პარლამენტმა კულტურულ-შემოქმედებითი რადიომაუწყებლობის ფუნქციონირებასთან დაკავშირებულ კანონპროექტს პირველი მოსმენით მხარი დაუჭირა

საკანონმდებლო ორგანომ „მაუწყებლობის შესახებ“ კანონში შესატან ცვლილებასა და გამომდინარე კანონპროექტზე პირველი მოსმენით იმსჯელა და 82 ხმით მხარი დაუჭირა.

კანონპროექტი აწესრიგებს, კულტურულ-შემოქმედებითი რადიომაუწყებლობის ფუნქციონირებასთან, კულტურულ-შემოქმედებითი რადიომაუწყებლის მიერ განხორციელებული რადიომაუწყებლობის დაფინანსების სახსრებთან, პროგრამების საქართველოს სახელმწიფო ენაზე განთავსებასთან, ლიცენზიის გაცემის და ავტორიზაციის წესებთან დაკავშირებულ საკითხებს.

კანონპროექტის ერთ-ერთი ინიციატორის, კულტურის კომიტეტის თავმჯდომარის, გიორგი გაბუნიას განმარტებით, კანონს ემატება რადიომაუწყებლობის ახალი მიმართულება - კულტურულ-შემოქმედებითი რადიომაუწყებლობა.

„კულტურულ-შემოქმედებითი რადიომაუწყებლობა უზრუნველყოფს კულტურის სხვადასხვა დარგის პოპულარიზაციას, საზოგადოების ფართო ფენებისათვის კულტურის სფეროსთან დაკავშირებული შემეცნებითი და მიმდინარე ამბების შესახებ ინფორმაციის მიწოდებას, რომლის მიზანი არ არის მოგების მიღება“, - განაცხადა გიორგი გაბუნიამ.

გიორგი გაბუნიას თქმით, აღნიშნული ინიციატივა ხელს შეუწყობს რადიომაუწყებლობის განვითარებას, მეტი ინტერესისა და კონკურენციის გაჩენას და ეს იქნება კულტურის სფეროს წარმომადგენლებისთვის კარგი შესაძლებლობა თავიანთი შემოქმედება გააცნონ საზოგადოებას.