კონცერტი

1794980710

ანასტასია ჯულაყიძე-ლაღიძის სავიოლინო კონცერტის მსოფლიო პრემიერა

თბილისის ოპერისა და ბალეტის თეატრში საქართველოს კულტურის სამინისტროს, სსიპ „შემოქმედებითი საქართველო“-ს, ქალაქ თბილისის მერიის მხარდაჭერით ახალგაზრდა ქართველი კომპოზიტორის, ანასტასია ჯულაყიძე-ლაღიძის სავიოლინო კონცერტის “სატურნის პოემები” მსოფლიო პრემიერა გაიმართა. მუსიკალურ საღამოში მონაწილეობდნენ 88 მუსიკოსისგან შემდგარი ორკესტრი, ოპერის გუნდი და ქართველი სოლისტები. პრემიერა წარმოადგენდა რამდენიმე კლასიკური ჟანრის სინთეზს.ღონისძიების პირველი ნაწილი სრულად დაეთმო მსოფლიო პრემიერას - ვიოლინოსთვის დაწერილ ინოვაციურ ნაწარმოებს, რომელიც ოთხი ნაწილისგან შედგება. მუსიკალური კომპოზიცია შემოდგომის სევდიდან და შემოქმედის მარტოობის განცდიდან თანდათან იმედის კუნძულისკენ მიემართება, რაც თავისებური ნუგეშია ყველა ხელოვანისთვის. ნაწარმოების ფინალში, სოლო ვიოლინოსთან ერთად, გუნდი და სოლისტი სოპრანო პოლ ვერლენის „სატურნის პოემებს“ ააჟღერეს. კონცერტის მეორე ნაწილში მაყურებელმა მოისმინა ცნობილი არიები ოპერებიდან და ვოკალური ციკლები გუსტავ მალერის შემოქმედებიდან.საღამოში მონაწილეობდნენ ცნობილი ქართველი შემსრულებლები: ვერიკო ჭუმბურიძე, ირინა შერაზადიშვილი, ოთარ ჯორჯიკია, ზაალ ხელაია, ქეთევან პაპინაშვილი და ქეთევან კარდანახიშვილი. მსმენელის წინაშე წარსდგა ოპერისა და ბალეტის თეატრის ორკესტრი და გუნდი, ასევე თბილისის საერთაშორისო კამერული გუნდი „ბგერათა ფერი“. პრემიერას უდირიჟორა იოსებ ჯუღაშვილმა.ღონისძიებამ განსაკუთრებული ყურადღება დაუთმო ახალგაზრდა ხელოვანების მხარდაჭერას, რაც უმნიშვნელოვანესია ქვეყნის კულტურული განვითარებისთვის. პროექტის ფარგლებში შედგა დებიუტანტების ამირან მენოგნიშვილისა და ლუკა კაპანაძის სცენური დებიუტი.ოპერისა და ბალეტის თეატრის ცისფერ დარბაზში ახალგაზრდა მხატვრების ნამუშევრების საქველმოქმედო გამოფენა - გაყიდვა გაიმართა ,,ახალგაზრდები ახალგაზრდებისათვის", რომელშიც მონაწილეობა მიიღეს მხატვრებმა ლუკა პატარქალაშვილმა, თეზი ოსეფაიშვილმა, ლუკა კიკნაძემ, ირაკლი ჩიქოვანმა, ნატალია კუციამ და გიორგი კიკაძემ.სავიოლინო კონცერტის პარტნიორები და მხარდამჭერები არიან კომპანია RMG, შპს „ფავორიტი სტილი“, „პალიტრა ჰოლდინგი“, რადიო „ფორტუნა“, “სტეინვეი ჯორჯია”, “რენტალ ჯორჯია” და კომპანია “ასკანელი ფალესტრა”.

gala

1794912232

„ხმა, რომლითაც საუბრობდა, თურმე დაყენებული ყოფილა... მერე აღმოვაჩინე, რომ მისი ბუნებრივი ხმა შენახული ჰქონდა...“ - 17 ნოემბერი გალაკტიონის დაბადების დღეა

