1762335240

სამცხე-ჯავახეთის მხარეში სახელმწიფო რწმუნებული, მოადგილესთან და ბორჯომის მუნიციპალიტეტის ხელმძღვანელ პირებთან ერთად, სოფელ ტაბაწყურში, მოლითსა და ბალანთაში სასკოლო ინფრასტრუქტურას გაეცნო

სამცხე-ჯავახეთის მხარეში სახელმწიფო რწმუნებული ზაალ გელაშვილი, პირველ მოადგილესთან გიორგი ქოჩიაშვილთან, ბორჯომის მუნიციპალიტეტის მერის მოადგილესთან გიორგი ტაბატაძესთან და ბორჯომის საგანმანათლებლო რესურსცენტრის ხელმძღვანელთან ხათუნა ხარაზიშვილთან ერთად, სოფელ ტაბაწყურში, მოლითსა და ბალანთაში სასკოლო ინფრასტრუქტურას გაეცნო.ხელმძღვანელმა პირებმა ასევე დაათვალიერეს სოფელ ტაბაწყურში დასრულებული საგზაო პროექტი, რომელიც ტურისტული თვალსაზრისით მნიშვნელოვანია. პროექტის ფარგლებში 1.7 კილომეტრიან მონაკვეთზე მოეწყო ორფენიანი ასფალტბეტონის საფარი, სანიაღვრე არხები და წყალგამტარი მილ-ხიდები.აღნიშნულ სოფლებში საგზაო ინფრასტრუქტურის რეაბილიტაცია პირველად ხორციელდება. განახლებული გზა ადგილობრივი მოსახლეობისა და ტურისტების კომფორტულ გადაადგილებას უზრუნველყოფს.ტაბაწყურთან მისასვლელი, ახალქალაქი–ბორჯომის დამაკავშირებელი გზის რეაბილიტაცია 2020 წელს დაიწყო. პირველ ეტაპზე სოფელ ბალანთისა და ჭიხარულის მონაკვეთები განახლდა. პროექტის ფარგლებში ჯამში დაახლოებით 12 კილომეტრიანი საგზაო მონაკვეთი მოეწყო.სარეაბილიტაციო სამუშაოები ცენტრალური ბიუჯეტის დაფინანსებით განხორციელდა.

1762276327

ქუთაისისა და საბერძნეთის ქალაქ ნიკეას მეგობრობის 40 წლისთავთან დაკავშირებით საბერძნეთში ოფიციალური ვიზიტით ქართული დელეგაცია იმყოფება

ქუთაისისა და საბერძნეთის ქალაქ  ნიკეას მეგობრობის 40 წლისთავთან დაკავშირებით, თანამშრომლობის განახლების მიზნით, საბერძნეთის რესპუბლიკაში ოფიციალური  ვიზიტით იმყოფება ქართული დელეგაცია.3 ნოემბერს, ნიკეას მუნიციპალიტეტში, ქუთაისის მერმა დავით ერემეიშვილმა და ნიკეას მერმა კონსტანტინოს მარაგიკისმა ხელი მოაწერეს დოკუმენტს, ქუთაისსა და ნიკეას შორის მომავალი თანამშრომლობის შესახებ.მხარეებმა  სურვილი გამოთქვეს, ითანამშრომლონ კულტურის, განათლების, ახალგაზრდობის, სპორტის,  ტურიზმისა და გარემოს დაცვის სფეროებში, ადგილობრივი თვითმმართველობების გამოცდილების გაზიარების მიზნით.„ქუთაისსა და ნიკეას უკვე 40 წლიანი მეგობრობა აკავშირებთ. ქუთაისის ერთ-ერთ ყველზე დიდსა და ლამაზ უბანს ნიკეას სახელი ჰქვია, ხოლო ნიკეაში არის ქუთაისის ქუჩა.  სწორედ ამ მეგობრობის განსამტკიცებლად  ვეწვიეთ საბერძნეთს და ნიკეას მერთან, კონსტანტინოს მარაგიკისთან ერთად ხელი მოვაწერეთ დოკუმენტს, რომელიც თანამშრომლობის განახლებას გულისხმობს.ნიკეაში ვიმყოფებოდით ოფიციალური დელეგაციით, პარლამენტის წევრებთან ზაზა ლომინაძესა და გივი ჭიჭინაძესთან, იმერეთში სახელმწიფო რწმუნებულ ლევან ზალკალიანთან და აკაკი წერეთლის სახელმწიფო უნივერსიტეტის რექტორთან შალვა კირთაძესთან ერთად.მაღალ დონეზე ორაგნიზებული შეხვედრებისთვის მადლობა მინდა ვუთხრა , საქართველოს საგანგებო და სრულუფლებიან ელჩს საბერძნეთში ლევან ბერიძეს და  ათენის ქართული დიასპორის საზოგადოებრივი ცენტრის ხელმძღვანელს ნანა თევდორაძეს.“- განაცხადა დავით ერემეიშვილმა.ქუთაისის და ნიკეას მუნიციპალიტეტების დამეგობრების 40 წლისთავის აღნიშვნის ფარგლებში,  ნიკეაში კულტურული და სპორტული ღონისძიებები გაიმართა.

