ჯანმრთელობის დაცვისა და სოციალურ საკითხთა კომიტეტმა „იარაღის შესახებ“ კანონში შესატან ცვლილებას ერთხმად დაუჭირა მხარი

ჯანმრთელობის დაცვისა და სოციალურ საკითხთა კომიტეტმა „იარაღის შესახებ“ კანონში შესატანი ცვლილების პროექტი და მისგან გამომდინარე კანონპროექტები პირველი მოსმენით განიხილა.

საკითხის წარდგენისას, რომელიც მთავრობის ინიციატივას წარმოადგენს, შინაგან საქმეთა მინისტრის მოადგილემ ალექსანდრე დარახველიძემ კანონპროექტის მიღების მიზეზებსა და მიზნებზე ისაუბრა. მისი განმარტებით, აღნიშნული კანონპროექტის მომზადება დანაშაულის პრევენციის, საზოგადოებრივი უსაფრთხოების, ადამიანის სიცოცხლისა და ჯანმრთელობის დაცვის ეფექტიანობის გაზრდის საჭიროებით არის განპირობებული.

მისივე თქმით, ვინაიდან იარაღი მომეტებული საფრთხის წყაროს წარმოადგენს, განსაკუთრებით მნიშვნელოვანია იარაღთან კონტაქტში მყოფი პირის ჯანმრთელობის მდგომარეობა იყოს კანონმდებლობით განსაზღვრულ მოთხოვნებთან შესაბამისი.

„პირის ჯანმრთელობის მდგომარეობის შემოწმების კუთხით არსებული მექანიზმები, მაგალითად როგორიც არის ცნობა ჯანმრთელობის მდგომარეობის შესახებ, ბოლომდე ვერ უზრუნველყოფს პოტენციური რისკების გამორიცხვას. კერძოდ, შესაძლებელია პირის ჯანმრთელობის მდგომარეობის შესახებ ცნობაში მოცემული ინფორმაცია არაზუსტი ან არასრული იყოს. ასევე, პირს ჯანმრთელობის, მათ შორის, ფსიქიკური ჯანმრთელობის მდგომარეობის პრობლემა შეიძლება წარმოეშვას კანონით გათვალისწინებული ლიცენზიის (ნებართვის) მიღების შემდეგ. ასეთი პირი საფრთხეს წარმოადგენს როგორც საკუთარი, ასევე, სხვა პირთა სიცოცხლისა და ჯანმრთელობისთვის. წარმოდგენილი ცვლილებები კი უზრუნველყოფს, რომ კანონმდებლობით განსაზღვრულ მოთხოვნებთან შეუსაბამო ჯანმრთელობის მდგომარეობის მქონე პირს იარაღზე ხელი არ მიუწვდებოდეს“, - განაცხადა მომხსენებელმა.

მისივე თქმით, ასევე გამოწვევას წარმოადგენს პირისთვის სამსახურებრივ-საშტატო იარაღის ტარების უფლების მინიჭების, სამხედრო-საბრძოლო იარაღის გადაცემის და ასეთი უფლების მქონე პირთა ჯანმრთელობის მდგომარეობის კანონმდებლობით განსაზღვრულ მოთხოვნებთან შესაბამისობის დადგენის საკითხი.

როგორც მომხსენებელმა აღნიშნა, არსებული მდგომარეობით, შესაბამისი ორგანოების მიერ შეუძლებელია ასეთ პირთა ჯანმრთელობის მდგომარეობის შესახებ ინფორმაციის მიღება და საჭირო და დროული რეაგირების განხორციელება. შესაბამისად, არსებულ გამოწვევებზე ეფექტიანი რეაგირების მიზნით, საკანონმდებლო დონეზე შეიქმნება ფსიქიკური ჯანმრთელობის პრობლემის მქონე, ალკოჰოლიზმით, ნარკომანიით ან/და ტოქსიკომანიით დაავადებულ პირთა ერთიანი საინფორმაციო ბაზა. კანონში ცვლილებით განისაზღვრება ბაზაზე წვდომის საფუძვლები და შესაბამის ორგანოთა მიერ განსახორციელებელი შემდგომი რეაგირების მექანიზმები.

ცვლილების მიღების შემთხვევაში, კანონით გათვალისწინებული ლიცენზიის (ნებართვის) გამცემ ორგანოს განესაზღვრება ვალდებულება, ლიცენზიის (ნებართვის) მაძიებლის ჯანმრთელობის მდგომარეობის კანონმდებლობით განსაზღვრულ მოთხოვნებთან შესაბამისობის დადგენის მიზნით, მონაცემები მოიპოვოს ერთიანი საინფორმაციო ბაზის საშუალებით. აგრეთვე, შესაბამისი ორგანო უფლებამოსილი იქნება ერთიანი საინფორმაციო ბაზის საშუალებით განახორციელოს ლიცენზიის (ნებართვის) მფლობელის ჯანმრთელობის მდგომარეობის კანონმდებლობით განსაზღვრულ მოთხოვნებთან შესაბამისობის შემდგომი გადამოწმებაც.

კომიტეტმა წარმოდგენილ კანონპროექტს და მისგან გამომდინარე კანონპროექტებს ერთხმად დაუჭირა მხარი.