კულტურა
1760009651
ნობელის პრემია ლიტერატურის დარგში უნგრელმა ლასლო კრასნაჰორკაიმ მიიღო
სტოკჰოლმში ლიტერატურის დარგში ნობელის პრემიის ლაურეატი დაასახელეს. 2025 წელს ჯილდო უნგრელმა მწერალმა ლასლო კრასნაჰორკაიმ მიიღო „დამაჯერებელი და წინასწარმეტყველური შემოქმედებისთვის, რომელიც აპოკალიფსური საშინელების შუაგულში ხელოვნების ძალას ადასტურებს“. კრასნაჰორკაის ყველაზე ცნობილი ნაწარმოებია „სატანური ტანგო“, „წინააღმდეგობის მელანქოლია“, „ომი და ომი“ და სხვები.
1759994868
აინშტაინის ვიოლინო აუქციონზე £860 ათასად გაიყიდა
ერთ-ერთი ყველაზე ცნობილი მეცნიერის, ალბერტ აინშტაინის ვიოლინო აუქციონზე £860 ათასად გაიყიდა.1894 წლის Zunterer-ის ვიოლინო აინშტაინის პირველ ინსტრუმენტად ითვლება და თავდაპირველად მოსალოდნელი იყო, რომ ის დაახლოებით £300 ათასად გაიყიდებოდა.Dominic Winter Auctioneers-ის მიერ გამართულ აუქციონზე ასევე გაიყიდა ფილოსოფიური წიგნი, რომელიც აინშტაინმა მეგობარს აჩუქა. მასში £2 200 გაიყიდეს.ყველა ფასს დაემატება დამატებითი 26.4%-ის ოდენობის საკომისიო გადასახადი, რაც იმას ნიშნავს, რომ ვიოლინოს საბოლოო ფასი £1 მილიონს გადააჭარბებს.
1759912747
საქართველოს კულტურის სამინისტროს მხარდაჭერით კულტურული მემკვიდრეობის დაცვის ეროვნული სააგენტო კასპის მუნიციპალიტეტის სოფელ ხოვლეში დიდი ქართველი მეცნიერისა და საზოგადო მოღვაწის, თბილისის სახელმწიფო უნივერსიტეტის ერთ-ერთი დამაარსებლის, ივანე ჯავახიშვილის სახლ-მუზეუმის სრულ რეაბილიტაციას იწყებს.სახლ-მუზეუმის მდგომარეობას კულტურული მემკვიდრეობის დაცვის ეროვნული სააგენტოს გენერალური დირექტორის პირველი მოადგილე თამარ ყურაშვილი, კასპის მუნიციპალიტეტის მერი ვახტანგ მაისურაძე, მერის მოადგილე ზურაბ კოპაძე და შიდა ქართლში სახელმწიფო რწმუნებულის მოადგილე მიხეილ ფავლენიშვილი ადგილზე გაეცნენ.სარეაბილიტაციო პროექტის ავტორმა ნინო ნოზაძემ, წარმოადგინა დეტალური ინფორმაცია განსახორციელებელ სამუშაოებთან დაკავშირებით. რეაბილიტაციის ფარგლებში გაიწმინდება და რესტავრირდება შენობის ფასადი, მოეწყობა ახალი სახურავი, რეკონსტრუქცია ჩაუტარდება აღმოსავლეთის ავარიული კედელს, მოეწყობა მარანი, ვიზიტორთა მიღებისა და მომსახურების ცენტრი, სახლ-მუზეუმის ტერიტორია ადაპტირებული იქნება შშმ პირთათვის.სახლ-მუზეუმი XIX საუკუნის ქართლის საერო არქიტექტურისთვის დამახასიათებელ სტილისტურ ნიშნებს ინახავს და წარმოადგენს თავადური საცხოვრებელი სახლის ნიმუშს. XX საუკუნის განმავლობაში არაერთი რეკონსტრუქციის მიუხედავად, სახლ-მუზეუმს ამ მასშტაბის რეაბილიტაცია არ ჩატარებია.ივანე ჯავახიშვილის სახლ-მუზეუმის რეაბილიტაციით რეგიონს შეემატება ვიზიტორთათვის საინტერესო კიდევ ერთი კულტურულ-საგანმანათლებლო სივრცე.საქართველოს კულტურული მემკვიდრეობის დაცვის ეროვნული სააგენტო განაგრძობს კულტურული მემკვიდრეობის ძეგლების დაცვა-აღდგენაზე ზრუნვას და ყოველწლიურად ათობით ობიექტის რეაბილიტაცია-კონსერვაციას ახორციელებს.ინფორმაციას კულტურული მემკვიდრეობის დაცვის ეროვნული სააგენტო ავრცელებს.
