პოლიტიკა • 1769249752

დავით მათიკაშვილი სააკაშვილის განცხადებაზე: ნაცვლად იმისა, რომ მოინანიოს  საკუთარი და მისი სისტემის მიერ ჩადენილი დანაშაულები, ის ეცადა კვლავ  თავის გამართლებას, ისევ ტყუილებით და უსინდისობით ცდილობს საზოგადოებას თვალებში ნაცარი შეაყაროს

მიხეილ სააკაშვილს და მის სადისტურ რეჟიმს ხელები აქვს გასვრილი ქართველი ხალხის სისხლში.  ჩვენ გვახსოვს მოკლული ახალგაზრდები თბილისის ქუჩებში და არა მხოლოდ. ჩვენ გვახსოვს მიტაცებული ბიზნესი, ჩვენ გვახსოვს წამება, რომელსაც სისტემური ხასიათი ჰქონდა 2012 წლამდე საქართველოს ციხეებში. ჩვენ  გვახსოვს ოკუპანტისთვის გადაცემული ტერიტორიები, - განაცხადა პარლამენტის საპროცედურო საკითხთა კომიტეტის თავმჯდომარემ, დავით მათიკაშვილმა მიხეილ სააკაშვილის მიერ გავრცელებულ განცხადებასთან დაკავშირებით, რომელიც  ინგა გრიგოლიას მიერ მის გადაცემაში ნათქვამ ფრაზას მოჰყვა -  „მიხეილ სააკაშვილის რეჟიმის დროს ირღვეოდა ადამიანის უფლებები“.მათიკაშვილის განცხადებით, ყველას კარგად ახსოვს მიხეილ სააკაშვილის და მისი სისტემის მიერ მოკლული და ნაწამები ახალგაზრდები, ნაცვლად იმისა, რომ მან მოინანიოს ჩადენილი დანაშაულები ის კვლავ ნაცარს აყრის საზოგადოებას თვალებში.„დანაშაულების კასკადი, რომლებიც მიხეილ სააკაშვილმა საკუთარ ხალხს, ერს, თავზე დაატეხა და დღეს ჩვენ ვხედავთ, რომ მისთვის სინდისს არანაირი ღირებულება არ გააჩნია. ის წარმოადგენს ჩვეულებრივ დამნაშავე, კრიმინალს, რომელსაც საკუთარი ერის სისხლში აქვს ხელები გასვრილი და დღეს ცდილობს თავი გაიმართოს არა და ყველა ძალიან კარგად გვახსოვს მოკლული ახალგაზრდები, მოკლული ვაზაგაშვილი, ნაწამები მოლაშვილი და რომელი ერთი ჩამოვთვალო. რამდენი ათეულობით და ასეულობით მოკლული ახალგაზრდა და წამება, რომლზეც ევროპის ადამიანის უფლებათა ევროპულმა სასამართლომ სტრასბურგში თქვა რომ ის გაოგნებას ვერ მალავდა იმდენად სისტემური ხასიათი ჰქონდა 2012 წლამდე წამებას და ამავდროულად მიხეილ სააკაშვილი დემოკრატიის შუქურად იყო აღიარებული დასავლეთში. ეს არის ცინიზმი და დაცინვა ქართველი ხალხის, რაც მიხეილ სააკაშვილმა კიდევ ერთხელ იკადრა და ამდენი დანაშაულის ჩადენის შემდეგ, ნაცვლად იმისა, რომ მოინანიოს, საზოგადოებას ბოდიში მოუხადოს, გაიხსენოს ყველაფერი მის მიერ ჩადენილი დანაშაულები და მისი სისტემის მიერ დანგრეული და აოხრებული ეს ქვეყანა, ის ნაცვლად ამისა ეცადა კვლავ საკუთარი თავის გამართლებას ისევ ტყუილებით და უსინდისობით ცდილობს საზოგადოებას თვალებში ნაცარი შეაყაროს.“-განაცხადა დავით მათიკაშვილმა.ცნობისთვის, მიხეილ სააკაშვილმა გამოაქვეყნა პოსტი, სადაც ის საუბრობს ვაზაგაშვილზე და აცხადებს, რომ “მოდით ჩამოვთვალოთ რა კატეგორიის ადამიანის "უფლებები" დაირღვა: ვაზაგაშვილის უფლება დაირღვა და მის მიერ მოკლული ხალხის არა?”.

პოლიტიკა • 1768326569

თამარ ჩერგოლეიშვილი ტრამპის რიტორიკაზე გრენლანდიის მიმართ: არა, ნამდვილად არ მომწონს რა ფორმითაც აკეთებს ამ ყველაფერს

