თურქეთის ვაჭრობის სამინისტროში აცხადებენ, რომ მათი ერთ-ერთი მთავარი მიზანია აზერბაიჯანს, საქართველოსა და თურქეთს შორის ტრანზიტის პროცედურების გამარტივება, რაც ახალ ინვესტიციებსაც გამოიწვევს

ჩვენი ერთ-ერთი მთავარი მიზანია აზერბაიჯანს, საქართველოსა და თურქეთს შორის ტრანზიტის პროცედურების გამარტივება, სასაზღვრო გამშვებ პუნქტებზე ლოდინის დროის აღმოფხვრა და ამ ქვეყნების მიერ საერთაშორისო სტანდარტების დანერგვის გზით ვაჭრობისა და ტრანზიტის პროცესების ხელშეწყობის მიზნით საჭირო ინფრასტრუქტურის შექმნა, – ამის შესახებ თურქეთის ვაჭრობის მინისტრის მოადგილემ, სეზაი უჩარმაკმა ჟურნალისტებს აზერბაიჯანის, საქართველოსა და თურქეთის მთავრობებს შორის საბაჟო საკითხებზე სამმხრივი კომიტეტის მე-5 შეხვედრაზე განუცხადა.

მისივე თქმით, აღნიშნულ სამ ქვეყანას ძალიან მნიშვნელოვანი პოზიცია უჭირავს როგორც საერთაშორისო ტრანზიტისა და მეზობლური ურთიერთობების ფარგლებში, ასევე აღმოსავლეთ-დასავლეთის ვაჭრობაში.

სეზაი უჩარმაკის განცხადებით, სამივე ქვეყანაში მნიშვნელოვანი ინვესტიციები ხორციელდება საგზაო, სარკინიგზო და საზღვაო ტრანსპორტის ინფრასტრუქტურაში.

„ჩვენ ამას ნათლად ვხედავთ. როდესაც დროდადრო ვსტუმრობ საქართველოს, ვაკვირდები გზების განვითარებას. ჩვენ იგივე განვითარებას ვხედავთ ინფრასტრუქტურაში აზერბაიჯანშიც. აქ ერთი რამ უნდა აღვნიშნოთ: დასავლეთში მოხმარებაა, ხოლო აღმოსავლეთში წარმოება ხდება. ბუნებრივია, ამ მიმართულებით ტვირთებისა და საქონლის მნიშვნელოვანი მოძრაობაა. თუმცა, იმ გეოგრაფიულ მდებარეობაში, სადაც ჩვენ ვიმყოფებით, კერძოდ, იმ მარშრუტზე, რომელსაც ჩვენ შუა დერეფანს ვუწოდებთ, საერთო სატრანზიტო გამტარუნარიანობა ამჟამად საკმაოდ დაბალია. თუ ინფრასტრუქტურა კიდევ უფრო განვითარდება, პროცედურები გამარტივდება და ყველა პროცესი ერთმანეთთან ჰარმონიზდება და ერთიან სისტემაში მოხვდება, ჩვენ გვჯერა, რომ ეს სატრანზიტო მოძრაობა კიდევ უფრო გაიზრდება. მე ამას მხოლოდ ტრანსპორტირების თვალსაზრისით არ ვაფასებ. ეს პროცესი ახალ ინვესტიციებსაც გამოიწვევს. რადგან საქონლით ვაჭრობას ეს მახასიათებელი აქვს: შეუძლებელია მნიშვნელოვანი ეკონომიკური ღირებულების შექმნა მხოლოდ საქონლის ერთი წერტილიდან გადატანით და მეორეში გადატანით“, – განაცხადა მან.