1748675035

შეკვეთილში, საფესტივალო ქალაქში Guns N' Roses-ის კონცერტი გაიმართა

შეკვეთილში ლეგენდარული როკ-ბენდის, „Guns N' Roses-ის“ კონცერტი გაიმართა.კონცერტის მოსასმენად შეკრებილ მელომანებს ციცინათელას პარკის ტერიტორიაზე საგანგებოდ მოწყობილმა საფესტივალო ქალაქმა უმასპინძლა. კონცერტი 5 საათზე მეტხანს გაგრძელდა. სანამ სცენაზე როკის ლეგენდები გამოვიდოდნენ, საფესტივალო ქალაქში შეკრებილი მაყურებლის წინაშე ე.წ. საფორთ ბენდი „Rival Sons“ წარდგა.შეგახსენებთ, რომ ეს „Starring Georgia-ს“ წლევანდელი მუსიკალური სეზონის პირველი ღონისძიება გახლდათ. 2025 წლის „ვარსკვლავთცვენა“ გრანდიოზულად გაგრძელდება 23 ივლისს „დინამო არენაზე“, სადაც კონცერტს მსოფლიო სუპერვარსკვლავი ჯასტინ ტიმბერლეიკი გამართავს, ხოლო 27 აგვისტოს „Black Sea Arena-ს“ Front Stage ავსტრალიურ მუსიკალურ პროექტს, „Empire of the Sun-ს“ უმასპინძლებს.უკვე მესამე წელია, რაც საქართველოს მთავრობის მხარდაჭერით, პროექტი „Starring Georgia“ გრძელდება. უცვლელია პროექტის მთავარი მიზანი: ხელმისაწვდომი გახადოს ქართველი ახალგაზრდებისთვის საყვარელი მუსიკოსების საკუთარ ქვეყანაში მოსმენა; განავითაროს ქვეყანაში ტურიზმი, გასართობი ინდუსტრია და ხელი შეუწყოს საქართველოს პოპულარიზაციას საერთაშორისო დონეზე.

1748606208

შეკვეთილში საფესტივალო ქალაქი Guns N’ Roses-ის კონცერტისთვის მზად არის

საქართველო ერთ-ერთი ყველაზე მასშტაბური მუსიკალური მოვლენისთვის ემზადება - მსოფლიო როკის ლეგენდა, ჯგუფი Guns N’ Roses კონცერტს გამართავს, რომელიც შეკვეთილში, ატრაქციონების პარკ „ციცინათელას“ მიმდებარედ ჩატარდება.საფესტივალო ქალაქი თანამედროვე ინფრასტრუქტურით მოეწყო და მზად არის ქართველი და უცხოელი მსმენელის მასპინძლობისთვის.„ყველა მომხმარებელს, ვინც ამ ღონისძიებაზე გეგმავს მოსვლას, მინდა ვთხოვო, თვალ-ყური ადევნონ ყველა მნიშვნელოვან ინფორმაციას, რომელიც ჩვენი სოცმედია არხებით არის გავრცელებული. კონკრეტულად, თუ რა ტერიტორიაზე იქნება პარკინგები მოწყობილი, როგორ მოახერხებენ პარკინგებიდან საფესტივალო ტერიტორიამდე მოსვლას. აუცილებლად გთხოვთ, რომ ყურადღება მიაქციოთ აკრძალულ ნივთებს, რათა ტერიტორიაზე არ იყოს რაიმე უხერხულობა. და რაც ყველაზე მნიშვნელოვანია, მოდით ემოციით დამუხტულები იმიტომ, რომ დღეს ჩვენ ყველა ერთად შევძლებთ, 3 საათისა და 15 წუთის განმავლობაში მოვუსმინოთ ლეგენდარულ Guns N’ Roses-ს”, - განაცხადა „Starring Georgia-ს“ პროექტების მენეჯერმა ციცი იაშვილმა.მსოფლიო როკის ლეგენდა საქართველოშია. Guns N’ Roses ქართულ სცენაზე პირველად წარდგება. ლეგენდარული ბენდი პროექტის „სტარინგ ჯორჯიის“ ფარგლებში, „ციცინათელას“ მიმდებარე ტერიტორიაზე გრანდიოზულ ცოცხალ კონცერტს დღეს გამართავს.ხელმისაწვდომია ვიდეოინსტრუქცია შოუს ტერიტორიაზე მდებარე შემოსასვლელების შესახებ.