1762243535

პირველადი ჯანდაცვის რეფორმა გრძელდება - სამეგრელოში, სოფლის ახალი ამბულატორიები გაიხსნა

პირველადი ჯანდაცვის რეფორმა გრძელდება - სერვისების გეოგრაფიული გაზრდის მიზნით, სამეგრელოში - ნოჯიხევში, ჭითაწყარსა და მუხურში, სოფლის ახალი ამბულატორიები გაიხსნა.სამედიცინო დაწესებულებები ჩხოროწყუს, ხობისა და ზუგდიდის მუნიციპალიტეტების, 15 სოფლის მოსახლეობას ემსახურება.ამბულატორიებში ჯანდაცვის მინისტრი იმყოფებოდა. მიხეილ სარჯველაძემ, ქვეყანაში მიმდინარე პირველადი ჯანდაცვის წარმატებულ რეფორმასა და მის მნიშვნელობაზე ისაუბრა.მისი განცხადებით, სწორედ ამ რგოლის ეფექტური მუშაობა ასრულებს გარდამტეხ როლს სამედიცინო სერვისების თანაბარ ხელმისაწვდომობაზე, დროულ დიაგნოსტიკასა და მკურნალობაზე.ამბულატორიები დაკომპლექტებულია კვალიფიციური სამედიცინო პერსონალით და აღჭურვილია პირველადი ჯანდაცვის მომსახურებისთვის საჭირო ინვენტარით.მიხეილ სარჯველაძე ნოჯიხევში, ჭითაწყარსა და მუხურში, პაციენტებსაც შეხვდა და მათთან ერთად, სამედიცინო საკითხები და საჭიროებები განიხილა. მისი განცხადებით, სოფლებში, მაღალი ხარისხის პირველადი ჯანდაცვის სერვისების ხელმისაწვდომობის ზრდა უწყების პრიორიტეტია.ჯანდაცვის მინისტრთან ერთად, ხობის, ზუგდიდისა და ჩხოროწყუს მუნიციპალიტეტებში იმყოფებოდნენ: სამედიცინო ჰოლდინგის ხელმძღვანელები და ადგილობრივი ხელისუფლების წარმომადგენლები.აღსანიშნავია, რომ ქვეყნის მასშტაბით, კიდევ 12 სოფლის ამბულატორიის მშენებლობა მიმდინარეობს. გეოგრაფიული ხელმისაწვდომობის გაზრდის მიზნით, პირველადი ჯანდაცვის დაწესებულებების მშენებლობა მომავალშიც გაგრძელდება.ინფორმაციას ჯანდაცვის სამინისტრო ავრცელებს.

