99% ყველა ის თანხა, რომელიც მობილიზდებოდა ამ ფონდში, ხმარდებოდა იმ დესტრუქციას და იმ გადატრიალების მცდელობას, ესენი იყვნენ ჭანჭიკი იმ დიდ სქემაში, რომელიც გამჟღავნდა მსოფლიოში - ირაკლი კირცხალია არასამთავრობო ორგანიზაციების ანგარიშების ყადაღაზე

"99% ყველა ის თანხა, რომელიც მობილიზდებოდა ამ ფონდში, ხმარდებოდა იმ დესტრუქციას და გადატრიალების მცდელობას, ესენი იყვნენ ერთ-ერთი ჭანჭიკი იმ დიდ სქემაში, რომელიც გამჟღავნდა მსოფლიოში", - ასე ეხმაურება პარლამენტის ფრაქცია "ქართული ოცნების" თავმჯდომარის პირველი მოადგილე, ირაკლი კირცხალია არასამთავრობო ორგანიზაციის ანგარიშების დაყადაღებას.

მისი თქმით, თანხების ძირითადი ნაწილი მიმართული იყო დესტრუქციისა და გადატრიალების მცდელობისკენ.

"ესენი იყვნენ ფონდები, ესენი იყვნენ მერე ქვე-ფონდები, რომელიც ასი პროცენტით რომ ავიღოთ, 1%-ს შენიღბვის გზით და ამისთვის თავიანთივე მედიებს და ასე ვთქვათ, სოციალურ პლატფორმებს იყენებდნენ, რომ შეენიღბათ, თითქოს საქველმოქმედო აქციებს აწარმოებდნენ ქვეყანაში, ან რომელიმე ოჯახს გააპიარებდნენ, 99% ყველა ის თანხა, რომელიც მობილიზდებოდა ამ ფონდში, ხმარდებოდა იმ დესტრუქციას და გადატრიალების მცდელობას. ესენი იყვნენ ერთ-ერთი ჭანჭიკი იმ დიდ სქემაში, რომელიც გამჟღავნდა მსოფლიოში, არ მხოლოდ ჩვენს ქვეყანაში და ეხმარებოდა ჯარიმის გადახდას, პიროტექნიკის შეძენას, არ გამოვრიცხავ ხელფასების გადახდას და ა.შ. ისინი ხომ არიან ასე ვთქვათ, შვილობილები იმ დონორების, ესენი არიან იმ პოლიტიკის გამგრძელებლები, რომელიც გამოაშკარავდა და დღის შუქი ნახა ყველა იმ ბინძურმა საქმიანობამ, ყველა იმ არაპროფილურმა დაფინანსებამ, რომელიც მოდიოდა ერთი მთავარი დონორი USAID-ის მხრიდან და ეს გამოააშკარავა თვითონ ამერიკის შეერთებულმა შტატებმა," - აცხადებს ირაკლი კირცხალია.

მესამე დღეა შვიდი არასამთავრობო ორგანიზაციის ანგარიშები დაყადაღებულია. სასამართლოში პროკურატურის შუამდგომლობის საფუძველი, აქციის მონაწილეთა სპეციალური საშუალებებით აღჭურვა გახდა, რომელიც საგამოძიებო უწყების ინფორმაციით, ენჯეოების სახსრებით ხდებოდა. გამოძიების ფარგლებში სულ დაყადაღებულია 12ი ენჯეოს და ფონდის ანგარიშები. არსებული ინფორმაციით „საქართველოს დემოკრატიულმა ინიციატივამ“, და ნანუკას ფონდმა ჯარიმებისთვის, პატიმრებისა და მათი ოჯახებისთვის 300ი ათას ლარზე მეტი დახარჯეს. ქართული ოცნებისთვის ეს არის კიდევ ერთი დასტური, რომ არასამთავრობო ორგანიზაციები და საქველმოქმედო ფონდები მათი წესდების მიღმა, ქვეყნისთვის საზიანო მოქმედებებში მონაწილეობდნენ.