სამართალი • 1732270533

საქალაქო სასამართლომ მელიქიშვილის გამზირზე გამართულ აქციაზე პოლიციელზე ძალადობის მუხლით დაკავებულს პატიმრობა შეუფარდა

თბილისის საქალაქო სასამართლომ 19 ნოემბერს მელიქიშვილის გამზირზე გამართულ აქციაზე პოლიციელზე ძალადობის მუხლით დაკავებულ მათე დევიძეს აღკვეთის ღონისძიების სახით პატიმრობა შეუფარდა.პატიმრობას საქართველოს პროკურატურა ითხოვდა. საქმის პროკურორის, ანი ხუბეჯაშვილის განცხადებით, ვიდეომტკიცებულებებით დასტურდება, რომ ბრალდებული სამ პოლიციელს თავს დაესხა. მისივე თქმით, არსებობდა მიმალვის და მოწმეებზე ზემოქმედების ფორმალური და ფაქტობრივი საფუძვლები.დაცვის მხარემ სასამართლოს 2 000-ლარიანი გირაო შესთავაზა, რაც სასამართლომ არ გაითვალისწინა.ცნობისთვის, დღეს საქართველოს პროკურატურამ მელიქიშვილის გამზირზე გამართული აქციის მიმდინარეობისას პოლიციელებზე თავდასხმის ამსახველი ვიდეო გაავრცელა.

სამართალი • 1732263660

კადრებში ჩანს, რომ ის კი არ მისდევს, არამედ პირიქით, გარბის მათგან და უბრალოდ ჯოხს იქნევს - აქციის დაკავებულის მეგობარი

"პროკურატურამ პოლიციელზე თავდასხმის ფაქტზე დაკავებულ აქციის მონაწილეს ბრალი წარუდგინა 20 წლის მათე დევიძე დიღმის მთავარ სამმართველოში ადვოკატმა რამდენიმე საათის წინ მოინახულა, თუმცა დაცვის მხარე მედიასთან კომენტარს არ აკეთებს."კურიერი" გაესაუბრა დაკავებულის მეგობრებს, რომლებიც აცხადებენ, რომ მათე დევიძე უდანაშაულოა.დაკავებულის მეგობარი: "იქ ვიყავი. ჯოხი მათეს არავისთვის არ ჩაურტყამს, უბრალოდ თავდაცვის მიზნით, როდესაც პოლიციელები გამოვიდნენ, ინსტინქტურად გაუქნია ჯოხი და მხოლოდ და მხოლოდ ეს იყო. ეს ბრალდებაც იმდენად შეთითხნილია, რომ სასაცილოდაც არ მყოფნის."დაკავებულის მეგობარი: "კადრებში ძალიან ცალსახად ჩანს, რომ ის კი არ მისდევს, არამედ პირიქით - გარბის მათგან და უბრალოდ ჯოხს იქნევს. მოლოდინი გვაქვს, რომ სასამართლო გამოიტანს დამაკმაყოფილებელ განაჩენს და გაათავისუფლებს სასამართლოდან."ცნობისთვის, გამოძიების ინფორმაციით, 19 ნოემბერს მელიქიშვილის გამზირზე გამართული აქციის დროს, ბრალდებულმა სამ პოლიციელს ხის ჯოხით დაზიანებები მიაყენა. პოლიციამ ის გუშინ დააკავა. ბრალის დამტკიცების შემთხვევაში მას 4-დან 7 წლამდე პატიმრობა ემუქრება. უწყებამ დღესვე ფაქტის ამსახველი კადრები გაავრცელა.