1759483797
იერუსალიმში დათო მაღრაძის წიგნის „ბარაქიანი მიწა“ პრეზენტაცია გაიმართება
30 ოქტომბერს, იერუსალიმში, პოეტ დათო მაღრაძის წიგნის „ბარაქიანი მიწა“ პრეზენტაცია გაიმართება.წიგნი ივრითზე თარგმნეს გალა - დანა და ნიკოდ ზინგერებმა და გამოსცა იერუსალიმის გამომცემლობა - GalaStudio - მ.წიგნის პრეზენტაცია იერუსალიმში, ისრაელის ცენტრალურ ბიბლიოთეკაში 13:00 საათზე გაიმართება. პრეზენტაცია იმართება ისრაელში საქართველოს საელჩოს ინიციატივით.
1759480107
პიანისტმა გიგი პიანომენმა 30 სექტემბერს ბათუმში პირველი სოლო კონცერტი გამართა. საღამო პროექტის "ქართული კლასიკური მუსიკის საღამოები“ ფარგლებში ჩატარდა.გიგი მსმენელის წინაშე ქალაქ ბათუმის ზაქარია ფალიაშვილის სახელობის სამუსიკო სასწავლებლის საკონცერტო დარბაზში წარსდგა. პიანისტმა ქართველი კომპოზიტორების ცნობილი სიმღერების ორიგინალური ვერსიები შეასრულა.მსმენელმა მუსიკოსთან ერთად იმღერა ლილი იაშვილის ცნობილი სიმღერა "ბათუმს ქათქათას". დამსწრე საზოგადოებამ გიგი მქუხარე აპლოდისმენტებითა და ხანგრძლივი ოვაციებით დააჯილდოვა.თამარ ლიჩელი, "ქართული კლასიკური მუსიკის საღამოების" ორგანიზატორი:- მოუთმენლად ველოდებოდით გიგის კონცერტს არაერთი მიზეზის გამო. პირველ რიგში იმიტომ, რომ ეს არის მისი პირველი კონცერტი ბათუმში. მახარებს ის ფაქტი, რომ ეს კონცერტი შედგა სწორედ ჩვენი პროექტის "ქართული კლასიკური მუსიკის საღამოების" ფარგლებში. როგორც ველოდით მეც, გიგიც და ყველა, ვინც მონაწილეობს ამ საღამოების ორგანიზებაში, მართლაც დაუვიწყარი კონცერტი გამოვიდა. ბათუმში ყოველთვის არის გამორჩეული მსმენელი, გამორჩეული აურა და ეს დღეც ამის დასტურია.გიგი პიანომენი, მუსიკოსი:- როგორი ქალაქიც არის ბათუმი, ზუსტად ისეთი მსმენელი მოვიდა. ისე გამახარეს და ისე იგრძნეს ყველაფერი, როგორც ქართულ სიმღერას და მუსიკას შეეფერება. ეს იყო ლამაზი ქართული საღამო გაჟღენთილი ქართული სულით. სწორედ ისეთი, როგორიც შეეფერება ლაღიძეს, ცაბაძეს, აზარაშვილს, კერესელიძეს, ცინცაძეს და სხვა გენიალურ ქართველ კომპოზიტორებს. ასი ათასი მადლობა ყველას. ძალიან ბედნიერი დღე იყო ჩემს ცხოვრებაში და იქნება დაუვიწყარი, რადგან ეს იყო ჩემი პირველი გამოსვლა ბათუმში. უღრმესი მადლობა ყველას - ორგანიზატორებს, მსმენელს, თითოეულ ადამიანს, ვინც ეს ზეიმი მოაწყო და დაუვიწყარი დღე გვაჩუქა. უბედნიერესი ვარ!"