"დიდხანს ეს სამთავრობო კარუსელი ვერ გასტანს, იმიტომ რომ განაჩენი ქართველ ხალხს უკვე გამოტანილი აქვს ხელისუფლების მიმართ" - თინა ბოკუჩავა მთავრობაში დაგეგმილ ცვლილებებზე

პოლიტიკური შეფასებების მთავარი თემა მთავრობაში დაგეგმილი ცვლილებებია. სახელმწიფო უსაფრთხოების სამსახურის ხელმძღვანელი, რეგიონული განვითარების მინისტრი იქნება, ინფრასტრუქტურის სამინისტროს კი ისევ ირაკლი ქარსელაძე უხელმძღვანელებს. სუს-ს გრიგოლ ლილუაშვილის ნაცვლად, ანრი ოხანაშვილი ჩაიბარებს, მის პოზიციაზე, იუსტიციის მინისტრის თანამდებობაზე - პაატა სალია ინიშნება.

საკადრო გადაწყვეტილებებს ოპოზიციის ნაწილი ფორმალურს უწოდებს:

"დიდხანს ეს სამთავრობო კარუსელი ვერ გასტანს, იმიტომ რომ განაჩენი ქართველ ხალხს უკვე გამოტანილი აქვს ხელისუფლების მიმართ. ყველა მის მინისტრს ქართველი ხალხი ჩამოაშორებს ძალაუფლებას," - აცხადებს პარტიის "ერთიანობა - ნაციონალური მოძრაობა" თავმჯდომარე, თინათინ ბოკუჩავა.

”ძლიერი საქართველოს” პოლიტიკური საბჭოს წევრი, ლანა გალდავა: "აბსოლუტურად არ აქვს მნიშვნელობა, "ქართული ოცნების" წიაღში რომელი სამინისტრო რას დაირქმევს და რომელი ადამიანი გადავა სხვა თანამდებობაზე. შესაკრებთა ადგილების შეცვლით ჯამი არ იცვლება. აუცილებელია ამ ქვეყანაში პოლიტპატიმრების გათავისუფლება და ხელახალი არჩევნების ჩანიშვნა. სერიოზული ცვლილებები ესაჭიროება ზოგადად ქვეყანას და არა კოსმეტიკური".