დარგობრივი ეკონომიკისა და ეკონომიკური პოლიტიკის კომიტეტმა „მაუწყებლობის შესახებ“ კანონში ცვლილებაზე იმსჯელა

პარლამენტის დარგობრივი ეკონომიკისა და ეკონომიკური პოლიტიკის კომიტეტმა „მაუწყებლობის შესახებ“ კანონში ცვლილებაზე იმსჯელა.  პროექტი მაუწყებლობის სახეობებზე ახალი კულტურულ-შემოქმედებითი რადიომაუწყებლობის დამატებას ითვალისწინებს.

კანონპროექტი მომხსენებელმა, კულტურის კომიტეტის თავმჯდომარემ, გიორგი გაბუნიამ წარადგინა. მისი განმარტებით, წარმოდგენილი ცვლილება განპირობებულია ადმინისტრაციული ორგანოს მიერ კულტურულ-შემოქმედებითი თემატიკით დატვირთული რადიომაუწყებლობის ფუნქციონირების აუცილებლობით.

„მაუწყებლობის შესახებ“ საქართველოს კანონის მოქმედი რედაქცია არ ითვალისწინებს ადმინისტრაციული ორგანოს მიერ კულტურულ-შემოქმედებითი რადიომაუწყებლობის  განხორციელების შესაძლებლობას. შესაბამისად, აღნიშნული მიზნების მისაღწევად, საჭირო  გახდა კანონში ცვლილებების განხორციელება“, - განაცხადა გიორგი გაბუნიამ.

პროექტით წესრიგდება კულტურულ-შემოქმედებითი რადიომაუწყებლობის ფუნქციონირების ხელშეწყობის საკითხები, როგორიცაა: რადიომაუწყებლობის პროგრამების სახელმწიფო ენაზე განთავსება; ჩამოყალიბდება ლიცენზიის გაცემის და ავტორიზაციის ერთიანი წესი;  განისაზღვრება კულტურულ-შემოქმედებითი რადიომაუწყებლობის დაფინანსების წესი და რადიომაუწყებლობის ლიცენზიის მფლობელს განესაზღვრება სამაუწყებლო სიხშირეებით სარგებლობის წესი. ასევე, კულტურულ-შემოქმედებით რადიომაუწყებლობაში აიკრძალება ტელეშოპინგი.საკითხის განხილვის ამოწურვის შემდეგ კომიტეტის წევრებმა მხარი დაუჭირეს განხილულ კანონპროექტს.