როგორ ვიცოცხლოთ უფრო დიდხანს - მეცნიერების საინტერესო აღმოჩენა

კაიროს ამერიკული უნივერსიტეტის მკვლევრებმა 55 წლის განმავლობაში ჩატარებული 124 კვლევა მიმოიხილეს, რომელშიც 100, 105 და 110 წელს გადაცილებული ადამიანები იყვნენ შესწავლილი.

ბიოლოგიური კვლევები მიუთითებდა, რომ გამორჩეულად დიდხანს მცხოვრები ადამიანები უჯრედულ დონეზე ხშირად სხვანაირად ბერდებიან.

მკვლევრებმა განმეორებით მიაგნეს დნმ-ის უფრო ეფექტიანი აღდგენის, ჯანმრთელი მიტოქონდრიების, ანთების უკეთესი კონტროლისა და მეტაბოლური განსხვავებების მტკიცებულებას, რაც შეიძლება ასაკთან დაკავშირებული დაავადებებისგან დაცვაში გვეხმარება.

სხვადასხვა პოპულაციაში, ას წელს გადაცილებულები ხშირად ირჩევდნენ მცენარეულ კვებას, ყოველდღიურად ეწეოდნენ ისეთ ფიზიკურ აქტივობას, როგორიცაა სიარული და მებაღეობა, არ ეწეოდნენ, ინარჩუნებდნენ ძლიერ სოციალურ და ოჯახურ კავშირებს და გამოირჩეოდნენ მდგრადობითა და დაბალი ნევროტიზმით.

ერთ-ერთი ყველაზე გასაოცარი აღმოჩენა დაავადებას უკავშირდებოდა.

ას წელს გადაცილებულები დაავადებებს სრულად ვერ გაურბოდნენ, თუმცა, ბევრ მათგანს ასაკთან დაკავშირებული დაავადებები საშუალოზე გვიან უვითარდებოდა - ფენომენი, რომელსაც მკვლევრები „ავადობის შეკუმშვას“ უწოდებენ.

ზოგიერთ ხანდაზმულს ასაკთან დაკავშირებული დაავადება ადრე ეწყებოდა, თუმცა მასთან ერთად ათწლეულების განმავლობაში ცხოვრებას ახერხებდა.

მკვლევრებმა ას წელს გადაცილებულები სამ ჯგუფად დაყვეს: „გაქცეულები“, რომლებიც ასაკობრივ დაავადებებს თავს არიდებენ; „შემაფერხებლები“, რომლებსაც დაავადებები გვიან უვითარდებათ და „გადარჩენილები“, რომლებიც ადრე განვითარებული დაავადების მიუხედავად, მრავალი წლის განმავლობაში ცხოვრობენ.

„დიდხანს სიცოცხლეს განაპირობებს ფაქტორების რთული ურთიერთქმედება, რომელშიც გენეტიკური წვლილი მკვეთრად ძლიერდება ხანდაზმულ ასაკში, თუმცა გარემო და ქცევითი ფაქტორები გადამწყვეტი რჩება ინდივიდების უმეტესობისთვის“, - წერენ მკვლევრები.