ტრამპის რიტორიკასთან დაკავშირებით, კომენტარს არ გავაკეთებ გამომდინარე იქიდან, რომ არაერთხელ გამიკეთებია და მისი რიტორიკა და ქმედებები სრულიად განსხვავდება ერთმანეთისგან და არა, ნამდვილად არ მომწონს რა ფორმითაც აკეთებს ამ ყველაფერს, - ამის შესახებ "ფედერალისტების" ლიდერმა, თამარ ჩერგოლეიშვილმა, აშშ-ის პრეზიდენტ დონალდ ტრამპის მიერ გრენლანდიასთან დაკავშირებით ბოლოდროინდელი რიტორიკის შესახებ დასმული კითხვის საპასუხოდ განაცხადა.ჩერგოლეიშვილი აცხადებს, რომ მართალია, ეს რიტორიკა დანიას რთულ ვითარებაში აყენებს, თუმცა, მნიშვნელოვანია, რომ ამერიკამ შეინარჩუნოს გრენლანდია და არ ჩაუგდოს ის ხელში რუსეთს და ჩინეთს, ვინაიდან, ეს ნებისმიერ ომში აშშ-ს უდიდესი უპირატესობის გარანტია."მე მგონია, რომ მოგვარდება ეგ, ანუ, არ მოხდება არანაირი შეჭრა და არანაირი გადმოჭრა. მისი რიტორიკა და მისი ქმედებები სრულიად განსხვავდება ერთმანეთისგან. ანუ, ეგრე ლაპარაკობს, მაგრამ, მერე სხვა რამეს აკეთებს, ამიტომ, მის რიტორიკაზე კომენტარების კეთება არის კურდღლის სორო, იმიტომ, რომ ერთ წუთში შეიძლება ერთი თქვას, მეორე წუთში - მეორე თქვას, უნდა უყურო მის ქმედებებს და ქმედებები ძალიან თანმიმდევრული აქვს. დემოკრატიული ქვეყნები ერთმანეთში არ ომობენ და აქედან გამომდინარე, არ მგონია, რომ რაიმე სამხედრო ინტერვენციას აქვს ადგილი, ყოველ შემთხვევაში, მე ძალიან არ მინდა და კატასტროფა იქნება ჩემი აზრით ნატოს წევრ ქვეყნებს შორის რომ ასეთი რამ მოხდეს. მაგრამ, თითქმის გამორციხული მგონია რამე მსგავსი რომ მოხდეს.დანიაც და ამერიკაც ნატოში იმიტომ არიან, რომ ევროპა დაცული იყოს ამერიკის ძალით. ამერიკა უზრუნველყოფს უსაფრთხოებას ნატოს წევრი ქვეყნებისთვის. მთელი ამ ხნის განმავლობაში ეს იყო თემა, რომ შეიარაღებაზე საკმარისს არ ხარჯავენ და ა.შ., თავიდან ბოლომდე ამერიკის იმედად არიან - ეს არის ტრამპის რიტორიკაც. გასაგებია, რომ ეს რიტორიკა დანიის მთავრობას რთულ მდგომარეობაში აგდებს და ჯობია, სხვანაირად მოხდეს. უბრალოდ, ვიცი, რომ ძალიან მნიშვნელოვანია, ამერიკამ გრენლანდიაზე შეინარჩუნოს ის ბაზა და შეაკავოს ჩინეთი და რუსეთი იქ შესვლისგან, იმიტომ, რომ გრენლანდიაზე ამერიკის კოსმოსურ სადგურს აქვს უნარი, უდიდესი უპირატესობა მიანიჭოს ამერიკას ნებისმიერ ომში. წიაღისეულიც მნიშვნელოვანია ტრამპისთვის, არა იმიტომ, რომ მაინცდამაინც თვითონ უნდა, არამედ, იმიტომ, რომ არ უნდა, რომ ჩინეთმა წაიღოს და ეს ძალიან დიდ უპირატესობას მისცემს ჩინეთს სამხედრო წარმოებაში." - აღნიშნა ჩერგოლეიშვილმა.მისივე თქმით, ვისაც თავისუფალი სამყაროს ძალა აინტერესებს, ყველას ინტერესებშია ამერიკის მიერ გრენლანდიაზე კონტროლი, მათ შორის არიან დანიელებიც, ვინაიდან, სხვა შემთხვევაში, "ნატოს წევრი და ამერიკის ქოლგის ქვეშ" არ იქნებოდნენ. "ვისაც თავისუფალი სამყაროს ძალა გვაინტერესებს და პრიმატი გვაინტერესებს, უნდა იყოს ყველას ინტერესებში ის, რომ ამერიკამ შეინარჩუნოს [გრენლანდიაზე გავლენა]. რა გირჩევნიათ თქვენ, უპირატესობა ამერიკას ჰქონდეს თუ ჩინეთს? როგორც ქართველებს, მგონი ეჭვი არ უნდა გვეპარებოდეს, რომ ჯობია, რომ ამერიკას ჰქონდეს. რაც შეეხება დანიას, დანიელებსაც ეგ ურჩევნიათ, ხომ, ცხადია? აბა, ნატოს წევრი რატომ იქნებიან და ამერიკის ქოლგის ქვეშ რატომ იქნებიან. ეგ არის და ეგ და არა, რასაკვრირველია, ამერიკა ოკუპანტი არ არის." - განაცხადა თამარ ჩერგოლეიშვილმა. 

პოლიტიკა • 1765996181

ანა წითლიძე რეზოლუციაზე, რომელსაც ნაცმოძრაობამ ხელი მოაწერა და რომელშიც ეწერა, რომ ომი საქართველომ დაიწყო - ეს იყო საქართველოსთვის ძალიან მნიშვნელოვანი რეზოლუცია

„ნაციონალური მოძრაობის“ წევრმა, ანა წითლიძემ გადაცემაში „ღამის კურიერი“ 2008 წლის აგვისტოს ომის შემდეგ ევროსაბჭოს მიერ მიღებულ რეზოლუციასთან დაკავშირებით ისაუბრა.მან აღნიშნა, რომ მიღებული რეზოლუცია საქართველოსთვის ძალიან მნიშვნელოვანი იყო.„ეს რეზოლუცია, რეალურად, საქართველოსთვის ძალიან მნიშვნელოვანი დოკუმენტი იყო. ეს იყო პირველი საერთაშორისო დოკუმენტი, სადაც რუსეთი აღიარებული იქნა, როგორც ოკუპანტი და არა როგორც მშვიდობის მყოფელი და სხვათა შორის, იქვე, ამ რეზოლუციის მიღების დროს, რუსები ამ რეზოლუციის მიღებას აპროტესტებდნენ და წინააღმდეგი იყვნენ“ - განაცხადა ანა წითლიძემ.      