სამართალი • 1732259469

პროკურატურამ აქციის მიმდინარეობისას, პოლიციელებზე თავდასხმის ფაქტის ამსახველი ვიდეო გამოაქვეყნა

პროკურატურამ მელიქიშვილის გამზირზე გამართული აქციის მიმდინარეობისას, პოლიციელებზე თავდასხმის ფაქტის ამსახველი ვიდეო გამოაქვეყნა.„საქართველოს პროკურატურამ თბილისში, მელიქიშვილის გამზირზე გამართული აქციის მიმდინარეობისას, პოლიციელებზე თავდასხმის ფაქტზე ერთ პირს ბრალდება წარუდგინა.შინაგან საქმეთა სამინისტროს მიერ ჩატარებული გამოძიებით დადგინდა, რომ 19 ნოემბერს დილის საათებში, თბილისში, მელიქიშვილის გამზირზე გამართული აქციის მიმდინარეობისას, ბრალდებულმა სამ პოლიციელს ხის ჯოხით სხვადასხვა სახის დაზიანებები მიაყენა.სამართალდამცველებმა ბრალდებული 21 ნოემბერს დააკავეს. მას ბრალდება საქართველოს სისხლის სამართლის კოდექსის 353-ე პრიმა მუხლის პირველი ნაწილით (პოლიციელზე თავდასხმა, პოლიციელის სამსახურებრივ საქმიანობასთან დაკავშირებით) წარედგინა, რაც სასჯელის სახედ და ზომად 4-დან 7 წლამდე თავისუფლების აღკვეთას ითვალისწინებს.პროკურატურა ბრალდებულისთვის აღკვეთის ღონისძიების შეფარდების შუამდგომლობით, სასამართლოს კანონით დადგენილ ვადაში მიმართავს. სისხლის სამართლის საქმეზე გამოძიება გრძელდება“, - აღნიშნულია ინფორმაციაში. 

პოლიტიკა • 1732179890

გიორგი კალანდარიშვილი გენერალურ პროკურატურაში მივიდა

ცენტრალური საარჩევნო კომისიის თავმჯდომარე გიორგი კალანდარიშვილი გენერალურ პროკურატურაში მივიდა.ცესკოს თავმჯდომარე 26 ოქტომბრის არჩევნების შესაძლო გაყალბების საქმეზე გამოიკითხება, რაზეც პროკურატურამ გამოძიება ცენტრალური საარჩევნო კომისიის მიმართვის საფუძველზე დაიწყო.როგორც კალანდარიშვილმა გამოკითხვამდე ჟურნალისტებს განუცხადა, ის პროკურატურას მის ხელთარსებულ ყველა იმ ინფორმაციას მიაწვდის.„პროკურატურას ჩემს ხელთ არსებულ ყველა ინფორმაციას მივაწვდი, რომელიც გამოძიების ფარგლებში მნიშვნელოვანი იქნება. როგორც იცით, მიმდინარეობს გამოძიება და აღნიშნული გამოძიების ფარგლებში სხვადასხვა თანამშრომელი იკითხება. ვფიქრობ, ეს გამოძიება გაგრძელდება და გამოიკითხებიან სხვა პირებიც, რომლებიც მნიშვნელოვანი იქნებიან გამოძიების ეფექტიანად განხორციელებისთვის. გავაგრძელებთ საზოგადოების ინფორმირებას მათ შორის, ყველა იმ უსაფუძვლო ბრალდებასთან დაკავშირებით, რომელიც არჩევნების გაყალბებასთან და მანიპულაციასთან დაკავშირებით გაისმა. საზოგადოებას უნდა ჰქონდეს ვერიფიცირებული და ობიექტური ინფორმაცია. განსაკუთრებით იმ ინფორმაციის შესახებ, რომელიც პოსტსაარჩევნო პერიოდში ვრცელდება.დღეს არჩევნებიდან 26-ე დღეა და დღემდე არც ერთი ხელშესახები გარემოება არ გვინახავს, რომელიც იტყოდა, რომ [არჩევნების პერიოდში] სისტემურ ან არსებით დარღვევას ჰქონდა ადგილი და რომელსაც შეეძლო, მოეხდინა რაიმე გავლენა შედეგებთან დაკავშირებით“, - განაცხადა გიორგი კალანდარიშვილმა.