1762238605

დავით ლობჟანიძემ სტრუქტურული ერთეულის ხელმძღვანელებთან სამუშაო შეხვედრა გამართა

ონის მუნიციპალიტეტის მერმა დავით ლობჟანიძემ, მოადგილე ლევან შერაზადიშვილთან ერთად, პირველი სამუშაო შეხვედრა გამართა მუნიციპალიტეტის სტრუქტურული ერთეულებისა და შპს-ების ხელმძღვანელ პირებთან.შეხვედრის მიზანი იყო მიმდინარე პროცესების მიმოხილვა, არსებული გამოწვევების შეფასება და სამომავლო პრიორიტეტების განსაზღვრა.მერის მიერ ყურადღება გამახვილდა ისეთ საკითხებზე, რომლებიც ოპერატიულ და ეფექტიან რეაგირებას საჭიროებს. დავით ლობჟანიძემ ხაზგასმით აღნიშნა ერთიანი გუნდის მუშაობის მნიშვნელობა მუნიციპალიტეტის წინსვლისა და განვითარების საქმეში. „მინდა მადლობა გადაგიხადოთ თითოეულ თქვენგანს იმ შრომისა და პასუხისმგებლობისთვის, რაც დღემდე ჩადეთ ჩვენი მუნიციპალიტეტის განვითარებაში. ვიცით, რომ არსებობს გამოწვევები, თუმცა გვაქვს უდიდესი შესაძლებლობა, რომ ერთიანი ძალითა და პროფესიონალიზმით შევძლოთ სასიკეთო საქმეების კეთება ისე, რომ ჩვენი მოსახლეობა რეალურ ცვლილებებს იგრძნობს ყოველდღიურ ცხოვრებაში. ამ ამოცანების შესრულება მხოლოდ ერთიანი გუნდის ძალით არის შესაძლებელი,“ — განაცხადა ონის მუნიციპალიტეტის მერმა დავით ლობჟანიძემ

1762236156

ახალციხეში ახალი სამუსიკო სკოლის მშენებლობა აქტიურად მიმდინარეობს

ქალაქ ახალციხეში ახალი, თანამედროვე სტანდარტების შესაბამისი სამუსიკო სკოლის მშენებლობა აქტიურად მიმდინარეობს. სამუშაოებს ადგილზე გაეცნენ სამცხე-ჯავახეთის სახელმწიფო რწმუნებული ზაალ გელაშვილი, მისი მოადგილეები გიორგი ქოჩიაშვილი და სერგი მუშკუდიანი, ახალციხის მუნიციპალიტეტის მერი ვარლამ წიკლაური და საკრებულოს თავმჯდომარე საბა კბილაშვილი.პროექტის ფარგლებში აშენდება 4 სართულიანი შენობა, სადაც განთავსდება სასწავლო კლასები, საკონცერტო დარბაზი და სხვა საჭირო სივრცეები.ინფრასტრუქტურული სამუშაოები ფინანსდება რეგიონებში განსახორციელებელი პროექტების ფონდის და ადგილობრივი ბიუჯეტის თანხებით, ჯამში 3 587 156 ლარით.მშენებლობის დასრულების შემდეგ, სასწავლო პროცესი გაგრძელდება თანამედროვე და კეთილმოწყობილ გარემოში, რაც მნიშვნელოვანად შეუწყობს ხელს მუსიკალური განათლების განვითარებას ახალციხეში.

1762182529

ცაგერის მუნიციპალიტეტის მერმა დამსახურებულ პედაგოგს, ბაბუცა ლაჭყეპიანს 98 წლის იუბილე მიულოცა

ცაგერის მუნიციპალიტეტის მერმა, ჭაბუკი ჭაბუკიანმა, დამსახურებულ პედაგოგს — ბაბუცა ლაჭყეპიანს , 98 წლის იუბილე სოფელ დეხვირში, ოჯახში მიულოცა.ღვაწლმოსილ ქალბატონს იუბილე, ასევე, მიულოცეს მერის პირველმა მოადგილემ რევაზ ახვლედიანმა, საკრებულოს თავმჯდომარემ ვასილ საღინაძემ, საკრებულოს თავმჯდომარის პირველმა მოადგილემ რეზო ხეცურიანმა და ლასურიაშის თემის მაჟორიტარმა დეპუტატმა თამაზ ჭაბუკიანმა.ბაბუცა ლაჭყეპიანი 1927 წელს სოფელ ლასხანაში დაიბადა. ქუთაისის პედაგოგიური ინსტიტუტის დამთავრების შემდეგ, 47 წლის განმავლობაში, გეოგრაფიის მასწავლებლად მუშაობდა ლეჩხუმისა და სვანეთის სხვადასხვა სკოლებში. ჰყავს შვილები, შვილიშვილები და შვილთაშვილები.„ვულოცავ ქალბატონ ბაბუცას იუბილეს. ძალიან სასიამოვნოა, როდესაც ჩვენს გვერდით არიან ისეთი ადამიანები, რომლებიც თავიანთი ხანგრძლივი და ღირსეული ცხოვრებით კვლავ საუკეთესო  მაგალითს აძლევენ საზოგადოებას. ვუსურვებ ჯანმრთელობას,ბედნიერებას და დიდხანს სიცოცხლეს  ამ ღირსეულ ლეჩხუმელ ქალბატონს"— აღნიშნა ჭაბუკი ჭაბუკიანმა.

