კანონპროექტები გულისხმობს იმ ცვლილებებს, რომლებიც საჭიროა იმისათვის, რათა ჩვენი ქვეყანა დავიცვათ გარე ჩარევებისგან. პირველ რიგში, ბუნებრივია, უნდა გამოვყოთ „ფარა“, რომელიც ამერიკული „ფარას“ ანალოგია - ვლადიმერ ბოჟაძე

კანონპროექტები გულისხმობს იმ ცვლილებებს, რომლებიც საჭიროა იმისათვის, რათა ჩვენი ქვეყანა დავიცვათ გარე ჩარევებისგან, - განუცხადა ჟურნალისტებს გარემოს დაცვისა და ბუნებრივი რესურსების საპარლამენტო კომიტეტის თავმჯდომარის პირველმა მოადგილე, უმრავლესობის წევრმა ვლადიმერ ბოჟაძემ.

მისივე თქმით, პირველ რიგში, უნდა გამოიყოს „ფარა“, რომელიც ამერიკული „ფარას“ ანალოგია და ფაქტობრივად, მორგებული მხოლოდ ქართულ რეალობაზე.

„ასევე, იცით თქვენ რომ სამოქალაქო სექტორთან მიმართებაში მიღებულია გადაწყვეტილება, რომ სავალდებულო წესით აღარ იყოს მათი ჩართულობა გარანტირებული და სამოქალაქო სექტორს არ ჰქონდეს ე.წ. ვეტოს უფლება სხვადასხვა გადაწყვეტილების მიღებისას.

რაც შეეხება მედიის მიმართულებს, აქაც იცით თქვენ, რომ ორი კანონპროექტია წარდგენილი. ერთი ემსახურება თვითრეგულირების მექანიზმის პარალელურად რეგულირების მექანიზმის შემოტანას. ე.წ „ბიბისის“ სტანდარტის შემოღებას და მეორე ემსახურება, მათ შორის, საქართველოში მედიის დაცვას გარე ჩარევებისგან. თქვენ იცით, რომ მედიას აეკრძალება ნებისმიერი უცხოური დაფინანსების მიღება. ყველაფერი ამის ერთადერთი მთავარი მიზანია, რომ ჩვენ გავამტკიცოთ ჩვენი ქვეყნის დამოუკიდებლობა და სუვერენიტეტი, დავიცვათ ქვეყანა გარე ჩარევებისგან ყველა მიმართულებით“, - აღნიშნა ვლადიმერ ბოჟაძემ.

ცნობისთვის, პარლამენტის დღევანდელ სხდომაზე, სავარაუდოდ მესამე მოსმენით დამტკიცდება კანონპროექტები. მათ შორის, ამერიკული „ფარას“ ზუსტი ანალოგი და „მაუწყებლობის შესახებ“ კანონში შესატანი ცვლილებები. კიდევ ერთი საკანონმდებლო ცვლილება, რომელსაც სავარაუდოდ დეპუტატები დღეს კენჭს უყრიან, ეხება „სისხლის სამართლის კოდექსში“ სამშობლოს ღალატის მუხლის დაბრუნებას. ასევე საკანონმდებლო დონეზე უქმდება სიტყვა გენდერი და საპარლამენტო საქმიანობაში გადაწყვეტილებების მიღების პროცესში უქმდება არასამთავრობო ორგანიზაციების სავალდებულო მონაწილეობა. მიმდინარე კვირაშივე დეპუტატები მეორე მოსმენით იმსჯელებენ ნარკო პოლიტიკასთან დაკავშირებით მომზადებულ საკანონმდებლო პაკეტზეც.