სამართალი • 1732178437

პროკურატურამ მოქალაქეთა კუთვნილი დიდი ოდენობით თანხების მოტყუებით დაუფლების ფაქტზე ორგანიზებული ჯგუფის 6 წევრს ბრალდება წარუდგინა

საქართველოს პროკურატურამ მოქალაქეთა კუთვნილი დიდი ოდენობით თანხების მოტყუებით დაუფლების ფაქტზე ორგანიზებული ჯგუფის 6 წევრს ბრალდება წარუდგინა.ფინანსთა სამინისტროს საგამოძიებო სამსახურის მიერ ჩატარებული გამოძიებით დადგინდა, რომ ორგანიზებული ჯგუფის წევრები ნდობაში შედიოდნენ საქართველოში და საზღვარგარეთ მყოფ მოქალაქეებთან, ატყუებდნენ, რომ თითქოსდა იყვნენ იტალიაში რეგისტრირებული ერთ-ერთი კომერციული ბანკის თანამშრომლები და არწმუნებდნენ, რომ შესაბამისი თანხის მათთვის გადაცემის შემთხვევაში, დაზარალებულები მაღალ საპროცენტო სარგებელს მიიღებდნენ.გამოძიების ამ ეტაპისთვის დადგენილია, რომ აღნიშნული ხერხით, ორგანიზებული ჯგუფის წევრები მოტყუებით დაუფლნენ 40-ზე მეტი მოქალაქის კუთვნილ, ჯამში - 620 584 ლარს.ორგანიზებული ჯგუფის 6 წევრს ბრალდება საქართველოს სისხლის სამართლის კოდექსის 180-ე მუხლის მე-3 ნაწილის „ბ“ და მე-4 ნაწილის „ა“ ქვეპუნქტებით (ორგანიზებული ჯგუფის მიერ, მართლსაწინააღმდეგო მისაკუთრების მიზნით სხვისი დიდი ოდენობით ნივთის დაუფლება მოტყუებით) წარედგინათ. სამართალდამცველებმა 5 პირი სასამართლოს განჩინების საფუძველზე დააკავა, ხოლო 1 პირს ბრალდება დაუსწრებლად წარედგინა. მათთვის წარდგენილი ბრალდება სასჯელის სახედ და ზომად 7- დან 10 - წლამდე თავისუფლების აღკვეთას ითვალისწინებს.პროკურატურის შუამდგომლობის საფუძველზე, დაკავებულებს აღკვეთის ღონისძიების სახით პატიმრობა უკვე შეეფარდათ.ფინანსთა სამინისტროს საგამოძიებო სამსახურში გამოძიება გრძელდება დანაშაულებრივი ჯგუფის სხვა წევრების გამოვლენის და მხილების მიზნით.

სამართალი • 1732164091

იყო თუ არა გაყალბების ფაქტები არჩევნებზე - გამომძიებლების შეკითხვებს დღეს ცენტრალური საარჩევნო კომისიის თავმჯდომარე უპასუხებს

იყო თუ არა გაყალბების ფაქტები არჩევნებზე - საგამოძიებო პროცედურები გრძელდება. გამომძიებლების შეკითხვებს დღეს ცენტრალური საარჩევნო კომისის თავმჯდომარე უპასუხებს. გიორგი კალანდარიშვილს საგამოძიებო უწყებაში 12 საათისთვის ელოდებიან.საქალაქო სასამართლოში მაგისტრატი მოსამართლის თანდასწრებით ოპოზიციური პარტიების ლიდერთა ნაწილი უკვე გამოიკითხა.საქმეზე გამოძიება პროკურატურამ ცესკოს მიმართვის საფუძველზე ოქტომბერის ბოლოს დაიწყო.

