ჩრდილოეთ ევროპისა და ბალტიის ქვეყნების ლიდერები მოუწოდებენ პუტინს, დაეთანხმოს 30-დღიან ცეცხლის შეწყვეტას

ჩრდილოეთ ევროპისა და ბალტიის ქვეყნების ლიდერები ვლადიმერ პუტინს მოუწოდებენ, დაეთანხმოს დაუყოვნებლივ და უპირობო 30-დღიან ცეცხლის შეწყვეტას უკრაინაში. საუბარია დანიის, ისლანდიის, შვედეთის, ნორვეგიის, ფინეთის, ლატვიის, ლიეტუვისა და ესტონეთის ლიდერებზე.

ამის შესახებ ნათქვამია ერთობლივ განცხადებაში, რომელიც ესტონეთის პრემიერ-მინისტრმა, კრისტენ მიხალმა გამოაქვეყნა.

„უკრაინას სურს მშვიდობა. ჩვენ, ჩრდილოეთ ევროპისა და ბალტიის ქვეყნებს, ასევე გვსურს მშვიდობა“, – ნათქვამია განცხადებაში.

ლიდერები აღნიშნავენ, რომ თუ ცეცხლის შეწყვეტის რეჟიმი არ იქნება დაცული, ევროკავშირი აშშ-სა და სხვა პარტნიორებთან ერთად იძულებული იქნება, რუსეთის წინააღმდეგ დამატებითი სანქციები მიიღოს.

„ეს არის პირველი ნაბიჯი სამართლიანი და მდგრადი მშვიდობისკენ. პრეზიდენტმა ზელენსკიმ არაერთხელ გამოავლინა მშვიდობისკენ გულწრფელი სწრაფვა, ასევე, პუტინთან შეხვედრის მზადყოფნა“, – აღნიშნულია განცხადებაში.