ვამაყობთ დამოუკიდებლობით, სუვერენიტეტით და ბოლომდე გავუფთხილდებით, უცხოური ჩარევით, დამოუკიდებლობის, სუვერენიტეტის შერყევის შესაძლებლობას არავის მივცემთ - ირაკლი კობახიძე

ჩვენ ვართ ღირსეული ქვეყანა, ვამაყობთ საკუთარი დამოუკიდებლობით, სუვერენიტეტით და სუვერენიტეტს და დამოუკიდებლობას ბოლომდე გავუფთხილდებით. არავის მივცემთ უცხოური ჩარევით ჩვენი დამოუკიდებლობის და სუვერენიტეტის შერყევის შესაძლებლობას, – ამის შესახებ საქართველოს პრემიერ-მინისტრმა, ირაკლი კობახიძემ მთავრობის დღევანდელ სხდომაზე განაცხადა.

კობახიძის თქმით, „საქართველოში ნაცმაიდანი არ შედგა და არც არასდროს შედგება“.

„ეს ყველაფერი გამოჩნდა, მათ შორის წელს, გაზაფხულის მოვლენების დროს. ეს ყველაფერი გამოჩნდა ამ დღეებში. ხედავთ, რომ იყო კოორდინირებული და წინასწარ გაწერილი გეგმა და უცხოური დაფინანსება იყო ჩართული ამ გეგმის რეალიზებაში. სწორედ ამიტომ არ უნდოდათ ვიღაცებს გამჭვირვალობის შესახებ კანონის მიღება, რომ ბუნდოვანი ფორმით ყოფილიყო დაფინანსებული რევოლუციური პროცესები საქართველოში. ჩვენ ამ ოთხი წლის განმავლობაში სამი რევოლუციური პროცესი ვიხილეთ და ეს ყველაფერი ხდებოდა სამწუხაროდ, უცხოური დაფინანსებით. ეს არ არის სწორი დამოკიდებულება ჩვენი ქვეყნის მიმართ. ჩვენ ვართ ღირსეული ქვეყანა, ჩვენ ვამაყობთ საკუთარი დამოუკიდებლობით, სუვერენიტეტით და რა თქმა უნდა, სუვერენიტეტს და დამოუკიდებლობას ბოლომდე გავუფთხილდებით. არავის მივცემთ უცხოური ჩარევით, ჩვენი დამოუკიდებლობის და სუვერენიტეტის შერყევის შესაძლებლობას“, – განაცხადა ირაკლი კობახიძემ.