ქართული კლასიკური მუსიკის საღამოების" პირველი კონცერტი მაისის თვეში თბილისში, ვანო სარაჯიშვილის სახელობის სახელმწიფო კონსერვატორიაში ჩატარდა. თბილისსა და საქართველოს რეგიონებში დაგეგმილი კონცერტების მიზანია ქართული კლასიკური მუსიკის პოპულარიზაცია და საქართველოში მცხოვრები ქართველი მუსიკოსების გაერთიანება. "ქართული კლასიკური მუსიკის საღამოების" ფარგლებში მორიგი კონცერტი 21 ოქტომბერს ქალაქ ბორჯომში სასტუმრო “ბორჯომი ლიკანის" ტერიტორიაზე ჩატარდება. მასში მონაწილეობას მიიღებენ პიანისტები თამარ ლიჩელი, ვალერიან შიუკაშვილი, გიგი პიანომენი, ჩელისტი ლიზი რამიშვილი, ფლეიტისტი ირაკლი ევსტაფიშვილი, მევიოლინე გიორგი ხაინდრავა. კონცერტი 21 ოქტომბერს, ქალაქ ბორჯომში, 20:00 საათზე დაიწყება და მასზე დასწრება თავისუფალია. საკონცერტო სერიების ფარგლებში სრულდება როგორც ქართველ კლასიკოს კომპოზიტორთა შედევრები, ასევე ქართველი თანამედროვე ავტორების ნაწარმოებები: ზ. ფალიაშვილის, მ. ლაღიძის, ვ. აზარაშვილის, ბ. კვერნაძის, გ. ყანჩელის, ს. ბარდანაშვილის, ი.გეჯაძის, დ. არაყიშვილის, მ. ბალანჩივაძის, ს. ნასიძის, ნ. ჯანჯღავას ნაწარმოებები. გაიმართება ნაწარმოებების პრემიერებიც. „ქართული კლასიკური მუსიკის საღამოების" ფარგლებში კონცერტები მთელი წლის განმავლობაში ჩატარდება ქუთაისში, ბორჯომში, ბათუმში. პროექტის დასკვნითი საღამო თბილისში კონსერვატორიაში 5 დეკემბერს შედგება. „ქართული კლასიკური მუსიკის საღამოები“ მოიცავს საფორტეპიანო, კამერულსა და ვოკალურ მუსიკას. პროექტის ერთ-ერთ მთავარ მიზანს რეგიონებში ახალგაზრდა ნიჭიერ მუსიკოსებთან შეხვედრები წარმოადგენს. პროექტის ერთ-ერთი უმნიშვნელოვანესი მიზანია ქართული კლასიკური მუსიკის პოპულარიზაცია არა მხოლოდ თბილისში, არამედ საქართველოს რეგიონებში. 2025 წელს, გარდა კონცერტებისა, დაგეგმილია, ასევე, სხვადასხვა სამუსიკო სკოლაში დამწყებ მუსიკოსებთან შეხვედრა და მასტერკლასები . „ქართული კლასიკური მუსიკის საღამოები“ 2024 წელს დაფუძნდა და არა მხოლოდ მუსიკოსთა წრეში, არამედ ფართო საზოგადოებაში დიდი გამოხმაურება მოიპოვა. საკონცერტო სერიების მხარდამჭერია საქართველოს კულტურის სამინისტრო, ქალაქ თბილისის მერია, პარტნიორი: საქართველოს კომპოზიტორთა შემოქმედებითი კავშირი.
