მე რას ვაპირებ, ამას გადავწყვეტ მე და როცა გადავწყვეტ რომ გითხრათ, მაშინ გეტყვით - გიორგი ვაშაძე ოპოზიციის გეგმაზე

დღეს უნდა გახდეს ცნობილი ოპოზიციის სამოქმედო გეგმა - შეკრება რუსთაველის გამზირზე 19 საათზეა დაანონსებული. სანამ გაირკვევა რა დღის წესრიგით მოითხოვენ პარტიები ხელახალი არჩევნების დანიშვნას, უკვე რამდენიმე დღეა დაწყებულია კარვების მობილიზება.

"მე რას ვაპირებ - ამას გადავწყვეტ მე და როცა გადავწყვეტ რომ გითხრათ, მაშინ გეტყვით. არის უმნიშვნელოვანესი დღე, ჩვენ ვითხოვთ ახალი არჩევნების ჩატარებას. მსვლელობით წავალთ რუსთაველისკენ. რატომ იქნება ეს მსვლელობა, რუსთაველზე გეტყვით რატომ ვაკეთებთ ამ მსვლელობას დღეს 5 საათზე და ასევე პროტესტის ფორმები როგორი იქნება შემდგომ დღეებში, ამაზეც მოგაწვდით ინფორმაციას. ჩვენ გვაქვს სისტემურად მწყობრად ორგანიზებული დაგეგმილი ნაბიჯები", - აცხადებს "ერთიანობა - ნაციონალური მოძრაობის" ერთ-ერთი ლიდერი გიორგი ვაშაძე.

კონსულტაციები დღესაც გაგრძელდა - სამმა პოლიტიკურმა გაერთიანებამ მორიგი შეხვედრა გამართა. ადგილზე ისევ არ იმყოფებოდა გახარიას გუნდი, რომელიც საპროტესტო აქციას უერთდება, თუმცა კარვების იდეას არ იზიარებს.