შეიძლება, მომხმარებელმა უვნებელი პროდუქტი შეიძინოს, მაგრამ შინ ეს სურსათი მავნებლად იქცეს“ - სურსათის სპეციალისტის გაფრთხილება

გადაცემაში „დილა მშვიდობისა საქართველო“ სურსათის უვნებლობის ექსპერტმა, ირაკლი არაბული განმარტა, მომხმარებლები ხშირად უშვებენ შეცდომებს, რომლებიც ჯანმრთელობისთვის სერიოზულ საფრთხეს ქმნის.

ექსპერტის თქმით, ერთ-ერთი მთავარი პრობლემა ე.წ. ჯვარედინი დაბინძურებაა — როდესაც დაბინძურებული პროდუქტის ბაქტერიები სხვა პროდუქტზე, ზედაპირზე ან სამზარეულოს ინვენტარზე გადადის. ეს განსაკუთრებით მაშინ ხდება, როდესაც ერთი და იგივე დაფა ან დანა გამოიყენება როგორც ნედლი ხორცისთვის, ისე ბოსტნეულის, მწვანილისა და მზა კერძებისთვის.

ირაკლი არაბული განმარტავს, რომ უმჯობესია, სხვადასხვა პროდუქტისთვის ცალკე ინვენტარი გამოვიყენოთ. მსოფლიოში ფართოდ გავრცელებული პრაქტიკაა ფერადი დაფების გამოყენება: წითელი — ნედლი ხორცისთვის, ყვითელი - ქათმისთვის, მწვანე - ბოსტნეულისა და მწვანილისთვის.

სპეციალისტი ყურადღებას ამახვილებს პროდუქტის სწორ შენახვაზეც. მისი თქმით, მალფუჭებადი სურსათი, განსაკუთრებით ხორცი, თევზი და ცხოველური წარმოშობის სხვა პროდუქტები, ოთახის ტემპერატურაზე დიდხანს არ უნდა დარჩეს. მომზადებული კერძების მაცივარში შენახვის მაქსიმალური ვადა 72 საათია, თუმცა ზოგი პროდუქტი გაცილებით მალე ფუჭდება.

ექსპერტის რეკომენდაციით:

თუ კერძი ოთახის ტემპერატურაზე 2 საათამდე იყო, მისი მაცივარში დაბრუნება შეიძლება;
4 საათის შემდეგ მისი მხოლოდ მირთმევაა შესაძლებელი;
6 საათზე მეტი დროის გასვლის შემდეგ კი პროდუქტი არც შესანახად და არც საჭმელად აღარ ვარგა.
განსაკუთრებული ყურადღება მაიონეზიან სალათებსა და ცოცხალი მწვანილით მომზადებულ კერძებს უნდა მიექცეს, რადგან სწორედ ისინი ფუჭდება ყველაზე სწრაფად.