უკრაინელი მოსწავლეები და სტუდენტები „ეროვნული წინააღმდეგობის საფუძვლების“ კურსს შეისწავლიან, რომელიც იარაღის გამოყენების სწავლებასაც ითვალისწინებს

უკრაინელი სკოლის მოსწავლეები და სტუდენტები, სქესის მიუხედავად, ამიერიდან შეისწავლიან კურსს „ეროვნული წინააღმდეგობის საფუძვლები“, მათ შორის ცეცხლსასროლი იარაღის გამოყენების სწავლებას. ამის შესახებ უკრაინის უმაღლესი რადას განცხადებაშია აღნიშნული.

უკრაინის პრეზიდენტმა, ვოლოდიმირ ზელენსკიმ ხელი მოაწერა კანონს მოქალაქეების ეროვნული წინააღმდეგობისთვის მომზადების გარკვეული საკითხების შესახებ.

დოკუმენტი წარმოადგენს ახალ სასწავლო მოდელს, რომელიც ინტეგრირებულია საგანმანათლებლო პროცესში ყველა დონეზე, საშუალო სკოლიდან უმაღლეს განათლებამდე. ცვლილებები ითვალისწინებს „ეროვნული წინააღმდეგობის საფუძვლების“ დისციპლინის დანერგვას, სპეციალური სასწავლო ცენტრების შექმნას და არეგულირებს ცეცხლსასროლი იარაღის გამოყენებას პრაქტიკული წვრთნებისთვის. შესაბამისი კანონი, No13347, პარლამენტმა 2026 წლის 25 მარტს დაამტკიცა.

უკრაინელი სტუდენტები და სკოლის მოსწავლეები პროფესიონალი ინსტრუქტორების ხელმძღვანელობით, ეროვნული თავდაცვის უნარ-ჩვევებს შეიძენენ. ცეცხლსასროლი იარაღის გამოყენების წვრთნები ჩატარდება უკრაინის შეიარაღებული ძალების საწვრთნელ პოლიგონებზე, სერტიფიცირებულ სასროლეთებსა და თანამედროვე ინტერაქტიურ სიმულატორებზე.

პირებს, რომელთა რელიგიური შეხედულებები კრძალავს იარაღის გამოყენებას, შეუძლიათ, კურსის „შეიარაღებული“ მოდულების ნაცვლად სხვა სასწავლო კომპონენტები აირჩიონ. შეზღუდული შესაძლებლობის მქონე პირები ან ისინი, ვინც დაკარგეს შრომისუნარიანობა, თავისუფლდებიან პრაქტიკული სწავლებისგან.