სამართალი • 1732107953

პროკურატურამ მარნეულში მომხდარი განზრახ მკვლელობის ფაქტზე ერთ პირს ბრალდება წარუდგინა

საქართველოს პროკურატურამ, მარნეულში მომხდარი განზრახ მკვლელობის ფაქტზე ერთ პირს ბრალდება წარუდგინა, - ინფორმაციას პროკურატურა ავრცელებს.მათივე ცნობით, სამართალდამცველებმა ბრალდებული 19 ნოემბერს დააკავეს.„საქართველოს შინაგან საქმეთა სამინისტროს მიერ ჩატარებული გამოძიებით დადგინდა, რომ 18 ნოემბერს, მარნეულში, ბრალდებულმა შურისძიების მოტივით, დაზარალებულს ბასრი საგნით სიცოცხლისთვის საშიში მძიმე ხარისხის დაზიანებები მიაყენა და შემთხვევის ადგილიდან მიიმალა. მიღებული დაზიანებების შედეგად დაზარალებული საავადმყოფოში მიყვანამდე გარდაიცვალა.სამართალდამცველებმა ბრალდებული 19 ნოემბერს დააკავეს. მას ბრალდება საქართველოს სისხლის სამართლის კოდექსის 108-ე მუხლით (განზრახ მკვლელობა) წარედგინა, რაც სასჯელის სახედ და ზომად 10-დან 15 წლამდე თავისუფლების აღკვეთას ითვალისწინებს.პროკურატურა ბრალდებულისთვის აღკვეთის ღონისძიების სახით პატიმრობის შეფარდების შუამდგომლობით სასამართლოს კანონით დადგენილ ვადაში მიმართავს.სისხლის სამართლის საქმეზე გამოძიება გრძელდება“, - აღნიშნულია გავრცელებულ ინფორმაციაში.

პოლიტიკა • 1732005460

როგორც პროკურატურას არ ვენდობი, ისე არ ვენდობი სასამართლო სისტემას - ხატია დეკანოიძე გამოკითხვაზე

საქალაქო სასამართლოში არჩევნების შესაძლო გაყალბების საქმეზე, გამოძიების ფარგლებში მაგისტრატი მოსამართლის წინაშე, ამჯერად ხატია დეკანოიძე იკითხება."ნაციონალური მოძრაობის" წევრი გამოძიებას უნდობლობას უცხადებს - ამბობს, რომ არცერთი სახელმწიფოებრივი ინსტიტუტის იმედი არ აქვს."ისევე, როგორც პროკურატურას არ ვენდობი, არ ვენდობი სასამართლო სისტემას. ეს არის ჩემი ძალიან მყარი შინაგანი რწმენა, ისევე, როგორც საქართველოს ძალიან ბევრი მოქალაქის. სასამართლომ არაერთხელ მოისმინა ის ყველაფერი, რაზეც არა მხოლოდ მე, არამედ ათასობით დამკვირვებელი საუბრობს. ძალიან ბევრ ადამიანს საკუთარი თვალით აქვს ნანახი, როგორ აყალბებდნენ არჩევნებს, როგორ იყო დარღვეული ხმის ფარულობა პრაქტიკულად ყველა უბანზე და როგორ არ ცნობს ჩვენი ქვეყნის არცერთი საერთაშორისო პარტნიორი ამ არჩევნებს", - განაცხადა ხატია დეკანოიძემ.არჩევნების შესაძლო გაყალბების საქმის გამოძიების ფარგლებში, პროკურატურამ მაგისტრატი მოსამართლის თანდასწრებით, რამდენიმე ოპოზიციონერი ლიდერი და არასამთავრობო სექტორის წარმომადგენელი უკვე დაკითხა - გამოძიება პროკურატურამ ცესკოს მიმართვის საფუძველზე დაიწყო.

