"ძლიერმა ქარმა მრავალწლიანი ხეები მოგლიჯა..." - სტიქია საქართველოში

ძლიერმა ქარმა პრობლემები შექმნა კახეთში. რეგიონის რამდენიმე მუნიციპალიტეტში მრავალწლიანი ხეები მოგლიჯა, რის გამოც ლაგოდეხის  დამაკავშირებელ გზაზე უღელტეხილი დაკეტილია.  მოძრაობა შეზღუდულია ლაგოდეხი-ყვარლისა და ლაგოდეხი-გურჯაანის მიმართულებით.

დედოფლისწყაროს მუნიციპალიტეტის სოფელ გამარჯვებაში ცენტრალურ გზაზე ძლიერი ქარის გამო წაქცეულია ხეები და მოძრაობა შეზღუდულია ორივე მიმართულებით.

თელავის მუნიციპალიტეტის სოფელ ვარდისუბანში სახურავის ნაწილი კულტურის სახლს გადახადა, სადაც დროებით საბავშვო-ბაღი ფუნქციონირებს.

სოფელ წინანდალსა და გურჯაანის ცენტრში კი  ძლიერმა ქარმა საახალწლო ნაძვის ხეები წააქცია.

უამინდობის შედეგად, რეგიონში  დაზიანდა  ელექტროგადამცემი ხაზები.

გარემოს ეროვნული სააგენტოს ჰიდრო-მეტეოროლოგიური პროგნოზების სამმართველოს უფროსის სვეტლანა ნიორაძე „პრაიმტაიმთან“ ამბობს, რომ ქარი, მთელი საქართველოს მასშტაბით, კიდევ უფრო გაძლიერდება.

„ქარი კიდევ უფრო გაძლიერდება. გაფანტავს ამ ღრუბლებს. თოვლი ჯერჯერობით თბილისში მოსალოდნელი არ არის...“ - ამბობს სვეტლანა ნიორაძე.