წვევამდელთა ეროვნული სამხედრო სამსახურში საკუთარი ნებით დარეგისტრირებული წვევამდელების მშობლებმა მადლობის წერილები მიიღეს

სამხედრო გაწვევისა და რეკრუტირების ეროვნული სააგენტოს წარმომადგენლები პერიოდულად სტუმრობენ იმ წვევამდელების ოჯახებს, რომლებიც ეროვნულ სამხედრო სამსახურში საკუთარი ნებით რეგისტრირდებიან. ინფორმაციას თავდაცვის სამინისტრო ავრცელებს.

ამჯერად, სააგენტოს სამხედრო მოსამსახურეები ქუთაისში, თერჯოლასა და ბაღდათში მცხოვრებ წვევამდელთა მშობლებს შეხვდნენ და მათ შვილების მიერ ქვეყნის თავდაცვისუნარიანობის საქმეში შეტანილი წვლილისთვის მადლობის წერილები გადასცეს.

წერილები გადაეცათ იმ ოჯახებს, რომელთა შვილებიც ეროვნულ სამხედრო სამსახურში 8-თვის ვადით ნებაყოფლობით მსახურობენ.

ამ ეტაპზე წვევამდელთა ეროვნულ სამხედრო სამსახურში გაწვეულ პირთა საერთო რაოდენობის ნახევარზე მეტს წარმოადგენენ წვევამდელები, რომლებიც საკუთარი ნებით დარეგისტრირდნენ. მათ ხელფასზე 30%-იანი დანამატი ერიცხებათ.

თავდაცვის ახალი კოდექსით, 2025 წლიდან წვევამდელთა ეროვნული სამხედრო სამსახურის გავლა მხოლოდ თავდაცვის ძალებში იქნება შესაძლებელი.

ახალი კოდექსი მოქალაქეებს საშუალებას აძლევს, სამხედრო სამსახურში საკუთარი სურვილით 6, 8 ან 11-თვიანი ვადით იმსახურონ.

წვევამდელების აღრიცხვიანობას, რეკრუტირებასა და გაწვევის ღონისძიებებს სსიპ სამხედრო გაწვევისა და რეკრუტირების ეროვნული სააგენტო ახორციელებს.