დარგობრივი ეკონომიკისა და ეკონომიკური პოლიტიკის კომიტეტმა „იარაღის შესახებ“კანონში ცვლილებებზე იმსჯელა

დარგობრივი ეკონომიკისა და ეკონომიკური პოლიტიკის კომიტეტმა პირველი მოსმენით განიხილა კანონპროექტი „იარაღის შესახებ“ საქართველოს კანონში ცვლილების შეტანის თაობაზე“.

წარმოდგენილი ცვლილება ითვალისწინებს ერთიანი საინფორმაციო ბაზის შექმნას, სადაც აღრიცხული და თავმოყრილი იქნება მონაცემები ფსიქიკური ჯანმრთელობის პრობლემის მქონე, ალკოჰოლიზმით, ნარკომანიით ანდა ტოქსიკომანიით დაავადებულ პირთა შესახებ.

მომხსენებელმა, შინაგან საქმეთა მინისტრის მოადგილემ ალექსანდრე დარახველიძემ კანონპროექტის წარდგენისას აღნიშნა, რომ ლიცენზიის, ნებართვის გაცემისას პირი წარადგენს შესაბამის მოწმობას ჯანმრთელობის შესახებ, მაგრამ შესაძლოა შემდგომში პირს შეეცვალოს ჯანმრთელობის მდგომარეობა. სწორედ ამიტომ საჭირო გახდა ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს ბაზაზე შესაბამისი სამსახურის შექმნა.

საქართველოს კანონმდებლობით აღნიშნული ბაზით ისარგებლებენ ლიცენზიის (ნებართვის) გამცემი ორგანოები. არსობრივი განხილვის შემდეგ კომიტეტმა მხარი დაუჭირა „იარაღის შესახებ“ კანონში განხორციელებულ ცვლილებას და მისგან გამომდინარე საკანონმდებლო პაკეტს.