მოსახლეობას წონის კლების სანაცვლოდ ხორცს დაურიგებენ - უჩვეულო აქცია ჩინეთში

ჩინეთის ერთ-ერთ რაიონში უჩვეულო აქცია დაიწყო: ადგილობრივ მოსახლეობას წონის დაკლების სანაცვლოდ ხორცს ურიგებენ. ამის შესახებ South China Morning Post იუწყება.

აქციის პირობების მიხედვით, რომელიც ძიანგსუს პროვინციის ქალაქ უსის ლიანსის რაიონში მიმდინარეობს, მონაწილეებს შეუძლიათ მიიღონ ნახევარი კილოგრამი ძროხის ხორცი ყოველი დაკლებული ნახევარი კილოგრამი წონის ნაცვლად. პროგრამის დაწყებიდან (9 მარტიდან) პირველ სამ დღეში განაცხადი უკვე 2,400-ზე მეტმა ადამიანმა შეიტანა.

აქციაში მონაწილეობა მხოლოდ ადგილობრივ მოსახლეობას შეუძლია, რომლებიც იხდიან სადაზღვევო შენატანებს ან აქვთ სამედიცინო დაზღვევა. მონაწილეები უნდა აკმაყოფილებდნენ გარკვეულ კრიტერიუმებს: სხეულის მასის ინდექსი უნდა აღემატებოდეს 23-ს, ხოლო წელის გარშემოწერილობა უნდა იყოს 80 სმ-ზე მეტი ქალებისთვის და 90 სმ-ზე მეტი მამაკაცებისთვის. გაზომვები 27 მარტამდე გაგრძელდება, ხოლო განმეორებითი აწონვა და ჯილდოს მიღება 2027 წლის დასაწყისში იქნება შესაძლებელი.

ინიციატივამ დიდი გამოხმაურება გამოიწვია სოციალურ ქსელებში, სხვა რეგიონების მომხმარებლები წერენ, რომ მსგავსი პროგრამის გამო სიამოვნებით გადავიდოდნენ ამ რაიონში საცხოვრებლად. ადგილობრივი ხელისუფლება მოქალაქეებს მოუწოდებს, არ მიმართონ უკიდურეს მეთოდებს და იზრუნონ ჯანმრთელობაზე. ორგანიზატორები ხაზს უსვამენ, რომ აქციის მთავარი მიზანი ჯანსაღი ცხოვრების წესის წახალისებაა.