შემოვლითი მაგისტრალური გზის მესამე ლოტის - ავჭალა–აეროპორტის, 22.5-კილომეტრიანი მონაკვეთის სამშენებლო სამუშაოებზე საერთაშორისო ტენდერი გამოაცხადა.ტენდერი მოიცავს ორი მონაკვეთის მშენებლობას: ავჭალა–გლდანის 5.8-კილომეტრიან და გლდანი–აეროპორტის 16.7-კილომეტრიან მონაკვეთებს.პროექტის მიხედვით, გზა იქნება 4-ზოლიანი, 4 სატრანსპორტო კვანძით, 16 ხიდით და 4 პარალელური გვირაბით. მონაკვეთი იწყება ავჭალის სარკინიგზო ხიდის წინ, გრძელდება სამხრეთ-აღმოსავლეთის მიმართულებით და სრულდება დიდი ლილოს შესასვლელთან, ლილოს ბაზრობამდე.თბილისის შემოვლითი გზა წარმოადგენს აღმოსავლეთ–დასავლეთის საერთაშორისო მაგისტრალის E60-ის საკვანძო ნაწილს, ხოლო მისი მშენებლობა ერთ-ერთ ყველაზე მნიშვნელოვან საგზაო ინიციატივას ქვეყნის სატრანსპორტო სისტემის განვითარებაში. პროექტი ერთდროულად ემსახურება როგორც საერთაშორისო სატრანზიტო ფუნქციის გაძლიერებას, ისე დედაქალაქის სატრანსპორტო პრობლემების გრძელვადიან გადაწყვეტას.თბილისის შემოვლითი გზა (ნატახტარი/წიწამური — რუსთავი) საერთო ჯამში, დაახლოებით 49 კილომეტრია და ოთხ ლოტად არის დაყოფილი. თბილისის შემოვლითი გზის მეორე ლოტის (წიწამური–ავჭალის მონაკვეთის) სამშენებლო სამუშაოებზე საერთაშორისო ტენდერი 2025 წლის დეკემბრის ბოლოს გამოცხადდა.თბილისის შემოვლითი გზის მესამე ლოტის (ავჭალა–აეროპორტის) მშენებლობის ტენდერით დაინტერესებული კომპანიებს წინადადებების მიღება 2026 წლის 11 აპრილს დაიწყება და 15 აპრილს დასრულდება. შესყიდვის სავარაუდო ჯამური ღირებულება 932 023 564 ლარია. პროექტი აზიის განვითარების ბანკის ფინანსური მხარდაჭერით განხორციელდება.ტენდერის შესახებ დეტალური ინფორმაცია იხილეთ შემდეგ ბმულზე: http://tenders.procurement.gov.ge/public/?go=674515&lang=ge

რეგიონი • 1771754330

გურჯაანის მერი ველისციხის რეაბილიტაციის პროექტის კონტრაქტორ კომპანიებთან ხელშეკრულების შეწყვეტაზე: ინფორმაცია, რომ პროექტი აღარ გაგრძელდება, სიმართლეს არ შეესაბამება. ტენდერი ახლიდან გამოცხადდება და რაც შეიძლება მოკლე ვადებში სარეაბილიტაციო სამუშაოები განახლდება

გურჯაანის მერი, გიორგი მაჭავარიანი, საქართველოს მთავრობის მიერ სოფელ ველისციხის რეაბილიტაციის პროექტის კონტრაქტორ კომპანიებთან ხელშეკრულების შეწყვეტაზე და ახალი ტენდერის გამოცხადებაზე კომენტარს აკეთებს.გურჯაანის მერი ამბობს, რომ ინფორმაცია, თითქოს პროექტი გაჩერდა და აღარ გაგრძელდება, სიმართლეს არ შეესაბამება.„ადგილზე გავეცანით რა მდგომარეობაა ამ პროექტთან დაკავშირებით. ის ინფორმაცია, რომ ეს პროექტი გაჩერდა და აღარ გაგრძელდება სიმართლეს არ შეესაბამება. კომპანიას, რომელიც ამ პროექტის სამუშაოებს ასრულებდა ხელშეკრულება შეუწყდებათ, ტენდერი ახლიდან გამოცხადდება და რაც შეიძლება მოკლე ვადებში სარეაბილიტაციო სამუშაოები განახლდება“- განაცხადა გიორგი მაჭავარიანმა.ცნობისთვის, მუნიციპალური განვითარების ფონდმა, გურჯაანის მუნიციპალიტეტის სოფელ ველისციხის რეაბილიტაციის პროექტის კონტრაქტორ კომპანიებთან ხელშეკრულების შეწყვეტისა და ახალ ტენდერის გამოცხადების გადაწყვეტილება მიიღო, ვინაიდან კომპანიებმა, არაერთი გაფრთხილების მიუხედავად, ნაკისრი ვალდებულებები არ შეასრულეს.