პოლიტიკა • 1765794617

დავით მათიკაშვილი: 2008 წლის ომი ახალი დასრულებული იყო, როდესაც სააკაშვილის რეჟიმმა - მაშინდელმა ხელისუფლებამ რუსეთს გადასცა ქვეყნის ყველა სტრატეგიული ენერგო ობიექტი

დავით მათიკაშვილი: 2008 წლის ომი ახალი დასრულებული იყო, როდესაც სააკაშვილის რეჟიმმა - მაშინდელმა ხელისუფლებამ რუსეთს გადასცა ქვეყნის ყველა სტრატეგიული ენერგო ობიექტი, - ასე გამოეხმაურა საპროცედურო საკითხთა და წესების საპარლამენტო კომიტეტის თავმჯდომარე დავით მათიკაშვილი „ქრონიკასთან“ ლევან მაჭავარიანის მიერ გამოქვეყნებულ ვიდეოს.„2008 წლის ომი ახალი დასრულებული იყო, როდესაც სააკაშვილის რეჟიმმა - მაშინდელმა ხელისუფლებამ რუსეთს გადასცა ქვეყნის ყველა სტრატეგიული ენერგო ობიექტი. დღეს როდესაც საქართველო მშვიდობის პოლიტიკით აღწევს იმას, რომ ქვეყნის ეკონომიკური განვითარება მაღალ საფეხურზეა, ვხედავთ, ოკუპანტის საქმის მკეთებელი ადამიანები როგორ იშვერენ „ქართული ოცნებისკენ“ თითს. ეს არ გამოუვათ“, - აღნიშნა მათიკაშვილმა.ვისაც დაგაჯერეს, რომ ნაცი „პროდასავლელია“ - ამ სათაურით ფრაქცია „ქართული ოცნების“ თავმჯდომარის მოადგილე ლევან მაჭავარიანი ვიდეო-კოლაჟს აქვეყნებს, სადაც ასახულია „ნაციონალური მოძრაობის“ ლიდერებისა და წევრების კავშირები და ინტერესები რუსეთთან.

პოლიტიკა • 1765541288

ირაკლი ქადაგიშვილი: პრემიერმა თქვა, რომ ოკუპაციის მიუხედავად, ჩვენი ქვეყნის განვითარების ხვალინდელი დღე მშვიდობა და თანამშრომლობაა, ეს გზავნილი ითქვა იმ დარბაზში, სადაც ოკუპანტი ქვეყნის ლიდერი იჯდა

ჩვენი ქვეყნის პრემიერ-მინისტრი კონფერენციაზე თურქმენეთის ხელისუფალის მიერ არის მიწვეული, სადაც უამრავი ქვეყნის ლიდერია წარმოდგენილი, ჩვენ ჩვენი ეროვნული ინტერესი გაგვაჩნია, რომელიც პრემიერ-მინისტრის მხრიდან მკაფიოდ იყო გაჟღერებული, – ამის შესახებ პარლამენტის რეგიონული პოლიტიკისა და თვითმმართველობის კომიტეტის თავმჯდომარემ, ირაკლი ქადაგიშვილმა განაცხადა.მისი თქმით, პრემიერმა თქვა, რომ ოკუპაციის მიუხედავად, ჩვენი ქვეყნის განვითარების ხვალინდელი დღე მშვიდობა და თანამშრომლობაა, ეს გზავნილი ითქვა იმ დარბაზში, სადაც ოკუპანტი ქვეყნის ლიდერი იჯდა.„მოდით, საკითხს უფრო სერიოზულად მოვუგდეთ და არა, პროპაგანდისტულად. პრემიერ-მინისტრი საერთაშორისო ფორუმზე იმყოფება, რომელსაც საგარეო პოლიტიკის საკითხებში ევროკავშირის უმაღლესი წარმომადგენელი მიესალმა და მან თურქმენეთის ნეიტრალიტეტის 30 წლისთავთან დაკავშირებით განაცხადა, რომ თურქმენეთი მაგალითია იმის, რომ მისი დამოკიდებულება, მისი ნეიტრალიტეტი და მისი საშუალება, რომ სხვადასხვა მიზნებისთვის შეკრიბოს ეკონომიკური და მშვიდობის ფორუმი, მისასალმებელია. ბუნებრივია, პრემიერი სწორედ ამ ფორუმში მონაწილეობს. იგი მიწვეულია თურქმენეთის ხელისუფალის მიერ და იქ უამრავი ქვეყნის ლიდერია წარმოდგენილი. ჩვენ ჩვენი ეროვნული ინტერესი გაგვაჩნია, რომელიც პრემიერ-მინისტრის მხრიდან მკაფიოდ იყო გაჟღერებული. აღნიშნა ოკუპაცია და თქვა, რომ ოკუპაციის მიუხედავად, ჩვენი ქვეყნის განვითარების ხვალინდელი დღე მშვიდობა და თანამშრომლობაა. კარგია, რომ ეს გზავნილი ითქვა იმ დარბაზში, სადაც ოკუპანტი ქვეყნის ლიდერი იჯდა. „ფეისბუქში“ ჭორაობა – პრემიერმა რუსეთი თუ ახსენა, ვიღაცისთვის გულის მოსაფხანი ან გამაღიზიანებელი ფაქტორია. პრემიერმა საერთაშორისო არენაზე თქვა ის, რაც საქართველოსთვის მნიშვენლოვანია. ხაზი გაუსვა ოკუპაციის საკითხსაც“, – განაცხადა ირაკლი ქადაგიშვილმა.

პოლიტიკა • 1765534437

გია ვოლსკი: აშხაბადის შეხვედრა საგანგებო მნიშვნელობისაა, ყველამ იცის, ვინ არის ოკუპანტი, თავის მართლება საჭირო არ არის

