მიხეილ ყაველაშვილი ძალადობრივი აქციების დროს დაკავებულთა შეწყალებაზე: აღიარონ შეცდომები და ამის მიხედვით დავაკვირდებით მოვლენებს, რა და როგორ იქნება

თქვენ ხომ გყავთ თქვენი პრეზიდენტი მას სთხოვეთ და იქნებ შეიწყალოს ეს პატიმრები, - განაცხადა საქართველოს პრეზიდენტმა ოპოზიციური მედიის მიერ ნოემბერ-დეკემბრის ძალადობრივი აქციების დროს დაკავებულთა შეწყალების თაობაზე დასმული კითხვის პასუხად.

პრეზიდენტს მიაჩნია, რომ მსჯავრდადებულებმა რეალობა უნდა გაიაზრონ, აღიარონ შეცდომები და შემდეგ გაირკვევა რა როგორ იქნება.

„მე ამაზე პასუხს არ და ვერ გაგცემთ რომ ვინმეს შევიწყალებ დღეს. საზოგადოებამ ძალიან კარგად იცის, რომ მე ეტაპობრივად ვახორციელებ ხოლმე შეწყალებებს, შემდეგი შეწყალება ალბათ იქნება ნათლისღებისთვის. ის ადამიანები ვინც დღეს დაპატიმრებულები არიან და ვისაც თქვენ „სინდისის პატიმრებს“ ეძახით, მათ აქვთ ჩადენილი კონკრეტული დანაშაული. ეს ადამიანები იყვნენ მოტყუებული, ვერ აცნობიერებენ და ვერ აკეთებენ ანალიზს. პროდასავლელები თუ ხართ რომელ დასავლეთს უჭერთ მხარს? ამერიკის არსებულ ადმინისტრაციას თუ ევროკავშირის ადმინისტრაციას? ის ადამიანები, მოტყუებული ადამიანები გამჭვირვალობის კანონის გამო გამოიყვანეთ და მაგის გამო გინდოდათ მოგეხდინათ რევოლუცია, დღეს ახალმა ადმინისტრაციამ თავად ის ორგანიზაციები, რომლითაც იკვებებოდნენ ის არასამთავრობო ორგანიზაციები, რომლითაც რევოლუცია გინდოდათ მოგეწყოთ საქართველოში. ეს რეალობა უნდა გაითავისოს იმ ადამიანებმა, რომლებიც ციხეში არიან, აღიარონ შეცდომები და ამის მიხედვით დავაკვირდებით მოვლენებს, რა და როგორ იქნება. მე ამაზე პასუხს არ და ვერ გაგცემთ პასუხს რომ ვინმეს შევიწყალებ დღეს“, - განაცხადა ყაველაშვილმა.