1762174171

ოზურგეთის მუნიციპალიტეტის მერმა პაატა კუნჭულიამ მერიის სამსახურებისა და განყოფილებების უფროსებთან პირველი სამუშაო შეხვედრა გამართა

ოზურგეთის მუნიციპალიტეტის მერმა პაატა კუნჭულიამ მერიის სამსახურებისა და განყოფილებების უფროსებთან პირველი სამუშაო შეხვედრა გამართა.შეხვედრაზე განიხილეს როგორც მიმდინარე საკითხები, ასევე სამომავლო გეგმები.პაატა კუნჭულიამ ხაზი გაუსვა, რომ ოზურგეთის მერიის საქმიანობა მოქალაქეებისთვის შეუფერხებლად უნდა გაგრძელდეს. მერის თქმით, სამუშაო შეხვედრები ყოველკვირეულად გაიმართება, რაც თანამშრომლობისა და პროცესების კოორდინაციის კიდევ უფრო ეფექტურ განხორციელებას შეუწყობს ხელს.შეხვედრას მერის მოადგილეები - ბექა ჩხიკვიშვილი, გურამ გოლიაძე და სოფო რამიშვილი ესწრებოდნენ.

1762072267

იტალიაში 34 წლის ემიგრანტი გარდაიცვალა

იტალიაში გარდაცვლილი ქართველი ემიგრანტი ქალი წარმოშობით ყვარლის მუნიციპალიტეტის სოფელ ახალსოფლიდანაა.38 წლის ნანიკო სირაძის მეგობრების ინფორმაციით, სირაძე წლების განმავლობაში ქალაქ მილანში ცხოვრობდა და მუშაობდა.ბოლო პერიოდში ემიგრანტი ქალი მძიმე სენს ებრძოდა და ჯანმრთელობის მდგომარეობის გაუარესების გამო, სამსახურის დატოვებაც კი მოუწია. ოჯახის წევრებმა ცხედრის საქართველოში გადმოსვენების პროცედურების დასაწყებად, საგარეო საქმეთა სამინისტროს მიმართეს.ემიგრანტთა თემის წარმომადგენლები სოციალურ ქსელებში სირაძის ახლობლებს თანაგრძნობას უცხადებენ.

1761928342

ვარლამ წიკლაური სკოლამდელი აღზრდის დაწესებულებისა ადმინისტრაციასა და საბავშვო ბაგა-ბაღების მენეჯერებს შეხვდა

