„ცხედარი იმდენად დასახიჩრებული იყო, რომ სქესის გარკვევა გაუჭირდათ“ - ლილოში მოკლული 21 წლის გოგოს საქმე

59 ჭრილობა დანით. კურიერი PS ლილოში მომხდარი სასტიკი დანაშაული დეტალები გაარკვია. მოკლული 21 წლის ქეთი ჯავახიშვილია, მკვლელი კი 20 წლის ოთარ ცინდელიანი, რომელმაც საკუთარი დედის ნათლული, ღამის ორ საათზე, ჯერ სახლიდან გაიტყუა, შემდეგ კი დანით დაჩეხა და მიიმალა.

ცხედარი იმდენად დასახიჩრებული იყო რომ მეორე დღეს, დანაშაულის ადგილას მისულ ადგილობრივებს, გარდაცვლილის სქესის გარკვევაც კი გაუჭირდათ - საბოლოოდ ცხედარი მოკლულის მამამ ამოიცნო. ოჯახი განსაკუთრებული სისასტიკით ჩადენილი მკვლელობისთვის უმკაცრეს სასჯელს ითხოვს.

თბილისის საქალაქო სასამართლომ სასტიკი დანაშაულის საქმის არსებითი განხილვა რამდენიმე დღის წინ დაიწყო. ირკვევა, რომ ბრალდებულმა აღიარება დუმილით შეცვალა. ცინდელიანის ადვოკატები მედიის შეკითხვებს გაურბიან.

ერთადერთი ვინც ბრალდებულის მხრიდან ინტერვიუზე თანხმდება, ოთარ ცინდელიანის ბებიაა. მარინა გუჯეჯიანი ამბობს, რომ მის შვილიშვილს ფსიქიკური პრობლემები აქვს. დანაშაულის ღამეზე კი, არაფერი იცის. ბებია ადასტურებს, რომ მკვლელობის იარაღი მისმა შვილიშვილმა მიმალვამდე სახლში დატოვა.

ის, რომ ბრალდებული მკვლელობის დროს შეურაცხადი იყო, ექსპერტიზამ არ დაადასტურა. დასკვნის მიხედვით, ოთარ ცინდელიანი ნარკოტიკების ზემოქმედების ქვეშ იყო, თუმცა ქმედების გაცნობიერების უნარი ჰქონდა.

ოთარ ცინდელიანის შეურაცხადობის არ სჯერა არც მოკლულის ოჯახს. დაზარალებულებს კიდევ ერთი ვერსია აქვთ - ვარაუდობენ, რომ დამნაშავე ქალს ფულსაც სძალავდა.

ქეთის ოჯახს ახლა ერთადერთი მოთხოვნა აქვს - უმკაცრესად დაისაჯოს მკვლელი, რომელმაც 21 წლის გოგოს სიცოცხლე განსაკუთრებული სისასტიკით დაასრულა. განაჩენი , სავარაუდოდ, უახლოეს თვეებში გახდება ცნობილი.