17 ნოემბერი დიდი გალას დაბადების დღეა. მეფე-პოეტი 135 წლის გახდებოდა.  შეუძლებელია პოეზია ახსენო და მაშინვე გალაკტიონ ტაბიძე არ გაგახსენდეს პირველი. თითქოს ის ჩვენი პოეზიის ერთგვარი სინომიმია.ყველას თავისი გალაკტიონი ჰყავს და უყვარს. მისი რითმები და სტრიქონები თითქოს სისხლში დაგვდის და სტრუქტურას გვიყალიბებს.დღეს თუკი ვინმეს ყველაზე მეტი მგზნებარებით გალაკტიონზე ეფიქრება, ეს პოეტი ვახტანგ ჯავახაძეა, რომელმაც გალას შემოქმედებისა და ცხოვრების აღწერას, თითქმის მთელი ცხოვრება მოანდომა. მან ორი წლის წინ ტაბიძის ბიოგრაფიული რომანის, “უცნობის” რიგით მეშვიდე გამოცემაც შესთავაზა მკითხველს.90 წლის პოეტი ნანობს, რომ მეტად გახსნილი და თამამი არ იყო გალაკტიონთან, რომ უფრო მეტი გაეგო მასზე.ვახტანგ ჯავახაძე:  იცით, რას ვნანობ? გალაკტიონთან, მისი სიცოცხლის ბოლო ორ წელს, შეხვედრები მქონდა, მისი წიგნი შევადგინე, რედაქტორი გახლდით. საშუალება მქონდა მასთან აქტიური საუბრები და კონტაქტი მქონოდა, მაგრამ არ ვიყავი თამამი რედაქტორი, 26 წლის გახლდით მაშინ. მერიდებოდა მისი. საკმარისი საუბრები გვქონდა, რაც წიგნის შედგენისთვის საჭირო იყო. გალაკტიონს უყვარდა ახალგაზრდებთან ურთიერთობა.მეტი ურთიერთობის შანსი მქონდა, მაგრამ მაქსიმალურად ვერ გამოვიყენე. აი, ამას ვნანობ. არ მეგონა, რომ ვერ მოვასწრებდი მასთან ურთიერთობას. ვიდრე 1959 წელს წიგნი “რჩეული” გამოვიდოდა, გალაკტიონმა თავი მოიკლა. ვერ მოვასწარი, რომ მასთან უფრო ახლოს ვყოფილიყავი.– როგორ ჩარჩა თქვენს მეხსიერებაში გალაკტიონი?– არა მხოლოდ, როგორც დიდი პოეტი, არამედ, როგორც უცნაური და ამოუხსნელი პიროვნება. ბევრი კითხვა მაწვალებს – რატომ მოიკლა თავი, რატომ არ საუბრობდა თავისი ბუნებრივი ხმით და მუდამ რატომ ატარებდა ნიღაბს? ბევრი კითხვის ნიშნები დატოვა. ბოლომდე ვერ ამომიხსნია ეს კითხვები.ვერ შეატყობდით, მაგრამ ახლობლებმა იციან, რომ ზოგჯერ, თავის ბუნებრივ ხმას იბრუნებდა. ამის ფაქტები არსებობს და აქედან დაასკვნეს, რომ ის ხმა, რომლითაც ის საუბრობდა, თურმე დაყენებული ყოფილა. როგორც მსახიობი იყენებს ხმას, ასე იყო ისიც.გაუცხოებული იყო გალაკტიონი, არავისთან გულწრფელი არ იყო. ცოლიც კი გაუბრაზდა ერთხელ, ოლია, რომელმაც უთხრა, შენ არასდროს მოიხსნი მაგ წყეულ ნიღაბსო. ოლიამაც იცოდა, რომ მთელი ცხოვრება ნიღაბს ატარებდა და გულწრფელი არ იყო, ცოლთანაც კი.სასიამოვნო ხმაზე არტისტულად საუბრობდა. დამიჩქარე წიგნი, ძამიკო და რომ გამოვა, მე ვიცი შენი პატივისცემაო, მეუბნებოდა. მე მოგვიანებით, როცა გალაკტიონის დღიურები და არქივი შევისწავლე, მერე აღმოვაჩინე, რომ მისი ბუნებრივი ხმა შენახული ჰქონდა. ძველ ნაცნობს რომ ნახავდა, მაშინ თუ “წამოცდებოდა” თავისი ხმა.– და მაინც თქვენ, რომელმაც გალაკტიონის ბიოგრაფიის შესწავლას და მასზე მუშაობას შეალიეთ ათწლეულები, მისი თვითმკვლელობის მიზეზებად რას ვარაუდობთ?– ერთი მიზეზი არ ექნებოდა. თვითმკვლელობის მთავარი მიზეზი მისადმი დამოკიდებულება მგონია, რომელსაც მთავრობა, მწერალთა კავშირი და მისი ოჯახი იჩენდა. ეს ყველაფერი დაუგროვდა. მთელი ცხოვრება თვითმკვლელობისთვის ემზადებოდა. ბოლოს საბაბი პატარა რაღაც გახდა და ეს მზადება სისრულეში მოიყვანა კიდეც.საავადმყოფოში რომ მივიდა, ოთხი საათი ალოდინეს. მერე პატარა, ორსაწოლიან პალატაში შეიყვანეს, სადაც იყვნენ პაციენტები და გალაკტიონს დაუდგეს მესამე საწოლი. იქ პაციენტის ცოლმა თქვა, შეგვავიწროვესო. ეს გაიგონა გალაკტიონმა, გავიდა პალატიდან, სადაც არც შებრუნებულა, სამი საათი სეირნობდა და ფანჯრიდან გადახტა კიდეც. შეიძლება ის ერთი სიტყვა – "შეგვავიწროვეს" გახდა საბაბი, რომ მას თავი მოეკლა. ეტყობა, კარგად ჰქონდა ჩაფიქრებული და "ლამაზად" გააკეთა ეს…