1758794998
ფინეთში კლიმტის დაკარგული ნახატის ესკიზი აღმოაჩინეს
ფინეთში ავსტრიელი სიმბოლისტი მხატვრის, გუსტავ კლიმტის ჩანახატი აღმოაჩინეს.ადგილობრივი მედიის ცნობით, ნახატი შემთხვევით, ჰელსინკის „ატენეუმის“ მუზეუმში ახალი გამოფენისთვის მზადების დროს იპოვეს. ესკიზი დაახლოებით 80 წლის განმავლობაში ფინეთის ეროვნული ბიბლიოთეკის საწყობში, მხატვრის პორტფოლიოში ინახებოდა.ჩანახატი გუსტავ კლიმტის ერთადერთი ორიგინალი ნამუშევარია ქვეყნის ტერიტორიაზე. სავარაუდოდ, ის კლიმტის დაკარგული ნახატის, „მეგობრების“ ესკიზია, რომელიც ნაცისტებმა მეორე მსოფლიო ომის დროს გაანადგურეს. ნახატი ფანქრითაა შესრულებული.
1758695089
თინათინ რუხაძე უნგრეთის ახლად დანიშნულ ელჩს შეხვდა
საქართველოს კულტურის მინისტრმა თინათინ რუხაძემ გაცნობითი შეხვედრა გამართა უნგრეთის ახლად დანიშნულ ელჩთან - პეტრა პონევაჩ-პანასთან.შეხვედრაზე ყურადღება გამახვილდა საქართველოსა და უნგრეთის მჭიდრო სტრატეგიულ პარტნიორობასა და კულტურის სხვადასხვა დარგში ნაყოფიერ თანამშრომლობაზე.საუბარი შეეხო 2026 წელს საქართველოსა და უნგრეთის კულტურის დღეების ჩატარების საკითხსა და 2027 წელს უნგრელი მხატვრის - მიხაი ზიჩის 200 წლისთავის ერთობლივი საიუბილეო ღონისძიებებით აღნიშვნას. ამ ინიციატივასთან დაკავშირებით გადაწყვეტილება UNESCO-ს გენერალურ კონფერენციაზე მიმდინარე წლის ნოემბერში იქნება მიღებული.შეხვედრაზე ყურადღება გამახვილდა სამუზეუმო საქმიანობის მიმართულებით თანამშრომლობის გაღრმავებაზე. მხარეებმა არსებული მჭიდრო პარტნიორობის გაძლიერების მიზნით სამომავლო თანამშრომლობის მზაობა გამოთქვეს.შეხვედრას საქართველოს კულტურის სამინისტროს საერთაშორისო ურთიერთობების დეპარტამენტის უფროსი ზურაბ ბაკურაძე, ხოლო უნგრეთის მხრიდან მისიის ხელმძღვანელის მოადგილე ჟოფია კელემენი ესწრებოდნენ.აღნიშნული თემები შეთანხმებულ იქნა საქართველოს კულტურის მინისტრის უნგრელ კოლეგასთან - ბალაშ ჰანკოსთან გამართულ შეხვედრაზე, რომელიც მიმდინარე წლის ივნისში, საქართველოს სამთავრობო დელეგაციის უნგრეთში ოფიციალური ვიზიტის ფარგლებში შედგა.ინფორმაციას კულტურის სამინისტრო ავრცელებს.
1758616440
ელისო ბოლქვაძე უნგრეთში ოფიციალური ვიზიტით იმყოფებოდა
აჭარის კულტურის მინისტრი, ელისო ბოლქვაძე, უნგრეთის კულტურისა და ინოვაციების მინისტრის, ბალაშ ჰანკოს მიწვევით, ოფიციალური ვიზიტით ბუდაპეშტში იმყოფებოდა. ინფორმაციას აჭარის მთავრობა ავრცელებს.ვიზიტის ფარგლებში ელისო ბოლქვაძე უნგრეთის კულტურისა და ინოვაციების, საჯარო ადმინისტრაციისა და რეგიონული განვითარების მინისტრებს შეხვდა. ასევე შეხვედრები გამართა უნგრეთის ეროვნული თეატრისა და ფილარმონიის ხელმძღვანელებსა და კულტურის სფეროს წარმომადგენლებთან.სამუშაო შეხვედრებზე საქართველო-უნგრეთს შორის, კულტურულ სფეროში ორმხრივი თანამშრომლობის გაღრმავებისა და რეგიონულ დონეზე კავშირების გაძლიერების შესაძლებლობები, ასევე სამომავლო გეგმები განიხილეს.მომავალი წლისთვის, ბათუმის სახელმწიფო დრამატული თეატრის ბუდაპეშტის საერთაშორისო თეატრალურ ფესტივალში მონაწილეობა და ბათუმის თოჯინების თეატრის გასტროლები დაიგეგმა.