აშხაბადის შეხვედრა საგანგებო მნიშვნელობისაა, ყველამ იცის, ვინ არის ოკუპანტი, საქართველო ერთადერთი ქვეყანაა, რომელსაც რუსეთთან დიპლომატიური ურთიერთობა არ აქვს, თავის მართლება საჭირო არ არის, ზუსტად ამიტომ არის პრემიერ-მინისტრი წასული, სადაც საქართველოს ხვალინდელი დღე წყდება და იგეგმება, – ამის შესახებ პარლამენტის პირველმა ვიცე-სპიკერმა, გია ვოლსკიმ განაცხადა.მისი თქმით, ფორუმში ვლადიმერ პუტინი თუ მონაწილეობს, ეს იმას არ ნიშნავს, რომ პრემიერ-მინისტრი არ უნდა შეხვდეს აზერბაიჯანის პრემიერ-მინისტრს.„პრეტენზიები თუ გვაქვს თურქმენეთთან ან მართვის სტილთან, ეს იმას არ ნიშნავს, რომ ჩვენი ინტერესებით არ უნდა ვიხელმძღვანელოთ, როდესაც ამის მაგალითებს ვხედავთ. ჩვენ თუ  ჩინეთთან ვთანამშრომლობთ, ეს იმას არ ნიშნავს, რომ ევროპის კრიტიკას ავყვეთ, როდესაც თავად ჩადიან ჩინეთში და უშველებელ ხელშეკრულებებს დებენ. სამწუხაროა, ჩვენი ტერიტორიები ოკუპირებულია და ოკუპანტი ვინც არის, ყველამ კარგად იცის. ყველა რეზოლუცია, მათ შორის ბოლო რეზოლუცია, რომელიც გაერო-ში გავიდა, ჩვენი ხელმოწერით გავიდა. მართალია, უკრაინასთან დაკავშირებით იყო, მაგრამ ჩვენ არ შეგვიცვლია პოზიციები. თქვენ თუ გინდათ, მაინც და მაინც შეხვედრაზე, სადაც არის უშველებელ გლობალურ საკითხებთან დაკავშირებით საუბარი, პრემიერ-მინისტრი გამოვიდეს და იგივე იძახოს რასაც ზოგიერთი აკაცუკი ქუჩაში იძახის, ასეთი რამეები არ ხდება. ამ დონის შეხვედრებზე ასეთი რამეები არ ხდება. თქვენ თუ გგონიათ შეხვედრების, ფორუმების გარეშე საქართველოს შეიძლება, რაღაც პერსპექტივა ჰქონდეს მომავალში, არათუ ძალიან ცდებით, არამედ ვფიქრობ, მაინც პროპაგანდისტული ინტერესები გაგაჩნიათ და მეტი არაფერი“, – განაცხადა გია ვოლსკიმ.

პოლიტიკა • 1765526930

შალვა პაპუაშვილი: არანაირი შეხვედრა ირაკლი კობახიძესა და ვლადიმერ პუტინს შორის გათვალისწინებული არ არის

საქართველოს პრემიერ-მინისტრი იმყოფება თურქმენეთის პრეზიდენტის მიწვევით თურქმენეთში ფორუმზე, რომელიც მშვიდობის საკითხებს ეძღვნება. ფორუმის მონაწილეებს განსაზღვრავს თავად მასპინძელი, - განუცხადა პარლამენტის თავმჯდომარემ შალვა პაპუაშვილმა მედიას.ჟურნალისტმა მას კითხვა დაუსვა იმასთან დაკავშირებით, რატომ არ აარიდა ოკუპანტი ქვეყნის პრეზიდენტთან საერთო ფოტოს გადაღებას ირაკლი კობახიძემ თურქმენეთში ფორუმზე, სადაც ვლადიმერ პუტინიც იმყოფება.„საქართველოს პრემიერ-მინისტრი იმყოფება თურქმენეთის პრეზიდენტის მიწვევით თურქმენეთში ფორუმზე, რომელიც მშვიდობის საკითხებს ეძღვნება. ფორუმის მონაწილეებს განსაზღვრავს თავად მასპინძელი. საქართველოს პრემიერი იქ იმყოფება და წარმოადგენს საქართველოს. საქართველოს ხელისუფლებამ ერთი რამე დაამტკიცა განსაკუთრებით ბოლო წლების განმავლობაში, ჩვენ ვმოქმედებთ მხოლოდ ქართველი ხალხის ინტერესებით. ვინც მზად არის პატივი სცეს ჩვენი ხალხის ეროვნულ ინტერესებს, მზად ვართ ვესაუბროთ ყველას. ქართველი ხალხის ინტერესი არის ორი - ჩვენი ქვეყნის გამთლიანება და ჩვენი ხალხის კეთილდღეობის ზრდა. ვინც პატივს სცემს ამ ინტერესებს, მათ ვესაუბრებით, ვინც არ სცემს, არ ვესაუბრებით.რუსეთის მხრიდან ქართველი ხალხის ეროვნული ინტერესების პატივისცემა გულისხმობს ოკუპაციის დასრულებას, შესაბამისად არ ვსაუბრობთ. შეიძლება ვერ ატყობთ, მაგრამ დიპლომატიური ურთიერთობაც არ გვაქვს რუსეთის ფედერაციასთან. ერთადერთი - ჟენევის ფორმატია, სადაც გვაქვს შესაძლებლობა ჰუმანიტარული მიზნებიდან გამომდინარე გვქონდეს კონტაქტი, ვინაიდან მათ აქვთ ეფექტური კონტროლი ოკუპირებულ ტერიტორიაზე, ახორციელებენ ამ ტერიტორიების ოკუპაციას“, - აღნიშნა პაპუაშვილმა.ჟურნალისტი ჩაეკითხა, ისაუბრებენ თუ არა კობახიძე და პუტინი.„არანაირი შეხვედრა გათვალისწინებული არ არის“, - აღნიშნა პაპუაშვილმა.