ფილმი

1794764045

ქართველი რეჟისორების ფილმებმა სხვადასხვა ქვეყნის საერთაშორისო კინოფესტივალებზე მნიშვნელოვანი ჯილდოები მოიპოვეს

ქართული კინო საერთაშორისო ასპარეზზე კვლავ წარმატებას აღწევს - ამჯერად ორი ქართველი რეჟისორის ფილმებმა სხვადასხვა ქვეყნის საერთაშორისო კინოფესტივალებზე მნიშვნელოვანი ჯილდოები მოიპოვეს.დიდ ბრიტანეთში, მანჩესტერის ანიმაციური კინოფესტივალის გამარჯვებული გახდა რეჟისორ მამუკა ტყეშელაშვილის თოჯინური ანიმაციური ფილმი „როცა ზღვა იყო მშვიდი“. სოხუმის თემაზე შექმნილმა კინოსურათმა საუკეთესო მოკლემეტრაჟიანი ანიმაციური ფილმის ჯილდო დაიმსახურა.ბულგარეთში, საერთაშორისო კინოფესტივალ „სინელიბრის“ მთავარი ჯილდო საუკეთესო მოკლემეტრაჟიანი ლიტერატურული ადაპტაციისთვის რეჟისორ რევაზ ნასიძის ფილმს „ტრაგედია უგმიროთ“ გადაეცა. ის ცნობილი ქართველი მწერლის ნიკო ლორთქიფანიძის ამავე სახელწოდების მინიატურის ეკრანიზაციაა.ორივე ფილმი საქართველოს კინემატოგრაფიის ეროვნული ცენტრის მხარდაჭერით შეიქმნა.

კულტურული მემკვიდრეობის დაცვის ეროვნული სააგენტო

1794763836

გელათის სამონასტრო კომპლექსთან დაკავშირებით არასწორი და, გარკვეულ შემთხვევებში, აბსურდული ინფორმაციის გავრცელებამ კამპანიური ხასიათი მიიღო - კულტურული მემკვიდრეობის დაცვის სააგენტო

საქართველოს კულტურული მემკვიდრეობის დაცვის ეროვნული სააგენტო გელათის გელათის სამონასტრო კომპლექსთან დაკავშირებით განცხადებას ავრცელებს და აღნიშნავს, რომ მონასტერთან დაკავშირებით არასწორი და, გარკვეულ შემთხვევებში, აბსურდული ინფორმაციის გავრცელებამ კამპანიური ხასიათი მიიღო.სააგენტოს ინფორმაციით, სიცრუის მიზანმიმართული ტირაჟირება საზოგადოებაში ყველა იმ უწყების, ქართველი და უცხოელი მეცნიერის, დარგის სპეციალისტის და სხვა ჩართული მხარის დისკრედიტაციას ემსახურება, ვინც ქვეყანაში ძეგლთა დაცვის და კონსერვაციის მიმართულებით მუშაობს."კულტურული მემკვიდრეობის ძეგლებთან, მათ შორის გელათის სამონასტრო კომპლექსთან დაკავშირებით არასწორი და გარკვეულ შემთხვევებში აბსურდული ინფორმაციის გავრცელებამ კამპანიური ხასიათი მიიღო.სიცრუის მიზანმიმართული ტირაჟირება საზოგადოებაში ყველა იმ უწყების, ქართველი და უცხოელი მეცნიერის, დარგის სპეციალისტის და სხვა ჩართული მხარის დისკრედიტაციას ემსახურება, ვინც ქვეყანაში ძეგლთა დაცვის და კონსერვაციის მიმართულებით მუშაობს.გელათის სამონასტრო კომპლექსთან დაკავშირებით სიცრუის კამპანია იქამდე მივიდა, რომ წვიმიან ამინდში გადაღებული გარე ტერიტორია შიდა სივრცედ იქნა წარმოჩენილი და შემდგომ "წუხილით" აღნიშნული, რომ დროებითი გადახურვის კონსტრუქცია კომპლექსს ვერ იცავს წყლის ინფილტრაციისგან.მსოფლიო მემკვიდრეობის კომიტეტის რეკომენდაციით, მსოფლიოში მოწინავე გერმანული კომპანიის "ლეიერისა" (Layher) და ქართველი არქიტექტორების ერთობლივი მუშაობის შედეგად, სამონასტრო კომპლექსის მთავარი ტაძარი უნიკალური საინჟინრო კონსტრუქციის მქონე დროებითი სახურავითაა აღჭურვილი, რაც ძეგლს ატმოსფერული ნალექებისგან სრულად იცავს. დაცულია ტაძრის მხატვრობა და უნიკალური მოზაიკა.ტაძრის მუდმივი გადახურვის სამუშაოები ინტენსიურ რეჟიმში მიმდინარეობს. 2027 წლის ბოლოს, დროებითი სახურავი მოიხსნება. ტაძრის შიდა და არა გარე სივრცე, სრულად არის და იქნება დაცული ყველა ტიპის ნალექისგან", - აღნიშნულია განცხადებაში.