პოლიტიკა • 1731937847

კახა კალაძე ევროკავშირის საბჭოს სხდომამდე გაკეთებულ განცხადებებზე: ეს არის პოლიტიკური სპეკულაციები და საქართველოს ხელისუფლებაზე გავლენას ვერ იქონიებს

უკვე მესამედ აცხადებენ, რომ საქართველოს დაფინანსებას შეუწყვეტენ. მიუხედავად ამ მუქარებისა, ჩვენ ყოველთვის გავატარებთ ქვეყნისა და ხალხის ინტერესს, - განაცხადა დედაქალაქის მერმა.მან კომენტარი გააკეთა ევროკავშირის საგარეო საქმეთა საბჭოს სხდომის დაწყებამდე ჯოზეფ ბორელის მიერ გაკეთებულ განცხადებაზე, რომ შესაძლოა, საქართველოს ხელისუფლებას შეუწყდეს დაფინანსება, კახა კალაძის თქმით, ეს არის სპეკულაციური განცხადება.„მსგავსი განცხადება არაერთხელ მოვისმინეთ და მერამდენედ შეწყვიტეს ეს დაფინანსება? უკვე მესამედ აცხადებენ ამას. გავიგეთ. მიუხედავად ამ მუქარებისა, ჩვენ ყოველთვის გავატარებთ ქვეყნისა და ხალხის ინტერესს.გვერდით რომ გადავდოთ ეს პოლიტიკური სპეკულაციური განცხადებები, რომელიც სიცრუით არის გაჟღენთილი, ყველა პარამეტრით საქართველო წინ მიდის. ნახეთ საერთაშორისო ინსტიტუტების მიერ გამოქვეყნებული კვლევები, სტატისტიკები. საქართველო არის ქვეყანა, რომელიც რეფორმებს ახორციელებს, ევროინტეგრაციის გზაზე აქვს წინგადადგმული ნაბიჯები. ჩვენ ამაზე გაჩერებას არ ვაპირებთ. გავაკეთებთ ყველაფერს, რომ რაც შეიძლება მალე გავხდეთ ევროკავშირის წევრი ქვეყანა“ - აღნიშნა კახა კალაძემ.რაც შეეხება, ასევე, სხდომამდე გაკეთებულ განცხადებებს, რომ არჩევნების სავარაუდო გაყალბების ფაქტებზე გამოძიება საერთაშორისო გამოცდილების გამოყენებით ჩატარდეს, თბილისის მერის თქმით, გამოძიება დაწყებულია, თუმცა, გაყალბების ფაქტები ამ დრომდე არავის წარმოუდგენია.„ცესკო-მ მიმართა გენერალურ პროკურატურას სავარაუდო გაყალბების ფაქტებთან დაკავშირებით. არჩევნების დღიდან მოყოლებული, ოპოზიციამ რაც გაიგო, რომ პირწმინდად დამარცხდნენ, დაიწყეს საუბარი გაყალბებაზე. გვეუბნებოდნენ უამრავი ფაქტი არსებობსო. თუმცა, დღემდე არავის წარმოუდგენია მტკიცებულება. პროკურატურამ კონკრეტული ადამიანებიც დაიბარა და რეალურად ფაქტები არ წარმოუდგენიათ. ეს არის პოლიტიკური სპეკულაციები და საქართველოს ხელისუფლებაზე გავლენას ვერ იქონიებს. ქვეყნის მოსახლეობის უმრავლესობამ დაგვიჭირა მხარი, აირჩია მშვიდობა და ეკონომიკური განვითარება“, - განაცხადა კახა კალაძემ.ასევე, დედაქალაქის მერმა კიდევ ერთხელ გააკეთა კომენტარი იმ წერილზე, რომელიც ოთხმა პოლიტიკურმა პარტიამ ევროკავშირს გაუგზავნა. მისი თქმით, მათი მცდელობა ქვეყანაში დესტაბილიზაციის მოწყობაა.„ოპოზიცია ჩვეულებრივ მავნებლობას აგრძელებს. წერილი ფარულად გაგზავნეს, თუმცა, ჩვენ მოგვაწოდეს შინაარსი, რომელსაც ოთხი რადიკალური პარტია აწერს ხელს. ჩვენ არაერთხელ გვითქვამს, რომ ეს ადამიანები ყველაფერს აკეთებენ, როგორმე სახელმწიფო და ხალხი დააზიანონ. გვახსოვს მსგავსი არაერთი ქმედება მათი მხრიდან, თუნდაც ვიზა-ლიბერალიზაციის პროცესის შეჩერებას რომ ცდილობდნენ, ასევე, იმავეს აკეთებდნენ კანდიდატის სტატუსზე, ასოცირების ხელშეკრულებაზე. ისინი არიან ჩვეულებრივი მოღალატეები. აგენტურას რა უნდა მოსთხოვო? ეს ადამიანები ემსახურებიან გარე ძალებს და მათ ინტერესებს. იმ განცხადებიდან გამომდინარე, მათი მთავარი მცდელობაა, მოაწყონ ქვეყანაში დესტაბილიზაცია და არეულობა. ყველა მინდა დავარწმუნო, რომ ჩვენ გვექნება მშვიდობა“, - აღნიშნა თბილისის მერმა.

