სოციოლოგიური გამოკითხვის მიხედვით, ესტონეთის მმართველი კოალიციის მხარდაჭერა რეკორდულად დაბალ ნიშნულზეა

სოციოლოგიური გამოკითხვის მიხედვით, ესტონეთის მმართველი კოალიციის მხარდაჭერა რეკორდულად დაბალ ნიშნულზეა. სოციოლოგიური გამოკითხვის შედეგებს ესტონეთის საზოგადოებრივი მაუწყებელი ავრცელებს.

კვლევა სოციოლოგიურმა სამსახურმა Norstat-მა ჩაატარა. გამოკითხვის თანახმად, მმართველი კოალიციის ჯამური რეიტინგი 12,7%-ს შეადგენს, რაც Norstat-ის გამოკითხვების ისტორიაში ყველაზე დაბალი მაჩვენებელია. ოპოზიციურ პარტიებს ერთად გამოკითხულთა 79,6% უჭერს მხარს. ესტონეთის მმართველი კოალიციაში შემავალი პარტიებია „რეფორმების პარტია“ და Eesti 200.

სოციოლოგიური კვლევის თანახმად, ამომრჩეველთა ყველაზე დიდი მხარდაჭერით პარტია Isamaa სარგებლობს, რომელსაც გამოკითხულთა 29% უჭერს მხარს. მეორე ადგილზე ცენტრისტული პარტიაა, რომლის რეიტინგი 21,7%-ია, მესამეზე – პარტია EKRE, რომელსაც გამოკითხულთა 16,4% უჭერს მხარს. მეოთხე პოზიციაზეა სოციალ-დემოკრატიული პარტიაა 12,5%-ით.

სამთავრობო კოალიციაში შემავალი „რეფორმების პარტია“ რეიტინგში მეხუთე პოზიციაზეა, მას გამოკითხულთა 10,6% ემხრობა. მეექვსე ადგილზეა არასაპარლამენტო პარტია „მემარჯვენეები“ 5,7%-ით. ხოლო „რეფორმების პარტიასთან“ ერთად მმართველ კოალიციაში შემავალ Eesti 200-ს რესპონდენტთა 2,1% უჭერს მხარს.

ამჟამად მმართველი კოალიცია ესტონეთის 101-მანდატიან პარლამენტში 52 მანდატს ფლობს.

სოციოლოგიური კვლევის დროს გამოიკითხა 18 წელს გადაცილებული 4000 მოქალაქე. გამოკითხვა 6 ოქტომბრიდან 2 ნოემბრამდე პერიოდში ჩატარდა.