პოლიტიკა • 1765169507

ნანა კაკაბაძე: ხომ ხედავთ, რომ ყოველ ჯერზე თქვენი მოკლეფეხება ტყუილები მალევე მჟღავნდება და რაც არ უნდა იძახოთ, რომ არჩევნები გაყალბდა, რომ ქიმიური ნივთიერებებით მოგწამლათ ხელისუფლებამ და ა.შ. სიმართლე მაინც ყოველთვის იჩენს თავს

 იმის ნაცვლად, რომ სარკეში ჩაიხედოთ, მომხრეთა რიცხვი გაზარდოთ და მომავალი არჩევნებისთვის მოემზადოთ, რატომ იტყუებთ თავს და სხვებსაც ატყუებთ, რომ რადგან უმრავლესობას ვერ მივიმხრობთ, ამიტომ ჩვენი ევროპელი მეგობრების დახმარებით დღე-დღეზე ძალადობრივად დავამხობთ მთავრობას და ისე მოვალთ ხელისუფლებაშიო?, - წერს არასამთავრობო ორგანიზაცია „მოძრაობა ნეიტრალიტეტის“ დამფუძნებელი ნანა კაკაბაძე სოციალურ ქსელში.ნანა კაკაბაძე ვრცელ პოსტში მიმოიხილავს აშშ-ს ეროვნული უსაფრთხოების ახალი სტრატეგიას და ამ კონტექსტში რადიკალური ოპოზიციის წარმომადგენლების მისამართით კონკრეტულ კითხვებს სვამს.„შეკითხვა აკაცუკებს: ტრამპი რუსეთის აგენტია?რამდენიმე დღის წინ გამოქვეყნდა აშშ-ს ეროვნული უსაფრთხოების ახალი სტრატეგია, რომელიც რადიკალურად განსხვავდება ჯო ბაიდენის ადმინისტრაციის მიერ 2022 წელს გამოქვეყნებული სტრატეგიისგან. ახლო აღმოსავლეთზე მსჯელობისას, ახალი სტრატეგია მწვავედ კრიტიკულია ევროპელი მოკავშირეების მიმართ და ნათქვამია, რომ ევროპა „ცივილიზაციური ეროზიის“ რისკის წინაშეა. ტრამპის ადმინისტრაცია წინააღმდეგობაშია ევროპულ მთავრობებთან, რომლებსაც „უკრაინის ომთან დაკავშირებით არარეალისტური მოლოდინები აქვთ“. ამასთან, ევროპის ქვეყნების ლიდერები დოკუმენტში დახასიათებულნი არიან როგორც „უმცირესობის, არასტაბილური მთავრობები“.„ფართო ევროპულ უმრავლესობას მშვიდობა სურს, თუმცა მათი სურვილი არ ითარგმნება პოლიტიკაში, დიდწილად ამ მთავრობების მიერ ძირგამოთხრილი დემოკრატიული პროცესის გამო“ - ნათქვამია დოკუმენტში.ამასთან, დაგმობილია ევროპული მთავრობების მხრიდან განხორციელებული პოლიტიკური დევნა „ევროპის იმ პატრიოტული პარტიების მიმართ, რომელთა მხარდაჭერაც ბოლო წლებში მკვეთრად გაიზარდა“.ბაიდენის სტრატეგიისგან განსხვავებით, რომელშიც საუბარი იყო რუსეთის მიერ წამოწყებულ „არაპროვოცირებულ ომზე“ და მისი შეკავება ეროვნული უსაფრთხოების პრიორიტეტად იყო დასახული, წლევანდელ ვერსიაში საუბარია მხოლოდ „უკრაინის ომზე“. ამასთან, ფაქტობრივად არის მოწოდება ევროპელებისადმი, რომ მათ აღადგინონ ნორმალური ურთიერთობები რუსეთთან.დოკუმენტის ყველაზე მნიშვნელოვანი სიახლეა ნატოს შესახებ ჩანაწერი, რომ მხარს უჭერს ნატოს გაფართოების შეწყვეტას, რასაც რუსეთი ბოლო 25 წელია მოითხოვს. ახალი სტრატეგიის მიხედვით, აშშ-მ უნდა შეწყვიტოს დემოკრატიის წახალისება და თავისი პოლიტიკური სისტემის თავს მოხვევა რეგიონული პარტნიორებისთვის და ნაკლები აქცენტი გააკეთოს ამ ქვეყნების შიგნით ადამიანის უფლებების დარღვევებზე. „ეს უნდა იყოს მშვიდობის, მეგობრობისა და ინვესტიციის ადგილი“ - ნათქვამია დოკუმენტში.მართალია, საქართველო არ მოიაზრება გეოგრაფიულად ახლო აღმოსავლეთში, მაგრამ რატომ ხართ წინააღმდეგი, რომ ჩვენი ქვეყანაც იყოს „მშვიდობის, მეგობრობისა და ინვესტიციის ადგილი“? როგორ დავიჯეროთ, რომ თქვენ მართლა ადამიანის უფლებები გაწუხებთ და არა სხვა ანგარებიანი წუხილები (გულუბრყვილო გამონაკლისებს არ ვგულისხმობ), როდესაც იმ ხალხის გვერდით დგახართ, ვინც ამ უფლებების დარღვევები სისტემად აქცია ხელისუფლებაში ყოფნის დროს?ვიცით, რომ რუსეთი ოკუპანტია, ვიცით, რომ მას თვალი უჭირავს ჩვენი და სხვა მეზობლების გადაყლაპვაზე, ისიც ვიცით, რომ თქვენი აზრით, მხოლოდ რუსეთის სამხედრო დამარცხება, დაშლა ან საერთოდ პირისაგან მიწისა აღგვა იქნებოდა ასეთი საშიში მეზობლისგან დაცვის ერთადერთი ვარიანტი, მაგრამ თუ აშშ-ს ადმინისტრაცია ხვდება, რომ ეს შეუძლებელია მსოფლიო კატასტროფის გარეშე, თქვენ რატომ ხართ უფრო ჭკვიანები, უფრო მამაცები და უფრო შორსმჭვრეტელები? რატომ ებრძვით საკუთარ სახელმწიფოს (დიახ, სახელმწიფოს და არა მთავრობას), რატომ ცდილობთ მისი განვითარების შეჩერებას (ან შეფერხებას მაინც)?იმის ნაცვლად, რომ სარკეში ჩაიხედოთ, მომხრეთა რიცხვი გაზარდოთ და მომავალი არჩევნებისთვის მოემზადოთ, რატომ იტყუებთ თავს და სხვებსაც ატყუებთ, რომ რადგან უმრავლესობას ვერ მივიმხრობთ, ამიტომ ჩვენი ევროპელი მეგობრების დახმარებით დღე-დღეზე ძალადობრივად დავამხობთ მთავრობას და ისე მოვალთ ხელისუფლებაშიო? ხომ ხედავთ, რომ ყოველ ჯერზე თქვენი მოკლეფეხება ტყუილები მალევე მჟღავნდება და რაც არ უნდა ხმამაღლა და სისტემატურად იძახოთ უსაბუთოდ, რომ არჩევნები გაყალბდა, რომ ძალადობრივი მიტინგები მშვიდობიანი იყო, რომ ქიმიური ნივთიერებებით მოგწამლათ ხელისუფლებამ და ა. შ., სიმართლე მაინც ყოველთვის იჩენს თავს და ამიტომაც ვერ მრავლდება თქვენი რამდენიმეათასიანი მრევლი, რომელიც, სამწუხაროდ, არქიფო სეთურის მრევლს დაემსგავსა? რატომ ვერ ხედავთ, რომ „ბიბისის“ პროვოკაციას დამაჯერებლად გაეცა პასუხი და ამ მედია საშუალებამ ბოლო წლებში შელახული საკუთარი რეპუტაცია კიდევ ერთხელ შეილახა? რატომ არ გიხარიათ და პირიქით, რატომ იბოღმებით, როცა იგებთ, რომ 2024 წელს ჩვენი ქვეყნის ეკონომიკური ზრდა 9%-იანი იყო, ხოლო წელს - 7.6%-ს, რომ მსოფლიო ბანკის ბიზნესის კეთების სიმარტივის ინდექსში საქართველო მე-7 ადგილზეა და უსწრებს დიდ ბრიტანეთს და ევროკავშირის ყველა ქვეყანას, დანიის გარდა, რომ ჩენდლერის ინსტიტუტის სტაბილური ბიზნესის რეგულაციების რეიტინგში საქართველო მე-15 ადგილზეა, რაც ევროკავშირის ყველა ქვეყანაზე მაღალია, გარდა 4-ისა, რომ გლობალური რეიტინგების უმეტესობაში ის ზოგადად აღემატება ევროკავშირის ყველა სხვა კანდიდატ ქვეყანას?რატომ ცდილობთ და გიხარიათ, რომ თქვენმა ევროპელმა მეგობრებმა ქვეყანას უვიზო მიმოსვლა გაუუქმონ (თქვენი ბოლო კოზირი!) და თუ ეს ვერ მოხერხდა, ხელისუფლების ჩინოვნიკების წინააღმდეგ მაინც დააწესონ ფართომასშტაბიანი სანქციები? მარაზმატიკი უილსონის და ვითომ მეგობარი ევროპელების იმედად რატომ გინდათ ძალადობრივი გზით ხელისუფლებაში მოსვლა? სულ ერთი კვირის წინ არ იყო, როდესაც ესტონეთის საგარეო საქმეთა მინისტრმა აღფრთოვანება გამთქვა უკრაინელების მიერ შავ ზღვაში ორი რუსული ტანკერის აფეთქების გამო (რაც მკაცრად დაგმო თურქეთი პრეზიდენტმა ერდოღანმა), მაგრამ იქვე გააფრთხილა უკრაინელები, ასეთი რამ ბალტიის ზღვაში არ გააკეთოთ, რადგან ჩვენთვის საშიშიაო? სხვები თუ ზრუნავენ საკუთარ ქვეყანაზე, თქვენ რა დაგემართათ, რამ დაგბოღმათ და დაგაბრმავათ?და ბოლოს, მთავარი შეკითხვა: ტრამპი რუსეთის აგენტია?“, - წერს ნანა კაკაბაძე. 