აღმოჩენა დმანისში

1794580719

დმანისში, ნაგზაურის სამონასტრო კომპლექსის სიახლოვეს ადრექრისტიანული ხანის კიდევ ერთი ეკლესიის ნაშთები აღმოაჩინეს

დმანისის მუნიციპალიტეტის სოფელ განთიადთან, ნაგზაურის ადრექრისტიანული სამონასტრო კომპლექსის (V-VIII სს.) არქეოლოგიური კვლევის ფარგლებში, ახალი ძეგლი გამოვლინდა. კომპლექსიდან დასავლეთით, აქამდე უცნობი სამლოცველოს ნაშთები დადასტურდა, – ამის შესახებ ინფორმაციას საქართველოს კულტურული მემკვიდრეობის დაცვის ეროვნული სააგენტო ავრცელებს.უწყების განმარტებით, ახალი აღმოჩენა ქმნის დამატებით შესაძლებლობას ქვემო ქართლის ადრექრისტიანული ხანის საეკლესიო არქიტექტურისა და მონასტრული ცხოვრების ისტორიის შესასწავლად.„ახლად გამოვლენილი ნაგებობა დიდი ზომის ქვებითაა ნაგები, 1.5 მეტრამდე სისქის კედლებით, რომელთა შემორჩენილი სიმაღლე 1.3 მეტრს შეადგენს. კვლევის ამ ეტაპზე არქეოლოგიურად შესწავლილია ეკლესიის მთავარი ნავი და აფსიდი. განსაკუთრებულ ყურადღებას იქცევს ეკლესიის ინტერიერში შემორჩენილი არქიტექტურული დეტალები − ამბიონისა და კანკელის ნიშის ფრაგმენტები. მთავარი ნავის შუაში გამოვლენილია სვეტის ქვის ბაზისი, რომელსაც სავარაუდოდ, ხის გადახურვის კონსტრუქცია ეყრდნობოდა. იატაკის დონეზე ასევე აღმოჩენდა კრამიტის ფრაგმენტი, რაც ასევე ნაგებობის გადახურვის მთავარი მასალა უნდა ყოფილიყო.ნაგზაურის კომპლექსი ქვემო ქართლის ერთ-ერთი მნიშვნელოვანი არქეოლოგიური ძეგლია. იგი ადრეული შუა საუკუნეების ეკლესიათა რიგში ერთიანდება და პარალელებს პოულობს საქართველოს სხვა ადრეულ სამონასტრო ძეგლებთან; ერთიანი გალავნით შემოსაზღვრულ ტერიტორიაზე რამდენიმე ეკლესია და სამეურნეო-საცხოვრებელი ნაგებობა იყო განთავსებული.ნაგზაურის კომპლექსზე არქეოლოგიური სამუშაოები საქართველოს კულტურული მემკვიდრეობის დაცვის ეროვნული სააგენტოს დაფინანსებით 2025 წლიდან მიმდინარეობს“, – ნათქვამია ინფორმაციაში.