1747910460

რობი უილიამსმა ტომი აიომისთან დუეტი ჩაწერა

ბრიტანელმა მომღერალმა რობი უილიამსმა ახალი სინგლი Rocket წარადგინა, რომელიც ლეგენდარული როკ-ჯგუფის Black Sabbath-ის წევრთან, ტომი აიომისთან ჩაწერა.კომპოზიცია უილიამსის ალბომში BRITPOP შევა, რომელიც შემოდგომაზე უნდა გამოვიდეს.„ამ ალბომზე ჩემს გმირებთან ერთად ვიმუშავე. ძალიან ვამაყობ ამ ნამუშევრით და მოუთმენლად ველი, როდის მოისმენენ მას ფანები“, - განაცხადა უილიამსმა. 

1747903865

ზაკ ბრაფი „კლინიკაში“ დაბრუნდება

ზაკ ბრაფი „კლინიკის“ გაგრძელებაში ჯეი დის როლს დაუბრუნდება.Deadline-ის ცნობით, მსახიობმა უკვე მოაწერა ხელი კონტრაქტს, თუმცა ამას წინ მრავალთვიანი მოლაპარაკებები უძღოდა.მოსალოდნელია, რომ ახლა 20th Television გაგრძელებაში მონაწილეობაზე სერიალის სხვა ვარსკვლავებსაც დაიყოლიებს - დონალდ ფეისონს, სარა ჩოკს, ჯონ კეი მაკგინლის და ჯუდი რეიესს.კლინიკის გაგრძელებაზე, რომელიც ერთდროულად მისი გადატვირთვაც იქნება, ტელეკომპანია ABC მუშაობს.ამერიკული კომედიურ-დრამატული სერიალი კლინიკა ახალგაზრდა ექიმების შესახებ მოგვითხრობდა. პროექტი ბილ ლოურენსმა შექმნა. სერიალის პრემიერა 2001 წლის ოქტომბერში NBC- ზე შედგა.

1747895975

დენიელ კრეიგმა და კილიან მერფიმ შესაძლოა დემიენ შაზელის ახალ ფილმში ითამაშონ

დენიელ კრეიგი და კილიან მერფი დემიენ შაზელის ახალ ფილმში გადაღებების შესახებ მოლაპარაკებებს აწარმოებენ.The Hollywood Reporter-ის ცნობით, მოვლენები ფილმში ციხეში განვითარდება, თუმცა სახელწოდება და სიუჟეტის დეტალები ამ ეტაპზე უცნობია. ფილმის დისტრიბუტორი სტუდია Paramount-ი იქნება.გადაღებები სავარაუდოდ წლის ბოლოს დაიწყება.

1747808506

Disney-მ „ზოოტოპია 2“-ის თიზერ-თრეილერი წარადგინა

კომპანია Disney-მ მულტფილმ „ზოოტოპია 2“-ის პირველი თიზერ-თრეილერი გამოუშვა. რგოლში მაყურებლებმა ნაცნობი პერსონაჟები ნახეს - კურდღელი ჯუჯი ჰოპსი და მელა ნიკ უაილდი. ისინი კვლავ ერთად მუშაობენ და ამჯერად იდუმალი რეპტილიის საქმის გამოძიება უწევთ, რომელიც ზოოტოპიაში ჩნდება და ქალაქის წესებს ცვლის.მთავარ პერსონაჟებს კვლავ ჯინიფერ გუდვინი და ჯეისონ ბეიტმანი გაახმოვანებენ. ფილმის პრემიერა 2025 წლის 26 ნოემბერს გაიმართება.„ზოოტოპიას“ პირველი ნაწილი ეკრანებზე 2016 წელს გამოვიდა. მან მსოფლიო გაქირავებაში 1 მილიარდი დოლარი მოაგროვა. 