ახალციხის მუნიციპალიტეტის მერი ვარლამ წიკლაური სკოლამდელი აღზრდის დაწესებულების ადმინისტრაციასა და საბავშვო ბაგა-ბაღების მენეჯერებს შეხვდა. შეხვედრას მერის მოადგილეები რუბენ კარაპეტიანი და ნოდარ ტატალიშვილი ესწრებოდნენ.გაცნობითი ხასიათის შეხვედრაზე მუნიციპალიტეტის ხელმძღვანელი დაწესებულების მუშაობის სპეციფიკითა და საბავშვო ბაგა-ბაღებში არსებული მდგომარეობით დაინტერესდა. აქცენტი გაკეთდა გამოწვევებზე და მათი მოგვარების აუცილებლობაზე.სკოლამდელი აღზრდის დაწესებულების დირექტორმა მარინა მერაბიშვილმა ადგილობრივი თვითმმართველობის ხელმძღვანელებს დეტალური ინფორმაცია მიაწოდა საბავშვო ბაგა-ბაღებში არსებულ პირობებზე, დანერგილ სიახლეებზე და სამომავლო გეგმებზე.როგორც, ვარლამ წიკლაურმა აღნიშნა, სკოლამდელი აღზრდის ხელშეწყობა არის სახელმწიფოს ერთ-ერთი უმთავრესი პრიორიტეტი, შესაბამისად მუნიციპალიტეტის მხრიდან საბავშვო ბაგა-ბაღებს ექნებათ მაქსიმალური მხარდაჭერა და ყველაფერი გაკეთდება, როგორც აღსაზრდელთათვის, ისე დასაქმებული პერსონალისთვის სათანადო პირობების შესაქმნელად.

1761928235

ვარლამ წიკლაური „ახალციხის ციხის“ თანამშრომლებს შეხვდა

ახალციხის მუნიციპალიტეტის მერი ვარლამ წიკლაური, მოადგილეებთან რუბენ კარაპეტიანთან და ნოდარ ტატალიშვილთან ერთად  „ახალციხის ციხის“ თანამშრომლებს შეხვდა.შეხვედრაზე  ვარლამ წიკლაურმა  მუნიციპალიტეტისათვის „ახალციხის ციხის“, როგორც  მთავარი ტურისტული ცენტრის და სავიზიტო ბარათის მნიშვნელობაზე ისაუბრა და აღნიშნა, რომ ახალციხის მერიის მხრიდან ყველაფერი გაკეთდება მისი კიდევ უფრო  განვითარებისათვის.ვარლამ წიკლაურმა „ახალციხის ციხის“ თანამშრომლებს  მადლობა გადაუხადა თავდაუზოგავი მუშაობისთვის და აღნიშნა, რომ ერთობლივი ძალისხმევით ბევრი საინტერესო და მნიშვნელოვანი პროექტის განხორციელება იქნება შესაძლებელი.ახალციხის ციხის დირექტორმა ზაზა თამარაშვილმა, მუნიციპალიტეტის ხელმძღვანელს ტურისტულ ობიექტზე არსებული მდგომარეობის,  ვიზიტორების მზარდი რაოდენობის და გასული წლის სტატისტიკის შესახებ დეტალური ინფორმაცია მიაწოდა.  ასევე, ისაუბრა ციხის ტერიტორიაზე  განხორციელებულ  სამუშაოებზე,  ღონისძიებებზე და სამომავლო გეგმებზე.

1761893905

პაპუნა მარგველიძემ ონის ახალი მერი დავით ლობჯანიძე თანამშრომლებს წარუდგინა

სახელმწიფო რწმუნებულმა რაჭა-ლეჩხუმ-ქვემო სვანეთის რეგიონში პაპუნა მარგველიძემ, ონის მუნიციპალიტეტის ახლად არჩეული მერი დავით ლობჟანიძე მერიის ადმინისტრაციის თანამშრომლებს, საკრებულოსა და აიპების ხელმძღვანელ პირებს წარუდგინა.სახელმწიფო რწმუნებულმა დავით ლობჯანიძეს წარმატებები უსურვა და იმედი გამოთქვა, რომ მისი საქმიანობა მუნიციპალიტეტს ბევრ სიკეთეს მოუტანს. პაპუნა მარგველიძემ ონის ყოფილ მერს სერგი ხიდეშელს გაწეული საქმიანობისთვის მადლობა გადაუხადა.დავით ლობჯანიძემ აღნიშნა, რომ მმართველი გუნდისა და ამომრჩევლის ნდობა მას აკისრებს პასუხისმგებლობას, მაქსიმუმი გააკეთოს მუნიციპალიტეტის განვითარებისთვის.„მინდა მადლობა გადაგიხადოთ იმ ნდობისა და მხარდაჭერისთვის, რაც ამ მნიშვნელოვან ეტაპზე გამომიცხადეთ. ეს არის უდიდესი პასუხისმგებლობა და ვალდებულება, ყოველდღიურად ვიმუშაო სრული პასუხისმგებლობით ჩვენი მუნიციპალიტეტის წინაშე არსებული ამოცანების წარმატებით შესასრულებლად.მჯერა, ერთიანი ძალისხმევით, გუნდურობითა და პროფესიონალიზმით შევძლებთ ჩვენი მუნიციპალიტეტის კიდევ უფრო განვითარებას“, - განაცხადა დავით ლობჯანიძემ.შეხვედრას ესწრებოდნენ სახელმწიფო რწმუნებულის პირველი მოადგილე ქრისტინა კობახიძე, რაჭა-ლეჩხუმ სვანეთის დელეგატის გოჩა ენუქიძის ბიუროს წარმომადგენელი ონში - ირმა ჩიხრაძე, მერიის სტრუქტურული ერთეულების ხელმძღვანელები და მუნიციპალიტეტის დაქვემდებარებაში მყოფი ა(ა)იპ-ების დირექტორები.

