მარტივი მეთოდი, რომელიც ტვინის დაბერების პროცესს შეანელებს

რეგულარულმა ფიზიკურმა დატვირთვამ შესაძლოა ტვინი უკვე საშუალო ასაკშიც კი „ბიოლოგიურად უფრო ახალგაზრდა“ გახადოს. ასეთ დასკვნამდე მივიდნენ მკვლევრები, რომლებმაც კლინიკური კვლევის შედეგები გამოაქვეყნეს ჟურნალში Journal of Sport and Health Science (JSHS).

კვლევაში მონაწილეობდა 130 ჯანმრთელი, 26-დან 58 წლამდე ზრდასრული ადამიანი. ერთი წლის განმავლობაში მონაწილეთა ერთი ჯგუფი ასრულებდა საშუალო და მაღალი ინტენსივობის აერობიკულ ვარჯიშებს, კვირაში დაახლოებით 150 წუთის განმავლობაში, სპორტული მედიცინის რეკომენდაციების შესაბამისად, ხოლო მეორე ჯგუფი ფიზიკური აქტივობის ჩვეულ რეჟიმს არ ცვლიდა. კვლევის დასაწყისსა და ბოლოს მონაწილეებს ჩაუტარდათ თავის ტვინის მაგნიტურ-რეზონანსული ტომოგრაფია (MRI) და შეფასდა ე.წ. „ტვინის ასაკი“ - მაჩვენებელი, რომელიც ასახავს, რამდენად უფრო ახალგაზრდა ან ხნიერი ჩანს ტვინი ადამიანის რეალურ ასაკთან შედარებით.

შედეგებმა აჩვენა, რომ მათთან, ვინც რეგულარულად ასრულებდა ვარჯიშებს, „ტვინის ასაკი“ საშუალოდ დაახლოებით 0,6 წლით შემცირდა. საკონტროლო ჯგუფის მონაწილეებთან კი, პირიქით, ის ოდნავ გაიზარდა. ჯამში ჯგუფებს შორის სხვაობამ თითქმის ერთი წელი შეადგინა ფიზიკურად აქტიური ადამიანების სასარგებლოდ და ეს მხოლოდ 12 თვის განმავლობაში.

ავტორების თქმით, ერთი შეხედვით მცირე ცვლილებებსაც კი შეიძლება მნიშვნელოვანი მნიშვნელობა ჰქონდეს გრძელვადიან პერსპექტივაში.