პოლიტიკა • 1764750038

ნიკოლოზ სამხარაძე: რუსეთს თუ სურს, საქართველოსთან დიპლომატიური ურთიერთობა ჰქონდეს, ოკუპირებული ტერიტორიებიდან ჯარები უნდა გაიყვანოს და ტერიტორიული მთლიანობა აღიაროს

რუსეთს თუ სურს, საქართველოსთან ნორმალური, დიპლომატიური ურთიერთობა ჰქონდეს, მაშინ ოკუპირებული ტერიტორიებიდან ჯარები უნდა გაიყვანოს და საქართველოს ტერიტორიული მთლიანობა აღიაროს, – ამის შესახებ პარლამენტის საგარეო ურთიერთობათა კომიტეტის თავმჯდომარემ, ნიკოლოზ სამხარაძემ განაცხადა.მისი თქმით, ქართული სახელმწიფოს ინტერესია ქვეყნის ტერიტორიების სრული დეოკუპაცია და ტერიტორიული მთლიანობის აღდგენა.„საქართველოს ხელისუფლებას აქვს მტკიცედ გაცხადებული პოლიტიკა, ვიდრე საქართველოს ტერიტორიების დეოკუპაცია არ მოხდება, რუსეთი არ გაიყვანს თავის საოკუპაციო ჯარს აფხაზეთისა და ცხინვალის რეგიონიდან, რუსეთთან არანაირი დიპლომატიური ურთიერთობები და პოლიტიკური დიალოგი არ იქნება. რაც შეეხება რუსეთის საგარეო საქმეთა სამინისტროს განცხადებას, რომ ეს არის სააკაშვილისეული პოლიტიკის გაგრძელება, ეს არც სააკაშვილის, არც შევარდნაძის და არც არავის პოლიტიკის გაგრძელება არ არის. ქართული სახელმწიფოს ინტერესია ქვეყნის ტერიტორიების სრული დეოკუპაცია და ტერიტორიული მთლიანობის აღდგენა. ამ პროცესს ხელს რუსეთი უშლის, რუსეთია ოკუპანტი, რომელსაც ოკუპირებული აქვს საქართველოს ტერიტორიები. შესაბამისად, რუსეთს თუ სურს საქართველოსთან ნორმალური, დიპლომატიური ურთიერთობა ჰქონდეს, მაშინ ჯარები უნდა გაიყვანოს და ტერიტორიული მთლიანობა აღიაროს. ეს არის ჩვენი პასუხი, რომელიც რუსეთში კარგად იციან დიდი ხანია“, – განაცხადა ნიკოლოზ სამხარაძემ.რუსეთის საგარეო საქეთა სამინისტროში განაცხადეს, რომ რუსეთი არ არის მზად, საქართველოსთან პოლიტიკური დიალოგი საქართველოს პირობებით განაახლოს. მათივე თქმით, „რუსეთის მიერ აფხაზეთისა და სახრეთ ოსეთის რესპუბლიკების სახელმწიფოებრიობის აღიარების გადაწყვეტილება შეუქცევადია“.