1761830068

ბორჯომის მუნიციპალიტეტის, მე-8 მოწვევის, საკრებულოს პირველი სხდომა გაიმართა

ბორჯომის მუნიციპალიტეტის, მე-8 მოწვევის, საკრებულოს პირველი სხდომა გაიმართა.ახლადარჩეული საკრებულოს პირველი სხდომა ბორჯომის N36 საოლქო საარჩევნო კომისიის თავმჯდომარემ თამარ რაზმაძემ გახსნა.მან დეპუტატებს ადგილობრივი თვითმმართველობის არჩევნების ერთიანი ოქმი წარუდგინა და არჩევნების შედეგების დოკუმენტაცია ახლადარჩეული საკრებულოს უხუცეს წევრს  ზურაბ კოპაძეს  გადასცა.საკრებულოს სხდომას ესწრებოდა ბორჯომის მუნიციპალიტეტის ახლადარჩეული მერი მამუკა გელაშვილი.დღესვე სხდომაზე, უმრავლესობის წარდგინებით, საკრებულოს თავმჯდომარის პოსტზე გიორგი ფერაძის კანდიდატურა  დასახელდა, რის შემდეგაც ფარული კენჭისყრით,  ხმათა უმრავლესობით საკრებულოს თავმჯდომარედ გიორგი ფერაძე დამტკიცდა.საკრებულოს ახლადარჩეულმა თავმჯდომარემ  პირველი მოადგილისა და მოადგილეების თანამდებობებზე ნიკოლოზ კიკნაძის, რევაზ ლაშხის და გენადი მუმლაძის კანდიდატურები დაასახელა.საკრებულოს წევრებმა წარმოდგენილი კანდიდატურები  ფარული კენჭისყრის შედეგად ხმათა უმრავლესობით დაამტკიცეს.ასევე, ფარული კენჭისყრით არჩეული იქნა ხუთი მუდმივმოქმედი კომისიის თავმჯდომარე: იურიდიულ საკითხთა კომისიის თავმჯდომარე - ოთარ არბოლიშვილი; ჯანდაცვისა და სოციალურ საკითხთა კომისიის თავმჯდომარე - სალომე თედელური; საფინანსო-საბიუჯეტო, ეკონომიკისა და ქონების მართვის კომისიის კომისიის - თავმჯდომარე ელზა კუჭუხიძე; აგრარულ საკითხთა კომისიის თავმჯდომარე - მერაბ იობაშვილი და კულტურის, განათლების, სპორტისა და ახალგაზრდულ საქმეთა კომისიის თავმჯდომარე -  მამუკა ლურსმანაშვილი.დეპუტატებმა, საკრებულოს სხდომაზე დაამტკიცეს ფრაქცია ,,ქართული ოცნება-დემოკრატიული საქართველოს" თავმჯდომარე ლევან თედიაშვილი და ფრაქცია ,, ხალხის ძალას" თავმჯდომარე ივანე შალუტაშვილი.მე-8 მოწვევის საკრებულო და თითოეული დეპუტატი, უფლებამოსილების ფარგლებში, კანონმდებლობის შესაბამისად, საქმიანობის შესრულებას დღეიდან ოფიციალურად შეუდგა.