ცნობილია, ისრაელში, ტერაქტის დროს გარდაცვლილი ქართველის ვინაობა

ისრაელში, ტერაქტს ქართველი კაცი, ილია ნოზაძე ემსხვერპლა.

როგორც „პრაიმტაიმთან“ ემიგრანტმა, დალი გვათუამ თქვა, მან ილია ორი დღის წინ ნახა. ილია ნოზაძე, წარმოშობით, ხაშურიდან იყო. 

„უკეთილშობილესი ბიჭი იყო, 2 დღის წინ ვნახე, ისე გულიანად მომიკითხა. მატარებელში ჩაცხრილეს, სამი ტყვია ესროლეს“,- ამბობს „პრაიმტაიმთან“ დალი გვათუა. 

ირანმა ისრაელის მიმართულებით 180 ბალისტიკური რაკეტა გაუშვა - საჰაერო თავდაცვამ რაკეტების დიდი ნაწილი გაანეიტრალა, - ინფორმაციას ისრაელის თავდაცვით ძალები ავრცელებს.

ბაიდენის ადმინისტრაციამ გაავრცელა განცხადება, რომლითაც შეერთებული შტატები ისრაელს სამხედრო დახმარებას ჰპირდება. თავის მხრივ, თელ-ავივი აცხადებს, რომ თეირანის თავდასხმას ისრაელის მხრიდან საპასუხო რეაქცია მოჰყვება.

ყველაფერი კი ლიბანში ისრაელის სახმელეთო ოპერაციით დაიწყო, რომელიც ირანის პროქსი ძალების ჰეზბოლას წინააღმდეგ არის მიმართული.

სახმელეთო ოპერაციამდე, ისრაელმა ჰეზბოლას მეთაურები გაანადგურა, მათ შორის ჰასან ნასრალა, რასაც ირანის მყისიერი რეაქცია მოჰყვა. დღეს თეირანი აცხადებს, რომ ისრაელს უკვე გასცა სათანადო პასუხი.

განცხადება გაავრცელა "ისლამური რევოლუციის გუშაგთა" კორპუსმაც, სადაც ნათქვამია, რომ, ისრაელის საპასუხო ქმედებების შემთხვევაში, თეირანის რეაგირება უფრო გამანადგურებელი იქნება.