დავით მათიკაშვილი: სააკაშვილის ლიდერობა არ გაიშვა, ქვეყანა დაქცევის გზაზე დააყენა და შემდეგ ოპოზიციაში გადასულმა ყველაფერი გააკეთა, რომ საზოგადოება წინ არ წასულიყო

მიხეილ სააკაშვილსა და რადიკალებს მეხუთე კოლონას სულ ტყუილად უხარიათ, კარგად დააკვირდნენ სერბეთსა და  უნგრეთში მიმდინარე პროცესებს, იქ გამარჯვებულ ოპოზიციურ ძალებს, მათ ზოგად პოლიტიკურ წიაღსვლას და სულისკვეთებას, – ამის შესახებ პარლამენტის საპროცედურო საკითხთა კომიტეტის თავმჯდომარემ, დავით მათიკაშვილმა განაცხადა.

მისი თქმით, „სააკაშვილმა იმ საკითხსაც მიხედოს, რომ უფრო მეტად აღიარებს და პირდაპირ ღია ჩვენებას აძლევს მისი დაკვეთით ჩადენილი დანაშაულების შესახებ“.

„ვგულისხმობ როინ შავაძის თემას, როდესაც სააკაშვილმა პრაქტიკულად პირდაპირ აღიარა ქართველი სამხედროს ფიზიკური განადგურების დავალების მიცემის თემა. ჩვენს კოლეგებს საკონსტიტუციო სასამართლოში ამით კიდევ ერთხელ მისცა არგუმენტი. რაც შეეხება ლიდერებს, სააკაშვილის ლიდერობა არ გაიშვა. თავისი ე.წ. ლიდერობით ქვეყანა დაქცევის გზაზე დააყენა და შემდგომ კი, უკვე ოპოზიციაში გადასულმა ყველაფერი გააკეთა, რომ ჩვენი საზოგადოება წინ არ წასულიყო. რომ არა ქართველი ხალხის დიდი სიბრძნე, ბიძინა ივანიშვილი და „ქართული ოცნება“, რა თქმა უნდა, სააკაშვილი და მისი აგენტურული ძალა ხელისუფლებაში დაბრუნდებოდნენ. ეს ხალხი ქვეყანაში სისხლის კალოს კვლავ დაატრიალებდა, რაც არაერთხელ გაუკეთებიათ ხელისუფლებაში ყოფნის დროს“, – განაცხადა მათიკაშვილმა.

შეგახსენებთ, რომ საქართველოს ყოფილმა პრეზიდენტმა, მიხეილ სააკაშვილმა დაწერა: „ახლა არავის გარიყვის დრო არ არის, ქვეყანაში არსებული ნამდვილი ლიდერი (ლიდერები) აუცილებლად უნდა იქნეს გამოყენებული, მაგრამ იმის გათვალისწინებით, რომ ლიდერი ციხეშია“.