რეგიონი • 1771754038

მგფ-ის დირექტორი ველისციხის რეაბილიტაციის პროექტის კონტრაქტორ კომპანიებთან ხელშეკრულების გაწყვეტაზე: ამოვწურეთ ყველანაირი რესურსი, რომ ხელი შეგვეწყო და რამენაირად გაგრძელებულიყო სამუშაოები. მაქსიმალურად მოკლე დროში გამოცხადდება ახალი ტენდერი

მუნიციპალური განვითარების ფონდმა, სოფელ ველისციხის ცენტრალური ნაწილის რეაბილიტაციის პროექტის კონტრაქტორ კომპანიებთან ხელშეკრულების გაწყვეტისა და ახალი ტენდერის გამოცხადების გადაწყვეტილება მიიღო.ფონდის აღმასრულებელი დირექტორის, ბექა ურუშაძის განცხადებით, კონტრაქტორთან ყველანაირი რესურსი ამოწურეს. მისივე თქმით, ვინაიდან პროექტი აზიის განვითარების ბანკის მხარდაჭერით ხორციელდება, პროცესიც მათთან შეთანხმებით მიმდინარეობს."ფაქტობრივად, კონტრაქტორთან ამოვწურეთ ყველანაირი რესურსი, რომ ხელი შეგვეწყო და რამენაირად გაგრძელებულიყო სამუშაოები, საბოლოოდ მივიღეთ გადაწყვეტილება, გაწყვეტილიყო ეს კონტრაქტი. უშუალოდ პროცესს რაც შეეხება, იქიდან გამომდინარე, რომ ADB-ის მხარდაჭერით ხორციელდება აღნიშნული ხელშეკრულება და პროექტი, მათთან შეთანხმებით მიდის ეს პროცესი, შესაბამისად, [ხელშეკრულების] გაწყვეტის პროცესსაც გარკვეული პერიოდი სჭირდება. ჩვენ ვეცდებით, მაქსიმალურად მოკლე დროში, პირველ რიგში, შეწყდეს - ეს პროცესია ახლა მიმდინარე და ამის შემდგომ უკვე გამოცხადდეს ახალი ტენდერი სამუშაოების დასრულების მიზნით," - აღნიშნა ბექა ურუშაძემ.სოფელ ველისციხის ცენტრალური ნაწილის რეაბილიტაციის პროექტის კონტრაქტორ კომპანიებთან - შპს "ინსისა" და შპს "ჯავას" ერთობლივ საწარმოსთან ხელშეკრულების შეწყვეტის მიზეზი, არაერთი გაფრთხილების მიუხედავად, კომპანიების მიერ ნაკისრი ვალდებულებების შეუსრულებლობა გახდა.

რეგიონი • 1771752660

მთავრობა ველისციხის რეაბილიტაციის პროექტის კონტრაქტორ კომპანიებთან ხელშეკრულებას წყვეტს და ახალ ტენდერს გამოაცხადებს - კომპანიებმა, არაერთი გაფრთხილების მიუხედავად, ნაკისრი ვალდებულებები არ შეასრულეს

მუნიციპალური განვითარების ფონდმა, გურჯაანის მუნიციპალიტეტის სოფელ ველისციხის რეაბილიტაციის პროექტის კონტრაქტორ კომპანიებთან ხელშეკრულების შეწყვეტისა და ახალ ტენდერის გამოცხადების გადაწყვეტილება მიიღო.ფონდმა რამდენიმე დღის წინ გადაწვიტა, რომ სოფლის ცენტრალური ნაწილის რეაბილიტაციის პროექტის კონტრაქტორ კომპანიებთან - შპს „ინსისა“ და შპს „ჯავას“ ერთობლივ საწარმოსთან, ხელშეკრულება შეწყვიტოს, რის მიზეზადაც კომპანიების მიერ ნაკისრი ვალდებულებების შეუსრულებლობა სახელდება. კერძოდ, რეაბილიტაციის პროექტი, რომელიც აზიის განვითარების ბანკის ფინანსური მხარდაჭერით ხორციელდება, 2022 წლის პირველ კვარტალში დაიწყო, თუმცა, არაერთი გაფრთხილების მიუხედავად, კომპანიებმა ნაკისრი ვალდებულებები არ შეასრულეს, რაც ხელშეკრულების გაწყვეტის მიზეზი გახდა.ველისციხეში, ადგილობრივ ხელისუფლებასთან ერთად ჩავიდა და სიტუაციას ადგილზე გაეცნო ფონდის აღმასრულებელი დირექტორი, ბექა ურუშაძე. განიხილეს პროექტის გაგრძელებისთვის აუცილებელი პროცედურები და მომდევნო ნაბიჯები.ბექა ურუშაძის განცხადებით, ხელშეკრულების შეწყვეტის პროცესი დონორი ორგანიზაციის წესებისა და რეგულაციების სრული დაცვით წარიმართება. თითოეული ეტაპი, ხელშეკრულების შეწყვეტა და ახალი ტენდერის მომზადება, აზიის განვითარების ბანკთან კოორდინაციითა და მისი უშუალო ჩართულობით მიმდინარეობს.პარალელურად, საერთაშორისო საზედამხედველო კომპანია „ეპტისა“ დაიწყებს ობიექტზე შესრულებული სამუშაოების დეტალურ აღწერასა და ინვენტარიზაციას. პროცედურა აუცილებელია შესრულებული სამუშაოების მოცულობის ზუსტად განსაზღვრისა და დარჩენილი სამუშაოების ნუსხის შესადგენად.

