აშშ-ის სახელმწიფო დეპარტამენტმა, ახლო აღმოსავლეთში არსებული ვითარების გათვალისწინებით, ქვეყნის ყველა საელჩოს უსაფრთხოების შეფასება დაავალა - „ვაშინგტონ პოსტი“

აშშ-ის სახელმწიფო დეპარტამენტმა, ახლო აღმოსავლეთში არსებული ვითარების გათვალისწინებით, მსოფლიოს მასშტაბით ქვეყნის ყველა დიპლომატიურ მისიას უსაფრთხოების შეფასების დაუყოვნებლივ ჩატარება დაავალა. ამის შესახებ ინფორმაციას „ვაშინგტონ პოსტი“ ავრცელებს.

საელჩოებისთვის გაგზავნილ შეტყობინებაში, რომელიც „ვაშინგტონ პოსტმა“ მოიპოვა, აღნიშნულია, რომ მსოფლიოს ყველა საელჩომ საგანგებო კომიტეტები უნდა მოიწვიოს საფრთხეების იდენტიფიცირებისა და მათი შესაძლო წარმოშობის შემთხვევაში ზომების დაგეგმვისთვის. ასევე, მათი „უსაფრთხოების მდგომარეობის“ გადახედვისთვის.

დოკუმენტში, რომელსაც ხელს აწერს აშშ-ის სახელმწიფო მდივანი მარკო რუბიო, ნათქვამია, რომ ბრძანება მენეჯმენტის საკითხებში სახელმწიფო მდივნის მოადგილემ, ჯეისონ ევანსმა მიიღო.

ცნობისთვის, 17 მარტს თავდასხმები ხორციელდებოდა ერაყის „მწვანე ზონაზე“. სამიზნე ასევე გახდა აშშ-ის საელჩო, რომელიც „მწვანე ზონაში“ მდებარეობს. მოხერხდა ორი დრონის ჩამოგდება, თუმცა მესამე დრონი საელჩოს ტერიტორიაზე აფეთქდა. ერაყის დედაქალაქ ბაღდადის „მწვანე ზონაში“ აშშ-ის საელჩოს გარდა, განთავსებულია სხვა დიპლომატიური მისიებიც, საერთაშორისო ორგანიზაციები და სამთავრობო უწყებები. ასევე, ამ ზონაში ცხოვრობენ მაღალჩინოსნები და პოლიტიკოსები.