1757505138
ცნობილი რეჟისორის, აკაკი ფოფხაძის ფილმის "სისხლის სახელით" ქართული პრემიერა 11 სექტემბერს გაიმართება
ქართველი რეჟისორის, აკაკი ფოფხაძის ფილმის "სისხლის სახელით" ქართული პრემიერა 11 სექტემბერს გაიმართება. (წარმოების ქვეყანა : საფრანგეთი, ბელგია, საქართველო, ავსტრია.)მსოფლიო პრემიერა 2024 წელს სან სებასტიანის ფესტივალზე შედგა. ფილმი, ძირითადად, ემიგრაციაზეა და, ამასთან, ქართულ თემატიკასთანაც არის კავშირში. “როდესაც 13 წლის ვიყავი, ჩემი ოჯახი იძულებული გახდა საქართველო დაეტოვებინა და საფრანგეთში წამოსულიყო. ემიგრაციის მდგომარეობას თან ახლდა სიდუხჭირე და დამცირება, რაც ჩემთვის დიდი კულტურული და ემოციური შოკი იყო. მე გავიზარდე ძირითადად მამაკაცურ გარემოში, ერთადერთი ქალი, ვისაც ვეყრდნობოდი, დედა იყო. სწორედ ამიტომ, ფილმში ყველაზე მნიშვნელოვანი ქალი პერსონაჟი დედაა. ძლიერი კაცებიც კი ყოველთვის ბავშვებად იქცევიან დედების წინაშე. ფილმით “სისხლის სახელით“ მსურდა ძალადობისა და შურისძიების მარცხის შესახებ მოთხრობა. ღრმად მწამს, რომ მამაკაცურობასა და ღირსების დევნაში სიჯიუტეს განადგურებამდე მიჰყავს ადამიანი. ფილმში ნანატრი შურისძიება ვერ ხორციელდება. ტოქსიკური მამაკაცურობა სიკვდილამდე მიდის. ძლიერი კაცები ნაგვის ურნებში ამთავრებენ,” - ამბობს აკაკი ფოფხაძე.ფილმმა უკვე მოიპოვა წარმატება, რივიერას კინოფესტივალზე, აკაკი ფოფხაძეს ფილმისთვის „სისხლის სახელით“ საუკეთესო რეჟისორის ჯილდო გადაეცა.აკაკი ფოფხაძე 1991 წელს საქართველოში დაიბადა, 13 წლამდე რუსეთში ცხოვრობდა, შემდეგ ოჯახთან ერთად ნიცაში გადავიდა. სწავლობდა ESRA-ს კინოსკოლაში. 2017 წელს გადაიღო „Le Soleil des nuits blanches“, რომელიც PÖFF Shorts-ზე (Tallinn Black Nights) აჩვენეს. 2018-ში გადაიღო „Je Vois“ – 36 წუთიანი ფილმი, რომელმაც მრავალი ჯილდო მიიღო, მათ შორის CNC-ის Prix de Qualité და „საუკეთესო რეჟისორის“ პრიზი Copenhagen Film Festival-ზე.