ქართული ხმა

1794209099

ქართული ხმა ბახის სამყაროში - ანსამბლ „ბათუმის“ ტრიუმფალური სოლო კონცერტი ლაიფციგში, ისტორიულ თომასკირხეში

აჭარის სახელმწიფო ვოკალური ანსამბლი „ბათუმი“, გერმანიაში საიუბილეო ტურნეს ფარგლებში, ლაიფციგის წმინდა თომას ეკლესიაში სოლო კონცერტით წარსდგა. ქართული ხმა ბახის სამყაროში 1500 მაყურებლის წინაშე პირველად აჟღერდა.ანსამბლის დაარსებიდან 35 წლის იუბილისადმი მიძღვნილი საგასტროლო ტურნე გერმანიაში აჭარის მთავრობის მხარდაჭერითა და აჭარის კულტურის სამინისტროს ინიციატივით ხორციელდება. პროექტი მიზნად ისახავს ქართული კულტურის, უნიკალური პოლიფონიის საერთაშორისო მასშტაბით წარმოჩენას, ეროვნული საშემსრულებლო ტრადიციების პოპულარიზაციასა და კულტურული კავშირების გაღრმავებას.თომასკირხეს ისტორიულ ტაძარში, სადაც ლეგენდარული გერმანელი კომპოზიტორი - იოჰან სებასტიან ბახი 27 წლის განმავლობაში მოღვაწეობდა, ანსამბლმა „ბათუმმა“ ქართული უნიკალური პოლიფონია უმაღლეს დონეზე წარმოადგინა. ქართულმა საგალობლებმა გერმანელი მსმენელი აღაფრთოვანა.ლაიფციგში გამართულ ღონისძიებას აჭარის კულტურის მინისტრის პირველი მოადგილე, ვლადიმერ მგალობლიშვილი, საქართველოს საგანგებო და სრულუფლებიანი ელჩი გერმანიის ფედერაციულ რესპუბლიკაში, ალექსანდრე კარტოზია, საელჩოს მრჩეველი - დუდანა მაზმანიშვილი და გერმანიაში მცხოვრები ქართველები ესწრებოდნენ.ტურნეს ფარგლებში კონცერტები გაიმართა ბერლინის, დრეზდენის, ლაიფციგისა და მაგდებურგის კულტურული მემკვიდრეობის ისტორიულ ლოკაციებზე.ღონისძიებები აჭარის კულტურის სამინისტროს, გერმანული კომპანია „KulturLeben Berlin“-ისა და ,,Kolchi Events”-ის თანამშრომლობით იმართება.

კულტურული მემკვიდრეობის დაცვის ეროვნული სააგენტო

1794142682

კულტურული მემკვიდრეობის დაცვის ეროვნული სააგენტო განცხადებას ავრცელებს

უფლისციხის მუზეუმ-ნაკრძალთან დაკავშირებით ცალკეული პირებისა და მედიასაშუალებების მიერ გავრცელებული განცხადებები არ ასახავს ძეგლზე არსებულ რეალურ მდგომარეობას და საზოგადოების შეცდომაში შეყვანას ისახავს მიზნად, - ნათქვამია კულტურული მემკვიდრეობის დაცვის ეროვნული სააგენტოს განცხადებაში.სააგენტო აღნიშნავს, რომ განსაკუთრებით შემაშფოთებელია საკითხის ფაქტობრივი გარემოებებისგან მოწყვეტით წარმოჩენა.„განხორციელებული გამაგრებითი და გადაუდებელი საკონსერვაციო ღონისძიებების შედეგად, დღეის მდგომარეობით, სპეციალისტების მიერ ვიზიტორთათვის უშუალო საფრთხის შემცველი გარემოებები გამოვლენილი არ არის.ამასთან, მნიშვნელოვანია აღინიშნოს, რომ უფლისციხე რთული ბუნებრივი გარემოს პირობებში არსებული უნიკალური კლდეში ნაკვეთი ძეგლია, რომლის დაცვა მუდმივ კვლევას, დაკვირვებასა და შესაბამის ჩარევებს საჭიროებს. სწორედ ამ მიზნით, წლების განმავლობაში მიმდინარეობს ძეგლის მდგომარეობის შესწავლა და მონიტორინგი. 2019 წლიდან დაიწყო ადგილობრივი ქვიშაქვისა და მასზე კლიმატური პირობების ზემოქმედების კვლევაც. სპეციალისტთა ჩართულობით განხორციელდა სამხრეთ-დასავლეთით არსებული კლდოვანი მასივის სკანირება, დაზიანებული უბნების გამოვლენა, გამაგრება და ანკერირება. არსებული ბუნებრივი გამოწვევების პარალელურად, ძეგლის მუდმივი შეფასება და შესაბამისი პრევენციული და საკონსერვაციო ღონისძიებების გატარების პროცესი მომავალშიც გაგრძელდება.კულტურული მემკვიდრეობის ძეგლების დაცვასთან დაკავშირებული საკითხების ობიექტური შეფასება უნდა ეფუძნებოდეს სპეციალისტების დასკვნებსა და ფაქტებს და არა დაუსაბუთებელ განცხადებებს", - აცხადებს კულტურული მემკვიდრეობის დაცვის ეროვნული სააგენტო.