პოლიტიკა • 1731649439

მტკნარი სიცრუეა ოპოზიციის განცხადებები და ნარატივები, რომელიც ხან ფლომასტერს, ხან გაჟონილ მელანს და ხან აპარატს აბრალებს ხოლმე არჩევნებში თავის მარცხს - არჩილ გორდულაძე

გამოძიების ინტერესებია და კანონიც ავალდებულებს პროკურატურას, რომ სრულად გამოიძიოს საქმე, რომელიც ეხება არჩევნებს, - განაცხადა საპარლამენტო ფრაქცია „ქართული ოცნების“ თავმჯდომარის პირველმა მოადგილე არჩილ გორდულაძემ.„პროცედურების დაცვით სრულად მოხდება ამ აპარატების შესწავლა და კიდევ ერთხელ დადასტურდება, რომ არავითარი პრობლემა არც აპარატებთან დაკავშირებით და არც ხმის მიცემის პროცედურასთან არ არსებობდა და მტკნარი სიცრუეა ოპოზიციის განცხადებები და ნარატივები, რომლებიც ხან ფლომასტერს, ხან გაჟონილ მელანს და ხან აპარატს აბრალებენ ხოლმე არჩევნებში თავიანთ მარცხს“, - აღნიშნა გორდულაძემ.პროკურატურამ გამოძიების ფარგლებში, სხვა საგამოძიებო მოქმედებებთან ერთად, ცენტრალური საარჩევნო კომისიის ადმინისტრაციულ შენობაში საპარლამენტო არჩევნებში გამოყენებული ვერიფიკაციის აპარატები დალუქა.

პოლიტიკა • 1731589353

საუბარი იყო იმაზე, რომ თუ ვერ გაიმარჯვა იმ გუნდმა, რომელსაც მხარს უჭერდა რამდენიმე ევროპარლამენტარი, ე.ი. არჩევნები ცუდად ჩატარდა - კახა კალაძე