1756987166
8 სექტემბერს, 19:00 საათზე, თბილისის ოპერისა და ბალეტის თეატრში ახალი კულტურის განვითარების ფონდი– „მესმას“ ოფიციალური პრეზენტაცია გაიმართება.დაგეგმილი ღონისძიების შესახებ „პრაიმტაიმთან“ ნიკოლოზ წულუკიძე საუბრობს. მისი თქმით, ამ დღეს სცენაზე იდგებიან მსოფლიოს სხვადასხვა ქვეყანაში მოღვაწე ყველა თაობის არტისტები.„ღონისძიების რეჟისორი არის დათო საყვარელიძე, მუსიკალური ხელმძღვანელი კი ნიკა ნიკვაშვილი. ამ ღონისძიებაზე სახელოვნებო უნივერსიტეტის სტუდენტებს ენიშნებათ სტიპენდია. სპეციალურად ამ დღისთვის იანო ალიბეგაშვილი ჩამოდის იტალიიდან. ასევე, მე მოვყვები ისტორიებს, სადაც ჩანს, რა შედეგი მოიტანა ბიზნესისა და ქართული კულტურის ურთიერთობამ. ვისაუბრებ დიმიტრი ყიფიანზე, ნიკო ნიკოლაძესა და ივანე ჯავახიშვილზე, რაც ერთგვარი სინთეზი იქნება“, - გვითხრა ნიკოლოზ წულუკიძემ.ფონდის შექმნის ინსპირაციასა და მიზნებზე „პრაიმტაიმს“ ფონდის დირექტორი ნინი ჯაფარიძე ესაუბრა. მისი თქმით, ფონდი „მესმა“, ევროპული გამოცდილებისა და სტანდარტების გათვალისწინებით, შეიქმნა ინტელექტუალური საკუთრების მფლობელთა ასოციაცია “IPOA”-ს ინიციატივით:"ფონდის მიზანია, ითანამშრომლოს, როგორც კულტურის გამოჩენილ მოღვაწეებთან, ასევე მხარი დაუჭიროს ახალი თაობის შემოქმედებით აქტივობებს. 8 სექტემბერს თბილისის ოპერისა და ბალეტის თეატრში გაიმართება ფონდი „მესმას“ პრეზენტაცია, სადაც საფუძველი ჩაეყრება „მესმას“ თანამშრომლობას სახელოვნებო უნივერსიტეტებთან. მათ მიერ მოწოდებულ წარმატებულ სტუდენტებს დაენიშნებათ „მესმას“ სტიპენდიები. სწორედ ეს სტიპენდიები გახდება სიმბოლო ფონდის საქმიანობის დასაწყისის.ნინი ჯაფარიძის თქმით, ფონდის ძირითადი მიმართულება იქნება ახალი თაობის უნარებისა და შემოქმედებითი აქტივობის ხელშეწყობა.“ჩვენი ფონდი მხარს უჭერს სტუდენტებს, რომელთა მიზანია არა მხოლოდ სწავლა, არამედ ახალი უნარებისა და გამოცდილების შეძენა საქართველოში, თუ საზღვარგარეთ, რათა თავიანთი ცოდნით ხელი შეუწყონ საქართველოს მომავლის განვითარებას“, - ამბობს ნინი ჯაფარიძე
1756986000
სოხუმის გიორგი რატიანის სახელობის მოზარდ მაყურებელთა პროფესიული სახელმწიფო თეატრი, ყაზახეთის ქალაქ თალდიყორღანში მესამე საერთაშორისო თეატრალურ ფესტივალ „BIKEN FEST“-ში მიიღებს მონაწილეობას, სადაც 16 სექტემბერს მაყურებელს სპექტაკლს „რომეო და ჯულიეტა“ წარუდგენს.საფესტივალო სამზადისის ფარგლებში, აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე, აფხაზეთის განათლებისა და კულტურის მინისტრ ბექა ღვაჩლიანთან ერთად, სოხუმის გიორგი რატიანის სახელობის მოზარდ მაყურებელთა პროფესიული სახელმწიფო თეატრის სპექტაკლის რეპეტიციას დაესწრო.მთავრობის თავმჯდომარე დასის წევრებს შეხვდა, საერთაშორისო ფესტივალზე წარმატება უსურვა და ქართულ-აფხაზური კულტურის პოპულარიზაციის საქმეში სოხუმის მოზარდ მაყურებელთა თეატრის მნიშვნელოვან როლზე ისაუბრა.თეატრი საერთაშორისო ფესტივალზე საქართველოს კულტურის სამინისტროს ფინანსური მხარდაჭერით მონაწილეობს.
1756668479
ვენეციის 82-ე საერთაშორისო კინოფესტივალი - ვინ გახდება კინოკრიტიკოსების ფავორიტი?