უნუ დუღაშვილი

1794124095

დღეს ნუნუ დუღაშვილს დაკრძალავენ

დღეს ნუნუ დუღაშვილს დაკრძალავენ. ცნობილი კომპოზიტორის გასვენება მახათას ივერიის ღვთისმშობლის ხატის ტაძრიდან 2 საათზე მოხდება. მას მახათას საზოგადო მოღვაწეთა პანთეონში დაკრძალავენ. მახათას მთაზე დილიდან უამრავი ადამიანი მიდის. ოჯახის ახლობლები, გარდაცვლილის მეგობრები, კოლეგები, ხელოვნების სფეროს წარმომადგენლები, რიგითი მოქალაქეები, აღმასრულებელი და საკანონმდებლო ხელისუფლების წარმომადგენლები.ნუნუ დუღაშვილი 93 წლის ასაკში გარდაიცვალა.ის იყო თბილისის საპატიო მოქალაქე, ღირსების ორდენის კავალერი, აკაკი წერეთლის სახელობის პრემიის ლაურეატი, საქართველოს ხელოვნების დამსახურებული მოღვაწე. მას განსაკუთრებული პოპულარობა არაერთმა სიმღერამ მოუტანა, მათ შორისაა კახეთო, იმერეთის ნიავო, თბილისო სიყვარულო და სხვა. 2012 წელს თბილისის დიდი საკონცერტო დარბაზის წინ, ნუნუ დუღაშვილის ვარსკვლავი გაიხსნა.

მომღერალი

1794079012

6 ათწლეული ქართულ სცენაზე, უამრავი ჰიტი და თაობების საყვარელი მელოდიები - ჯემალ სეფიაშვილის საიუბილეო წელი მასშტაბური მზადებით იწყება

"ჩამოთოვა ისევ" - ჯანსუღი ჩარკვიანის ლექსზე შექმნილ, მსმენელისთვის უკვე კარგად ცნობილ და საყვარელ სიმღერას, ბევრი წლის შემდეგ, ჯემალ სეფიაშვილი ახალი ინტერპრეტაციით აცოცხლებს. ეს უკვე მეშვიდე ნაწარმოებია, რომლის განახლებული ვერსიაც, ყველაზე მეტი ჰიტის ავტორმა, ლეგენდარულმა კომპოზიტორმა "შამო სტუდიაში" ჩაწერა.ჩაწერები თითქმის ყოველდღიურ რეჟიმში გრძელდება. სამუშაო ბევრია, რაც, სტუდიამდე, სახლში იწყება. სიმღერების ტექსტი და მელოდია უცვლელი რჩება, თუმცა იცვლება ხასიათი და ჟღერადობა.მაყურებელი მოისმენს იმ ჰიტების სრულიად ახლებურ ვერსიას, რომლებზეც ერთდროულად რამდენიმე თაობა გაიზარდა. მომავალი წელი საიუბილეოა. ჯემალ სეფიაშვილს 19 თებერვალს 80 წელი უსრულდება.ვიდრე მსმენელი დიდ საიუბილეო კონცერტს იხილავს, ჯემალ სეფიაშვილი მაყურებელს გრიბოედოვის თეატრში შეხვდა.ნახევარ საუკუნეზე მეტია, სცენაზე დგას, თუმცა მაყურებელთან გასვლამდე დღემდე ღელავს. კონცერტი საკუთარ ქალაქში მისთვის ყოველთვის განსაკუთრებული პასუხისმგებლობა და ემოციაა."თბილისო ჩემო" - კონცერტი, რომლის სახელწოდებაც თავად ჯემალ სეფიაშვილმა შეარჩია, მერიის მხარდაჭერით ჩატარდა. საღამომ გრიბოედოვის თეატრში სრული ანშლაგით ჩაიარა. სცენაზე, კომპოზიტორთან ერთად, მისი შვილი, ცისანა სეფიაშვილიც წარდგა.კონცერტზე ჯემალ სეფიაშვილმა სიმღერა "ჭაღარა" ახალი ინტერპრეტაციით შეასრულა. კომპოზიციის ტექსტის ავტორი პოეტი ირმა გურიელია, რომელთანაც ჯემალ სეფიაშვილს მრავალწლიანი მეგობრობა და შემოქმედებითი საქმიანობა აკავშირებს.ჯემალ სეფიაშვილის სიმღერების მოსმენა და მასთან ერთად სიმღერა თამარ გვეწითელისთვის ყოველთვის განსაკუთრებული ემოციაა. კონცერტზე მისი გამოჩენა მაყურებლისთვის სიურპრიზი აღმოჩნდა.გრიბოედოვის თეატრში გამართულ ორსაათიან კონცერტზე ჯემალ სეფიაშვილმა ყველა სიმღერა ცოცხლად შეასრულა. მაყურებელი კომპოზიტორის შემოქმედებას კარგად იცნობს, თუმცა ერთი რომელიმე სიმღერის გამორჩევა უჭირს.კომპოზიტორ წინ უამრავი გეგმა და განუხორციელებელი იდეა აქვს, როგორც თავად ამბობს, მისთვის მნიშვნელოვანია, სიმღერები მომავალ თაობებს გადაეცეს და მისმა მუსიკამ მსმენელთან კავშირი არ დაკარგოს.