1747743281

ბრიტანეთში „ჰარი პოტერის“ გადაღებებისთვის მინი-ქალაქს ააშენებენ

დიდ ბრიტანეთში სერიალ „ჰარი პოტერის“ გადასაღებად მინი-ქალაქი აშენდება. გამოცემა Collider-ის ინფორმაციით, სტუდია Warner Bros.-ს ეს 1 მილიარდი გირვანქა სტერლინგი დაუჯდება.ლოკაციას ჰარტფორდშირში მდებარე სტუდიაში ააგებენ. მოედანზე იქნება დეკორაციები, გზები, პარკინგები, სკოლა ახალგაზრდა მსახიობებისთვის, სამედიცინო ცენტრი და სივრცეები ცხოველებისთვის, რომლებსაც შოუში გადაიღებენ.ახალი სერიალი ეკრანებზე 2026 წელს უნდა გამოვიდეს. ამ ეტაპზე უცნობია ვინ განასახიერებს მთავარ პერსონაჟებს - ჰარის, რონსა და ჰერმიონს, თუმცა სტუდიამ უკვე შეარჩია ზრდასრული მსახიობები: სევერუს სნეიპის როლს პააპა ესიედუ შეასრულებს, ალბუს დამბლდორს ჯონ ლითგოუ განასახიერებს, მინერვა მაკგონაგალის როლი ჯანეტ მაკტირს ერგო, რუბეუს ჰაგრიდის კი ნიკ ფროსტს.

1747392600

გელა ბაბლუანი სტალინზე ფილმს გადაიღებს, სადაც ახალგაზრდა სტალინის როლს კოსმო ჯარვისი შეასრულებს

გელა ბაბლუანი გადაიღებს ფილმს „ახალგაზრდა სტალინი“, სადაც იოსებ სტალინის როლს ბრიტანელი მსახიობი კოსმო ჯარვისი შეასრულებს.Variety-ს ინფორმაციით, ფილმი ინგლისელი მწერლისა და ისტორიკოსის საიმონ სებაგ-მონტეფიორეს ამავე სახელწოდების წიგნზე იქნება დაფუძნებული. სურათის რეჟისორი გელა ბაბლუანია. მონტეფიორესთან ერთად ის სცენარის თანაავტორიცაა.ფილმი სტალინის ახალგაზრდა წლებზე მოგვითხრობს, კერძოდ რევოლუციამდელ რუსეთში ბანკების ძარცვაში მის მონაწილეობაზე. პროექტს კომპანია Access Entertainment-ი აფინანსებს. პრემიერის თარიღი ამ ეტაპზე არ დასახელებულა.

1747386163

კრის ბრაუნი დააკავეს - რას ედავება გამოძიება მომღერალს

ამერიკელ მომღერალ კრის ბრაუნს, სხეულის განზრახ მძიმე დაზიანებისთვის, ბრალი წაუყენეს. ინფორმაციას BBC ავრცელებს.პოლიციის განცხადებით, ბრალდება ეხება სავარაუდო თავდასხმას, რომელიც, როგორც ამბობენ, 2023 წლის 19 თებერვალს, ლონდონის ცენტრში, ღამის კლუბში მოხდა.36 წლის მომღერალი მანჩესტერში, ხუთშაბათს დილით, სასტუმროში დააკავეს. ის კვლავ პატიმრობაშია და პარასკევს მანჩესტერის სასამართლოს წინაშე წარდგება.