„ჩვენ მოვისმინეთ განცხადებები, რომლებიც გაჯერებული იყო სიცრუით, ტყუილით, თუმცა ამასთანავე, იყო განცხადებები, რომელიც შეეფერებოდა რეალობას“, - ასე გამოეხმაურა თბილისის მერი კახა კალაძე ჟურნალისტებთან საუბრისას ევროპარლამენტში საქართველოს შესახებ გუშინ გამართულ დებატებს.„ჩვენ მოვისმინეთ განცხადებები, რომლებიც გაჯერებული იყო სიცრუით, ტყუილით, თუმცა ამასთანავე, იყო განცხადებები, რომელიც შეეფერებოდა რეალობას. საუბარი იყო იმაზე, რომ თუ ვერ გაიმარჯვა იმ გუნდმა, რომელსაც მხარს უჭერდა რამდენიმე ევროპარლამენტარი, მაშინ ესე იგი არჩევნები არასწორად და ცუდად იყო ჩატარებული. პირდაპირ თეთრზე გვიმტკიცებენ, რომ შავია. მთელი ამ ხნის განმავლობაში საუბარი მიდის, თითქოს არჩევნები გაყალბდა, თუმცა არანაირი კონკრეტული ფაქტი არ არსებობს ამასთან დაკავშირებით, მხოლოდ სიცრუით გაჯერებულ განცხადებებს ვისმენთ“, - განაცხადა კახა კალაძემ.ამასთან, რაც შეეხება არჩევნების გამოძიების მოთხოვნას, მისი თქმით, პროკურატურამ დაიბარა ყველა ის ადამიანი, რომელიც აცხადებდა, რომ გაყალბების მტკიცებულებებს ფლობდა, თუმცა რეალობა სხვაგვარი აღმოჩნდა.„არ აქვთ არანაირი არგუმენტი არჩევნების სავარაუდო გაყალბებასთან დაკავშირებით. ამდენი ხანია, ვისმენთ განცხადებებს როგორც ქვეყნის შიგნით, ისე გარედან. იყო მოწოდებები იმასთან დაკავშირებით, რომ თუ ვინმეს  მტკიცებულება, რაიმე ფაქტი გააჩნია, ითანამშრომლოს საგამოძიებო უწყებებთან. ცენტრალურმა სარჩევნო კომისიამ მიმართა პროკურატურას, დაწყებულია გამოძიება, დაბარებული იყვნენ კონკრეტულად ის ადამიანები, ვინც საუბრობდნენ გაყალბებასთან დაკავშირებით, რომ თითქოს ჰქონდათ უამრავი ფაქტი. რეალურად კი აღმოჩნდა, რომ არაფერი გააჩნიათ. ეს არის დღევანდელი მოცემულობა. შესაბამისად, ის განცხადებები, რასაც ვისმენთ, დაფუძნებულია ამ სიცრუესა და ტყუილზე“, - განაცხადა კახა კალაძემ.

პოლიტიკა • 1731565295

მტკიცებულებების შეგროვება არის პროკურატურის ამოცანა. ჩვენ მივუთითეთ იმ ინფორმაციაზე, რომელიც საჯაროდ არის გავრცელებული - ბადრი ჯაფარიძე მაგისტრი მოსამართლის თანდასწრებით დაკითხვის შემდეგ

მტკიცებულებების შეგროვება არის პროკურატურის ამოცანა. ჩვენ მივუთითეთ იმ ინფორმაციაზე, რომელიც საჯაროდ არის გავრცელებული, - განაცხადა „ლელოს“ ერთ-ერთმა ლიდერმა ბადრი ჯაფარიძემ, თბილისის საქალაქო სასამართლოს დატოვების შემდეგ, სადაც ის არჩევნების შესაძლო გაყალბების საქმეზე გამოძიების ფარგლებში, მაგისტრი მოსამართლის თანდასწრებით დაკითხეს.არჩევნებთან დაკავშირებით ოპოზიციის მიერ გამოთქმული ბრალდებების მიუხედავად, ბადრი ჯაფარიძემ თავად აღნიშნა, რომ მან გამოძიებას მიაწოდა ის ინფორმაცია, რომელიც ისედაც საჯაროა.პროკურატურა არჩევნების გაყალბების შესახებ ბრალდებებს იკვლევს, გრძელდება გამოკითხვებიც. პროკურორები კონკრეტულ ფაქტებს ითხოვენ, თუმცა, როგორც ამბობენ, ვერცერთმა დაკითხულმა პირმა მტკიცებულებები ჯერ ვერ წარმოადგინა.ცნობისთვის, პროკურატურამ მაგისტრი მოსამართლის თანდასწრებით რამდენიმე ოპოზიციონერი ლიდერი და არასამთავრობო სექტორის წარმომადგენელი დაკითხა, მათ შორის არიან: ზურაბ გირჩი ჯაფარიძე, მამუკა ხაზარაძე, ნათია მეზვრიშვილი, საბა ბუაძე, თენგო თევზაძე, ლონდა თოლორაია.