სამართალი • 1771582865

„ექსპერტიზის ჩატარება ვერ მოხერხდა, რადგან პროდუქცია მაღალი ტოქსიკურობის გამო, საფრთხეს უქმნიდა თავად ექსპერტის სიცოცხლეს“ - ფალსიფიცირებული თევზის კონსერვის რეალიზაციის საქმე

საგამოძიებო სამსახურმა ფალსიფიცირებული თევზის კონსერვის დამზადება-გასაღების ფაქტზე საწარმოს ხელმძღვანელი დააკავა. საქართველოს ფინანსთა სამინისტროს საგამოძიებო სამსახურის თანამშრომლებმა, სიცოცხლისა და ჯანმრთელობისთვის საფრთხის შემცველი ფალსიფიცირებული პროდუქციის დამზადება-გასაღების ფაქტზე, შპს „ბატონო“-ს ხელმძღვანელი დააკავეს. გამოძიებით დადგინდა, რომ ბრალდებულმა, 2025 წელს, სახელმწიფო ტენდერის საფუძველზე გაფორმებული ხელშეკრულების ფარგლებში, 380 792 ლარის ღირებულების 24 177.3 კილოგრამი თევზის კონსერვი მიაწოდა სასაზღვრო პოლიციასა და შპს „სახელმწიფო კვებით უზრუნველყოფას“. აღნიშნული პროდუქცია განკუთვნილი იყო საქართველოს შინაგან საქმეთა და თავდაცვის სამინისტროების თანამშრომელთა კვებისთვის. საგამოძიებო მოქმედებების შედეგად, მათ შორის საწარმოს ჩხრეკისას, ამოღებულია 17 241 ერთეული ფალსიფიცირებული თევზის კონსერვი. ასევე დადგინდა, რომ პროდუქციის დამზადებისა და ნედლეულის შენახვის პირობები კრიტიკულად არ შეესაბამებოდა სურსათის უსაფრთხოების მოთხოვნებს. ამოღებულ პროდუქტებზე ჩატარებული ქიმიური და მიკრობიოლოგიური ექსპერტიზის დასკვნით, კონსერვი არ აკმაყოფილებს მიკრობიოლოგიურ სტანდარტებს და უვარგისია მოხმარებისთვის. რიგ შემთხვევებში ექსპერტიზის ჩატარება ვერ მოხერხდა, რადგან პროდუქცია მაღალი ტოქსიკურობის გამო საფრთხეს უქმნიდა თავად ექსპერტის სიცოცხლესა და ჯანმრთელობას. გარდა ამისა, დადგინდა, რომ კონსერვის შიგთავსი, თევზის ხორცის მასური წილითა და ენერგეტიკული ღირებულებით, არ შეესაბამება ეტიკეტზე მითითებულ მონაცემებს. საქმეზე გამოძიება მიმდინარეობს საქართველოს სისხლის სამართლის კოდექსის 197-ე მუხლის მე-3 ნაწილით, რაც 5-დან 7 წლამდე ვადით თავისუფლების აღკვეთას ითვალისწინებს. ფინანსთა სამინისტროს საგამოძიებო სამსახური აგრძელებს აქტიურ საგამოძიებო მოქმედებებს სიცოცხლისა და ჯანმრთელობისათვის საფრთხის შემცველი პროდუქციის გამოვლენისა და ამოღების მიზნით.

სამართალი • 1771582459

დააკავეს მეწარმე, რომელიც შსს-სა და თავდაცვის სამინისტროებს ამარაგებდა თევზის კონსერვით, რომელთა ნაწილი სიცოცხლისთვის საფრთხეს წარმოადგენდა