პოლიტიკა • 1764011820

„28-პუნქტიანი გეგმა არის კიდევ ერთი დასტური იმისა, თუ რა სწორად იქცეოდა „ქართული ოცნების“ ხელისუფლება, როცა დგამდა იმ ნაბიჯებს უკრაინაში ომის დაწყების შემდეგ, რომელსაც დგამდა... „ქართულმა ოცნებამ“ შეძლო და კბილებით დაიჭირა მშვიდობა“ - დავით მათიკაშვილი

"ეს გეგმა არის კიდევ ერთი ირიბი თუ პირდაპირი დასტური იმისა, თუ რა სწორად, ზუსტად და ადეკვატურად იქცეოდა "ქართული ოცნების" ხელისუფლება მაშინ, როცა დგამდა იმ ნაბიჯებს უკრაინაში ომის დაწყების შემდეგ, რასაც დგამდა," - ეს განცხადება პარლამენტის საპროცედურო საკითხთა კომიტეტის თავმჯდომარე დავით მათიკაშვილმა აშშ-ის მიერ შემუშავებულ 28-პუნქტიან გეგმასთან დაკავშირებით გააკეთა, რომელიც უკრაინა-რუსეთის კონფლიქტის დასრულებას ეხება."ჩვენ ქართველები ვართ და, ბუნებრივია, ყველაფერს იმ პრიზმაში ვხედავთ, სადაც ჩვენს ქვეყანას აქვს როლი, მნიშვნელობა და აზრი. ეს გეგმა არის კიდევ ერთი ირიბი თუ პირდაპირი დასტური იმისა, თუ რა სწორად, ზუსტად და ადეკვატურად იქცეოდა "ქართული ოცნების" ხელისუფლება მაშინ, როცა დგამდა იმ ნაბიჯებს უკრაინაში ომის დაწყების შემდეგ, რასაც დგამდა. დაწყებული იმით, რომ სანქციებს არ შეუერთდა, არ გააგზავნა სახელმწიფო ბორტით მეომრები უკრაინაში, - ყველა ნაბიჯი, რომელიც ხელისუფლებამ გადადგა, - უკრაინის ჰუმანიტარული დახმარების, გვერდში დგომის, ასობით რეზოლუციის მხარდაჭერის ფონზე, მაგრამ სწორი პოლიტიკა, რომელიც არა ომში ჩართვის, არამედ საკუთარი ხალხის ინტერესებიდან გამომდინარეობდა. ჰაერიც კი იყო გაჯერებული იმ პერიოდში, როგორ ითხოვდნენ ჩვენგან ამ რთულ და ჩვენი ერისთვის გამოუვალ მდგომარეობაში ჩაბმას. "ქართულმა ოცნებამ" ეს შეძლო და კბილებით დაიჭირა მშვიდობა.მე ამას ნიშნის მოგებით არ ვსაუბრობ, ჩემთვის ძალიან მნიშვნელოვანია უკრაინის ბედ-იღბალი და ის, რომ სამწუხაროდ, ამდენი უბედურების მერე, ამდენი მსხვერპლის შემდგომ აღმოჩნდა იმ პოლიტიკურ ვითარებაში, რომ შესაძლებელია, ის იძულებული გახდეს, მნიშვნელოვან ტერიტორიულ დათმობაზე წავიდეს, იმიტომ, რომ მშვიდობა შეინარჩუნოს... რა იქნება, ვნახოთ - გამოჩნდება მოლაპარაკების ბოლოს და ყველანი დავინახავთ. ჩვენ მივესალმებით მშვიდობას. მშვიდობა თუ არ დამყარდა, ამ ადამიანებმა თუ არ დაისვენეს და ამოისუნთქეს... ყოველ დღე კოლოსალურ მსხვერპლზეა საუბარი ორივე მხრიდან. ბუნებრივია, ვინაა ოკუპანტი და ვინ იყო ომის დამწყები, კითხვის ნიშნები არ დგას, მაგრამ როგორ მიიყვანეს სიტუაცია იმ მოცემულობამდე და რა არაფორმალურმა გავლენებმა იმუშავეს უკრაინის მოცემულობაში და სურდათ საქართველოც ამის შემადგენელ,ი ყოფილიყო, ამაზე ვთქვით უარი და ამიტომაც ამას დღემდე არ გვპატიობენ," - განაცხადა დავით მათიკაშვილმა.