ყოველი წლის აგვისტოს მიწურულს, "პალაცო დელ სინემას" დარბაზთან წითელი ხალიჩა იშლება, რაც იმაზე მიანიშნებს, რომ ვენეციის კინოფესტივალი დაიწყო.ოფიციალური ნაწილამდე, კინოინდუსტრიის წარმომადგენლები საგანგებოდ შერჩეულ ტანისამოსში, კამერების წინ პოზიორობდნენ. ვისი ლუქი დასახელდება საუკეთესოებს შორის - ამას მოდის კრიტიკოსებისგან უახლოეს დღეებში შევიტყობთ.ტრადიცია არ ირღვევა, უკვე 82-ედ ვენეციის კინოფორუმმა, ცხოვრებისეული და კარიერული მიღწევებისთვის, წლევანდელი ფავორიტი დაასახელა. საპატიო ოქროს ლომი გერმანელ რეჟისორსა და სცენარისტს, ვერნერ ჰერცოგს, ფრენსის ფონ კოპოლამ გადასცა.საერთაშორისო კინოფესტივალი იტალიელი რეჟისორის, პაოლო სორენტინოს პოლიტიკური დრამით გაიხსნა."გრაცია" ასე ჰქვია კინოსურათს, რომელიც რეჟისორის უახლესი ნამუშევარია. ფილმი იტალიის პრეზიდენტის მმართველობაზე გვიყვება. "გრაცია" ფესტივალის ერთ-ერთი ფავორიტია და მას წარმატებას უწინასწარმეტყველებენ.ფესტივალზე შედგა ბერძენი რეჟისორის სამეცნიერო ფანტასტიკური ჟანრის ფილმის პრემიერაც . "ბუგონია" იორგოს ლანთიმოსის ნამუშევარია. სიუჟეტი ორ შეთქმულებით შეპყრობილ ახალგაზრდა მამაკაცზე მოგვითხრობს. ისინი დიდი კომპანიის აღმასრულებელ დირექტორს იტაცებენ, რადგან ჰგონიათ, რომ ხელმძღვანელი უცხოპლანეტელია და დედამიწის განადგურება სურს.წითელ ხალიჩაზე გამოჩნდა მომხიბვლელი, ოსკაროსანი მსახიობი ჯულია რობერტსიც, რომელიც ვენეციიას მონაწილის სტატუსით პირველად ესტუმრა. მსახიობმა მონაწილეობა მიირო ლუკა გუადანინოს კრიმინალური დრამაში "ნადირობის შემდეგ," რომელიც ფესტივალზე არასაკონკურსო სექციაში აჩვენეს. ფილმი კოლეჯის მასწავლებლისა და მოსწავლის საიდუმლო ურთიერთობის შესახებ მოგვითხრობს.კუნძულ ლიდოსზე შეკრებილი ვარსკვლავები ფესტივალის მიმდინარეობისას ნახავენ გილერმო დელ ტოროს "ფრანკენშტეინს”, რომელიც გოთური რომანის სიუჟეტს არ ჰგავს. ორიგინალური ისტორიის შემდეგ 40 წელი გავიდა. დოქტორი პრეტორიუსი მონსტრს ეძებს, იმისთვის რომ ვიქტორ ფრანკენშტეინის ექსპერიმენტები გააგრძელოს.ვარსკვლავურია ნოა ბაუმბახის ფილმში მონაწილე მსახიობების შემადგენლობაც: ჯორჯ კლუნი, ადამ სენდლერი, ლორა დერნი და რაილი კიო. ფილმი ჯორჯ კლუნიზე ანუ ჯეი კელიზე გვიყვება, რომელსაც ევროპაში მოგზაურობა და ცხოვრების თავიდან დაწყება სურს.დრამატულ თავგადასავალს გვპირდება ამერიკელი რეჟისორი ბენი საფდი თავის ახალ ფილმში "დამსხვრეული მანქანა", რომელშიც მთავარ როლებს დუენ ჯონსონი და ემილი ბლანტი ასრულებენ.6 ძირითადი კატეგორია და 21 სრულმეტრაჟიანი კინოსურათი, მათგან საუკეთესოს 6 წევრისგან დაკომპლექტებული ჟიური გამოავლენს. მსოფლიოში ერთ-ერთი უძველესი კინოფესტივალის გამარჯვებულები 6 სექტემბერს დასახელდებიან.