უბისის მონასტერი

1793716848

კულტურული მემკვიდრეობის დაცვის ეროვნული სააგენტო: უბისის მონასტრის კედლის მხატვრობის მდგომარეობის გაუარესებასთან დაკავშირებით გავრცელებული ინფორმაცია სიმართლეს არ შეესაბამება

საქართველოს კულტურული მემკვიდრეობის დაცვის ეროვნული სააგენტო განცხადებას ავრცელებს, რომელშიც ნათქვამია, რომ უბისის მონასტრის კედლის მხატვრობის მდგომარეობის გაუარესებასთან დაკავშირებით სოციალურ ქსელში გავრცელებული ინფორმაცია სიმართლეს არ შეესაბამება.უწყების განმარტებით, სოციალურ ქსელში ფოტომასალის გავრცელების შემდეგ სააგენტოს სპეციალისტებმა მონასტერში დამატებითი მონიტორინგი განახორციელეს. შემოწმების შედეგად დადგინდა, რომ კედლის მხატვრობაზე უკვე არსებული დაზიანებების გარდა, დაზიანების ახალი კვალი არ ფიქსირდება.„უბისის მონასტრის კედლის მხატვრობის მდგომარეობის გაუარესებასთან დაკავშირებით სოციალურ ქსელში გავრცელებული ინფორმაცია სიმართლეს არ შეესაბამება და საზოგადოების მიზანმიმართულად შეცდომაში შეყვანას ისახავს მიზნად.კულტურული მემკვიდრეობის დაცვის ეროვნული სააგენტოს სპეციალისტები უბისის მონასტრის კედლის მხატვრობაზე სისტემურ მონიტორინგს ახორციელებენ.სოციალურ ქსელში უბისის მონასტრის კედლის მხატვრობის შესახებ ინფორმაციის და ფოტომასალის გავრცელების შემდეგ სააგენტოს სპეციალისტებმა მონასტერში დამატებითი მონიტორინგი განახორციელეს.შემოწმების შედეგად დადგინდა, რომ კედლის მხატვრობაზე უკვე არსებული დაზიანებების გარდა, დაზიანების ახალი კვალი არ ფიქსირდება.აღსანიშნავია, რომ უბისის მონასტრის კედლის მხატვრობის შესწავლის მიზნით, საქართველოში იტალიელი ექსპერტების მისია განხორციელდა. ჩატარდა შესაბამისი კვლევები; საერთაშორისო ექსპერტების მიერ მომზადდა დასკვნა. კულტურული მემკვიდრეობის დაცვის ეროვნული სააგენტოში მიმდინარეობს მუშაობა შესაბამისი სტანდარტების დაცვით სრულყოფილი საკონსერვაციო-სარესტავრაციო სამუშაოების უზრუნველყოფის გეგმაზე,“- აღნიშნულია გავრცელებულ ინფორმაციაში.

basiani

1793528749

იაპონიაში პირველად, სახელმწიფო კამერული გუნდისა და ანსამბლ „ბასიანის“ ერთობლივი კონცერტი გაიმართება