პოლიტიკა • 1763376468

რატი იონათამიშვილი: ტერმინის „სამხრეთ ოსეთის“ აღდგენა „ნაციონალური მოძრაობის“ მხრიდან სწორედ ჩვენი ქვეყნის ეროვნული ინტერესების ღალატი იყო - ჩვენ ვთავისუფლდებით ისეთი ტერმინებისგან, რომელიც ოკუპანტის მხრიდან გარედან მოხვეული იყო

ტერმინის „სამხრეთ ოსეთის“ აღდგენა „ნაციონალური მოძრაობის“ მხრიდან სწორედ ჩვენი ქვეყნის ეროვნული ინტერესების ღალატი იყო, - განაცხადა პარლამენტის ადამიანის უფლებათა დაცვის კომიტეტის თავმჯდომარემ, რატი იონათამიშვილმა ახალ საკანონმდებლო ინიციატივაზე საუბრისას, რომელიც პარლამენტის ბიუროს დღევანდელ სხდომაზე ინიციირდება.„ტერმინი სამხრეთ ოსეთი იყო ყოველთვის ხელოვნური და თავისი შინაარსით ოკუპაციის მხარეს იდგა და სწორედ ამიტომ, ზვიად გამსახურდიამ ერთ-ერთი პირველი გადაწყვეტილება, თავის დროზე რაც მიიღო, გააუქმა ეს ტერმინი. შემდეგ მისი აღდგენა „ნაციონალური მოძრაობის“ მხრიდან სწორედ იყო ჩვენი ქვეყნის ეროვნული ინტერესების ღალატი. რა თქმა უნდა, არანაირი სამხრეთ ოსეთი არ არსებობს. ეს არის წმინდა წართული მიწა და ტერიტორიები. ჩვენი ქვეყანა არის თავისთავადი და დამოუკიდებელი თავისი გადაწყვეტილების მიღებაში, რაც პირველ რიგში, გულისხმობს ეროვნული ინტერესების შესაბამისად მიღებულ გადაწყვეტილებებს. სწორედ ამასაც ეფუძნება, რომ ჩვენ ვთავისუფლდებით ისეთი ტერმინებისგან, რომელიც ოკუპანტის მხრიდან გარედან მოხვეული იყო“, - განაცხადა იონათამიშვილმა.ხელისუფლების გადაწყვეტილებით, მიხეილ სააკაშვილის მიერ შექმნილი „ყოფილი სამხრეთ ოსეთის ავტონომიური ოლქის ტერიტორიაზე შექმნილი ადმინისტრაციულ-ტერიტორიული ერთეულის ადმინისტრაცია“ უქმდება. საკანონმდებლო ინიციატივა პარლამენტის ბიუროს დღევანდელ სხდომაზე ინიციირდება.

პოლიტიკა • 1762977585

თეა წულუკიანი: გიორგი გახარიას ერთპიროვნული გადაწყვეტილების შედეგად აღმართული საგუშაგო იყო ის მიზეზი, რის გამოც ეს ტერიტორიები დაიკავა რუსმა ოკუპანტმა

ერთპიროვნული გადაწყვეტილების შედეგად, რომელიც გიორგი გახარია მიიღო - აღმართული საგუშაგო იყო ის მიზეზი, რის გამოც ეს ტერიტორიები დაიკავა რუსმა ოკუპანტმა, - განაცხადა გადაცემაში „იმედი LIVE“ პარლამენტის თავმჯდომარის მოადგილე თეა წულუკიანმა. მისი თქმით, ეს ყველაფერი ფაქტებით არის დამტკიცებული.„მცდარი იყო მისი და ბატონი ქემოკლიძის განცხადებები, რომ იმასთან დაკავშირებით, თითქოს ამ საგუშაგოს აღმართვით მათ საქართველოს ტერიტორია, რომელიც ცენტრალურ ხელისუფლებას ექვემდებარებოდა, დაიცვეს რუსეთისგან. ფაქტები, რომელიც ჩვენ დავდეთ [დროებითი საგამოძიებო კომისიის მიერ მომზადებულ] დასკვნაში მეტყველებს საპირისპიროზე, რომ პირიქით, ამ ერთპიროვნული გადაწყვეტილებით ტყის ძალიან დიდი ნაწილი ტერიტორია, რომელსაც თბილისი აკონტროლებდა გადავიდა რუსი ოკუპანტის ხელში.იმ ტერიტორიაზე ჩვენი ქვეყნის ცენტრალური ხელისუფლება ახორციელებდა ეფექტურ კონტროლს და (ამას ასე ჰქვია სამართლებრივად) ჩვენ ეს ეფექტური კონტროლი დავადასტურეთ საგუშაგოს აღმართვამდე იმით, რომ მაგალითად გამოვკითხეთ ადგილობრივი მცხოვრები, რომელმაც თქვა, რომ შეშისთვის თუ სხვა საჭიროებისთვის ამ ტყეში შედიოდა სოფლის ყველა მცხოვრები თავისუფლად. ასევე გამოვკითხეთ ის ბიზნესმენი, რომელსაც კარიერიც ჰქონდა მიმდებარე ტერიტორიაზე და არასდროს ხელშეშლა მის ბიზნესსაქმიანობაში არ ყოფილა. ასევე სოფლის მცხოვრებლები შიშის გარეშე აგრძელებდნენ ცხოვრებას, რადგან ამ ტერიტორიას სრულად აკონტროლებდა ცენტრალური ხელისუფლება თბილისიდან და ადგილობრივი ხელისუფლება, რომელიც არ იყო სეპარატისტული ხელისუფლება. ერთპიროვნული გადაწყვეტილების შედეგად, რომელიც გიორგი გახარია მიიღო - აღმართული საგუშაგო იყო ის მიზეზი, რის გამოც ეს ტერიტორიები დაიკავა რუსმა ოკუპანტმა. იქ განათავსეს არაერთი საგუშაგო მაშინ, როცა მათ არავითარი საგუშაგო მანამდე იქ არ ჰქონდათ. უფრო მეტიც, ოკუპანტის ის საგუშაგოები, რომელიც მათ საპასუხო ნაბიჯის სახით დააყენეს, სოფლების თავზე მოექცა და ამით შექმნა უსაფრთხოებასთან დაკავშირებით გარკვეული ტიპის დისკომფორტი. ეს ყველაფერი დამტკიცდა ფაქტებით. ამ გამოკითხვებს პროკურატურაც ისმენდა და გახსოვთ, რომ კომისიის ვადის ამოწურვასაც არ დალოდებია სამართალდამცავი სისტემა, ისე დაიწყო ფაქტზე გამოძიება, რომელიც დღეს ბრალის წარდგენით დასრულდა“, - განაცხადა წულუკიანმა.