ცნობილი ბრენდის ერთ-ერთ პროდუქტს მომხმარებლებმა „სიკვდილის შარვალი“ უწოდეს

ინტერნეტმომხმარებლებმა Zara-ს ფართო, დაბალწელიან შარვლებს „სიკვდილის შარვალი“ უწოდეს, რადგან TikTok და სხვა პლატფორმები ტანსაცმლის მიერ მიყენებული დაზიანებების შესახებ ინფორმაციით ივსება. ქალები საკუთარ შარვალზე წამოედებიან, ძვლებს იზიანებენ, სისხლჩაქცევებს და ჭრილობებს იღებენ. ამ ისტორიებს CBC News ავრცელებს.

45.90 დოლარის ღირებულების პოლიესტერის შარვლებს ელასტიკური წელი და წინა ჯიბეები აქვს და ექვს ფერშია ხელმისაწვდომი: მტვრიანი ვარდისფერი, შოკოლადისფერი, შავი, ტერაკოტა, ქვიშისფერი და ლურჯი. მომხმარებლების თქმით, ფართო ჭრილი და დაბალი წელი ხშირი დაცემისა და დაზიანებების მიზეზია.

ონლაინ უკვე გამოქვეყნდა ათასობით ვიდეო Zara-ს „სიკვდილის შარვლის“ შესახებ ჰეშტეგებით. TikTok-საც კი აქვს სპეციალური ჰეშტეგი #deadlyzarapants, სადაც ადამიანები ამ შარვლებით მიყენებული დაზიანებების ისტორიებს აზიარებენ. ბლოგერმა ჰოლი გილმერმა ვიდეო გადაიღო, სადაც ის ამ შარვლით ქუჩაში მიდის და შემდეგ საავადმყოფოდან ინვალიდის ეტლით გამოდის, მას შემდეგ, რაც დაცემის შედეგად მუხლი მძიმედ დაიზიანა. მისი თქმით, შარვლის ამ სტილს პოტენციური საფრთხეების შესახებ გაფრთხილება უნდა მოჰყვეს.

ტორონტოს მცხოვრებმა ელინ კოსტამ CBC News-ს განუცხადა, რომ შარვალმა რამდენიმე კვირის წინ „თითქმის მოკლა“: საშინელი დაცემის შედეგად მაჯაზე, სახეზე და საფეთქელზე ჭრილობა მიიღო. კოსტამ დასძინა, რომ მას მუდმივი ტკივილი აწუხებს, სახეზე მუდმივი ნაწიბური აქვს და დაცემის დროს სათვალე და Apple Watch გაუტყდა. მომხმარებლების თქმით, პრობლემა შარვლის ნაჭერშია: ტოტები იმდენად გრძელი და ფართოა, რომ სიარულის დროს ერთი ფეხი შეიძლება მეორე ფეხის ქსოვილში ჩაიხლართო, რაც მფლობელს წონასწორობის დაკარგვას და  დაცემას იწვევს. პრობლემა არა მხოლოდ Zara-ს ამ კონკრეტულ მოდელს, არამედ ზოგადად მსგავს სტილებსაც ეხება. ამჟამად მოდურად ითვლება, ისინი ფართოდ არის ხელმისაწვდომი.

კიდევ ერთი რისკია, რომ ქსოვილი შეიძლება ველოსიპედის ჯაჭვებში, მექანიზმებში ან ესკალატორებში გაიჭედოს. ამის მიუხედავად, ფართო შარვალი 2026 წლის ზაფხულის ერთ-ერთ მთავარ ტრენდად რჩება, ჟურნალმა Vogue-მა კი ერთ-ერთ მიმოხილვაში მას „მრავალმხრივი გარდერობის აუცილებელი ნივთი უწოდა, რომელიც პრაქტიკულობასა და ელეგანტურობას აერთიანებს“.

პირადი სტილისტი კლერ ჩემბერსი განმარტავს, რომ ეს ტენდენცია პირდაპირ კავშირშია იმ ექსტრემალურ სიცხესთან, რომელმაც წელს ევროპისა და ჩრდილოეთ ამერიკის ქვეყნები მოიცვა: ფართო შარვალი კარგი საშუალებაა ფეხების დასაფარად იმ ქალებისთვის, რომლებსაც სამსახურში ქვედაბოლოს ტარება არ შეუძლიათ.

Zara-ს შარვლის ისტორია არ არის პირველი შემთხვევა, როდესაც ტანსაცმელმა დაზიანებები გამოიწვია. გასულ წელს მსახიობმა და მომღერალმა სუკი უოტერჰაუსმა თავის X გვერდზე (ყოფილი Twitter) გამოაქვეყნა, რომ მას ძალიან მჭიდრო შარვლის გამო თიაქარი განუვითარდა. 2015 წელს ავსტრალიაში ქალი საავადმყოფოში მოათავსეს ორივე ტერფის ძლიერი სისუსტით, მას შემდეგ, რაც დიდი ხნის განმავლობაში მჭიდრო ჯინსები ეცვა. ექიმებს მის სამკურნალოდ ჯინსის გაჭრა მოუწიათ.