1747376728

იყო თუ არა ჯასტინ ბიბერი P Diddy-ს მსხვერპლი - პირველი ოფიციალური განცხადება

ჰოლივუდში ერთ-ერთ ყველაზე წარმატებულ ჰიპ-ჰოპ პროდიუსერის, P Diddy-ს (რეალური სახელი Sean Combs - შონ კომბსი) დაკავების შემდეგ, მსოფლიო მედია აქტიურად წერს, რომ მის მსხვერპლთაგან ერთ-ერთი ჯასტინ ბიბერიცაა. ნახევარ წელიწადზე მეტი ხნის განმავლობაში, საკითხზე კომენტარი ბიბერს ერთხელაც არ გაუკეთებია.ცოტა ხნის წინ კი გავრცელდა მისი წარმომადგენლის განცხადება, რომელშიც აღნიშნულია, რომ ჯასტინ ბიბერი P Diddy-ს მსხვერპლი არ ყოფილა."მიუხედავად იმისა, რომ ჯასტინი არ არის შონ კომბსის მსხვერპლთა შორის, არიან პიროვნებები, რომლებიც მის მიერ ნამდვილად დაზარალდნენ. ამ რეალობიდან ყურადღების გადატანა აფერხებს სამართლის აღსრულებას, რომელსაც ეს დაზარალებულები სრულიად იმსახურებენ”, - აღნიშნავს ბიბერის წარმომადგენელი.შონ კომბსი ციხეში იმყოფება. პოლიციამ ის სექსუალური ტრეფიკინგისა და ძალადობის ბრალდებით დააპატიმრა. 55 წლის რეპერი ყველა ბრალდებას უარყოს.

1747342115

VIDEO: „ბრიჯერტონის“ მეოთხე სეზონის პირველი თიზერი გამოქვეყნდა

Netflix-მა თავისი ერთ-ერთი ყველაზე პოპულარული სერიალის „ბრიჯერტონის“ მეოთხე სეზონის პირველი თიზერი გამოუშვა. ვიდეოში ამ სეზონის მთავარი გმირების პირველი შეხვედრაა ასახული. სეზონის პრემიერა 2026 წელს შედგება.სერიალის სცენარი ამერიკელი ავტორის, ჯულია ქუინის რომანებზე იქნება დაფუძნებული და ამჯერად სიუჟეტის ცენტრში ბენედიქტ ბრიჯერტონისა და სოფი ბეკეტის ისტორია იქნება. მთავარ როლებს სერიალში ლუკ ტომპსონი და იერინ ჰა ასრულებენ. ძველ როლებს ასევე დაუბრუნდებიან ლუკ ნიუტონი, ნიკოლა კოჰლანი, ჯონათან ბეილი, სიმონ ეშლი, კლაუდია ჯესი, აჯოა ანდოჰი სხვები.Netflix-მა ასევე დაადასტურა, რომ შოუ კიდევ 2 სეზონით გაახანგრძლივა. 

1747292860

მარიამ შენგელია ევროვიზიის სცენაზე დღეს წარდგება

„ევროვიზია 2025“-ის მეორე ნახევარფინალი დღეს, 23:00 საათზე გაიმართება.მაყურებლის წინაშე შემდეგი ქვეყნების წარმომადგენლები იმღერებენ: ავსტრალია, მონტენეგრო, ირლანდია, ლატვია, სომხეთი, ავსტრია, საბერძნეთი, ლიეტუვა, მალტა, დანია, ჩეხეთი, ლუქსემბურგი, ისრაელი, სერბეთი, ფინეთი.მე-10 ნომრად კი სცენაზე საქართველოს წარმომადგენელი მარიამ შენგელია გამოვა, სიმღერით Freedom.სცენაზე ასევე წარდგება „დიდი ხუთეულის” სამი ქვეყანა: დიდი ბრიტანეთი, საფრანგეთი, გერმანია.წელს ევროვიზია შვეიცარიის ქალაქ ბაზელში იმართება. კონკურსში 37 ქვეყანა მონაწილეობს.