ჩინეთში საქართველოს მთავრობის მეთაურის ვიზიტი გრძელდება - დღეს ქართული დელეგაცია საერთაშორისო იმპორტის გამოფენაში მიიღებს მონაწილეობას

მთავრობის მეთაურის ვიზიტი ჩინეთში გრძელდება. დღეს ქართული დელეგაცია საპატიო სტუმრის სტატუსით მიიღებს მონაწილეობას საერთაშორისო იმპორტის გამოფენაში.

საქართველოს პრემიერ-მინისტრის სამუშაო ვიზიტი ჩინეთში კოლეგასთან შეხვედრით დაიწყო. პრემიერს ლი ციანმა შანხაიში უმასპინძლა. სწორედ მისი მიწვევით იმყოფება ქართული დელეგაცია, ირაკლი კობახიძის ხელმძღვანელობით, ჩინეთში.

ორმხრივ შეხვედრაზე კოლეგებმა აღნიშნეს, რომ ორი ქვეყნის ურთიერთობაში მთავარია ურთიერთპატივისცემის, თანასწორობისა და თანამშრომლობის პრინციპები. ყურადღება გაამახვილეს ერთი სარტყელისა და გზის ფარგლებში შუა დერეფნის განვითარების მნიშვნელობაზე.

პრემიერ-მინისტრების სიტყვის შემდეგ, იყო ორ ქვეყანას შორის გაფორმებული თანამშრომლობის მემორანდუმებიც. მემორანდუმი გაფორმდა როგორც ეკონომიკის, ისე გარემოს დაცვისა და სოფლის მეურნეობის სამინისტროებს შორის.