იაპონიაში პირველად, სახელმწიფო კამერული გუნდისა და ანსამბლ “ბასიანის” ერთობლივი კონცერტი გაიმართება.2026 წლის 14 დეკემბერს, ტოკიოს მეტროპოლიტენის თეატრის საკონცერტო დარბაზში, დაგეგმილია, სამების კათედრალის საპატრიარქო / სახელმწიფო კამერული გუნდისა და საქართველოს ხალხური სიმღერის სახელმწიფო ანსამბლის „ბასიანის“ კონცერტი. იაპონელი მსმენელის წინაშე აჟღერდება როგორც ქართული ტრადიციული მუსიკა, ასევე თანამედროვე საგუნდო ნაწარმოებები.15 დეკემბერს კი ქალაქ უშიკუში, სოლო კონცერტს გამართავს ანსამბლი “ბასიანი.”ანსამბლი “ბასიანი” იაპონელ მაყურებელს შესთავაზებს ქართული მრავალხმიანობის ნიმუშებს - ხალხურ სიმღერებს და საგალობლებს.სახელმწიფო კამერული გუნდი კი, ქართულ საგალობლებსა და საგუნდო პროფესიულ მუსიკას შეასრულებს. რეპერტუარში იქნება: გია ყანჩელის, იოსებ კეჭაყმაძის, ზვიად ბოლქვაძისა და იოსებ ბარდანაშვილის ნაწარმოებები.გუნდების სოლისტებთან ერთად კონცერტში ასევე მონაწილეობას მიიღებენ ზვიად ბოლქვაძე და ვადიმ შიშკინი.ღონისძიებები იაპონური ორგანიზაციის „Min-On Concert Association“-ის ორგანიზებით, საქართველოს პარლამენტის კულტურის კომიტეტის ინიციატივით და კულტურის სამინისტროს მხარდაჭერით, საგარეო საქმეთა სამინისტროს, კერძოდ იაპონიაში საქართველოს საელჩოს ხელშეწყობით გაიმართება.პროგრამა:14 დეკემბერი | ტოკიო, ღონისძიება: „Spirit of Georgia“- სამების კათედრალის საპატრიარქო / სახელმწიფო კამერული გუნდისა და საქართველოს ხალხური სიმღერის სახელმწიფო ანსამბლის „ბასიანის“ ერთობლივი კონცერტი.Tokyo Metropolitan Theatre Concert Hall19:00 სთ (კარი იღება 18:30 სთ-ზე)15 დეკემბერი | უშიკუ (იბარაკის პრეფექტურა). ანსამბლი „ბასიანი“ , სოლო კონცერტი, რომელიც ეძღვნება ქ. უშიკუსა და ქ. თელავს შორის დამეგობრებისა და ქ. უშიკუს დაარსების 40 წლისთავის იუბილეს.Ushiku City Central Lifelong Learning Center Culture Hall19:00 სთ (კარი იღება 18:30 სთ-ზე)იაპონიაში სამების კათედრალის საპატრიარქო / სახელმწიფო კამერული გუნდისა და საქართველოს ხალხური სიმღერის სახელმწიფო ანსამბლის „ბასიანის“ კონცერტები 14 და 15 დეკემბერს გაიმართება.

მამუკა ტყეშელაშვილი

1793527050

მამუკა ტყეშელაშვილის მოკლემეტრაჟიანმა ანიმაციურმა ფილმმა „როცა ზღვა იყო მშვიდი“ დოკუმენტური და ანიმაციური ფილმების 69-ე საერთაშორისო ფესტივალზე - DOK LEIPZIG-საუკეთესო მოკლემეტრაჟიანი ფილმისთვის MEPHISTO AWARD-ის ჯილდო და ჟიურის სპეციალური აღნიშვნა დაიმსახურა

ქართული ანიმაციის საერთაშორისო წარმატების შესახებ ინფორმაციას საქართველოს კინემატოგრაფიის ეროვნული ცენტრი ავრცელებს.„მამუკა ტყეშელაშვილის მოკლემეტრაჟიანმა ანიმაციურმა ფილმმა „როცა ზღვა იყო მშვიდი“ დოკუმენტური და ანიმაციური ფილმების 69-ე საერთაშორისო ფესტივალზე - DOK Leipzig-საუკეთესო მოკლემეტრაჟიანი ფილმისთვის Mephisto Award-ის ჯილდო და ჟიურის სპეციალური აღნიშვნა დაიმსახურა.ფილმი საქართველოს კინემატოგრაფიის ეროვნული ცენტრის მხარდაჭერით შეიქმნა. იგი კინოფესტივალის ორ საკონკურსო სექციაში იყო წარდგენილი.ვულოცავთ რეჟისორ მამუკა ტყეშელაშვილსა და მთელ შემოქმედებით გუნდს ამ მნიშვნელოვან საერთაშორისო აღიარებას და ვუსურვებთ კიდევ მრავალ წარმატებას", - ნათქვამია ცენტრის ინფორმაციაში.

✕