1779475440

მიხეილ სარჯველაძე იშვიათი ნერვ-კუნთოვანი დაავადებების, მათ შორის დიუშენის კუნთოვანი დისტროფიის მართვასთან დაკავშირებით ჟენევის საუნივერსიტეტო კლინიკის პრაქტიკას გაეცნო

ჯანდაცვის მინისტრი მიხეილ სარჯველაძე ჟენევის საუნივერსიტეტო საავადმყოფოს ბავშვთა ნეიროკუნთოვანი დაავადებების რეფერალურ ცენტრში იმყოფებოდა. მინისტრი ცენტრის ხელმძღვანელს, საერთაშორისო კვალიფიკაციის მქონე ნეიროპედიატრს, დოქტორ ჟოელ ფლუსს შეხვდა.შეხვედრის მთავარ თემას იშვიათი ნერვ-კუნთოვანი დაავადებების მართვის საკითხები წარმოადგენდა. მათ შორის, საუბარი შეეხო დიუშენის კუნთოვან დისტროფიას. ყურადღება გამახვილდა რეაბილიტაციისა და გვერდითი მოვლენების მართვის საკითხებზე. ხაზი გაესვა იმ გარემოებას, რომ ინოვაციური თერაპიების დიდი ნაწილი მსოფლიოსა და ევროპის მასშტაბით ჯერ კიდევ არ არის აპრობირებული.ჟენევის საუნივერსიტეტო საავადმყოფოს ბავშვთა ნერვ-კუნთოვანი დაავადებების რეფერალური ცენტრის ხელმძღვანელმა განაცხადა, რომ შვეიცარიაში დიუშენის კუნთოვანი დისტროფიის დიაგნოზის მქონე პაციენტების მართვის პროტოკოლი იმავე მედიკამენტებით მკურნალობას ითვალისწინებს, რაც ამჟამად საქართველოში არის დანერგილი.მიხეილ სარჯველაძის განცხადებით, სამინისტრო აქტიურად და დეტალურად სწავლობს მსოფლიო პრაქტიკას, მარეგულირებელი ორგანოების მიდგომებსა და საერთაშორისო ექსპერტების დასკვნებს, რათა შეფასდეს ამ მიმართულებით არსებული რეალური სამედიცინო სურათი, უსაფრთხოების რისკები და გრძელვადიანი შედეგები.შეხვედრას ესწრებოდნენ: პარლამენტის ჯანმრთელობის დაცვისა და სოციალურ საკითხთა კომიტეტის თავმჯდომარე ზაზა ლომინაძე, ჟენევაში გაეროს განყოფილებასთან და სხვა საერთაშორისო ორგანიზაციებთან საქართველოს მუდმივი წარმომადგენელი რევაზ ლომინაძე და ჟენევის საუნივერსიტეტო კლინიკის ბავშვთა კარდიოქირურგიის სამედიცინო ხელმძღვანელი თორნიკე სოლოღაშვილი.მიხეილ სარჯველაძე ჟენევაში ჯანმრთელობის მსოფლიო ასამბლეის 79-ე სესიის ფარგლებში სამუშაო ვიზიტით იმყოფებოდა. ასამბლეის მუშაობაში მონაწილეობის პარალელურად, მან ორმხრივი შეხვედრები გამართა სხვადასხვა ევროპული ქვეყნის ჯანდაცვის უწყებების ხელმძღვანელ პირებთან, სადაც განხილვის ერთ-ერთ მთავარ თემას სწორედ აღნიშნული საკითხები წარმოადგენდა.ინფორმაციას ჯანდაცვის სამინისტრო ავრცელებს. 

1779434471

მიხეილ სარჯველაძე ჯანმრთელობის მსოფლიო ორგანიზაციის ევროპის რეგიონულ დირექტორს - ჰანს კლუგეს შეხვდა

მიხეილ სარჯველაძე ჯანმრთელობის მსოფლიო ორგანიზაციის ევროპის რეგიონულ დირექტორს - ჰანს კლუგეს შეხვდა.მხარეებმა საქართველოსა და ჯანმრთელობის მსოფლიო ორგანიზაციის ევროპის რეგიონულ ოფისს შორის თანამშრომლობის საკითხები განიხილეს. საუბარი შეეხო ჯანდაცვის სფეროში მიმდინარე და დაგეგმილ რეფორმებს, პირველადი ჯანდაცვის სისტემის გაძლიერებას, საყოველთაო ჯანდაცვის პროგრამას, მედიკამენტებზე ხელმისაწვდომობის გაზრდას, იშვიათი დაავადებების მედიკამენტების საკითხსა და რეგიონული თანამშრომლობის მიმართულებებს.ჰანს კლუგემ საქართველოს ჯანდაცვის სისტემაში მიმდინარე რეფორმები დადებითად შეაფასა და აღნიშნა, რომ პირველადი ჯანდაცვის გაძლიერება და მიმდინარე ცვლილებები მნიშვნელოვნად უწყობს ხელს მოსახლეობისთვის ხარისხიანი სერვისების მიწოდებას და სისტემის მდგრად განვითარებას.შეხვედრაზე აღინიშნა ჯანმრთელობის მსოფლიო ორგანიზაციასთან პარტნიორობის მნიშვნელობა და სამომავლოდ თანამშრომლობის კიდევ უფრო გაღრმავების მზადყოფნა.შეხვედრას ასევე ესწრებოდნენ პარლამენტის ჯანმრთელობის დაცვისა და სოციალურ საკითხთა კომიტეტის თავმჯდომარე ზაზა ლომინაძე და ჟენევაში გაეროს განყოფილებასა და სხვა საერთაშორისო ორგანიზაციებში საქართველოს მუდმივი წარმომადგენელი ალექსანდრე მაისურაძე.

1779433027

ჯანდაცვის მინისტრის მოადგილე ირინე წაქაძე მსოფლიო ბანკის წარმომადგენელს - რობერტო კლაუდიო სორმანს შეხვდა

ჯანდაცვის მინისტრის მოადგილე ირინე წაქაძე მსოფლიო ბანკის წარმომადგენელს -  რობერტო კლაუდიო სორმანის შეხვდა.შეხვედრაზე მხარეებმა „ადამიანური კაპიტალის“ პროგრამის ფარგლებში სოციალური დაცვის მიმართულებით დაგეგმილი პროექტების მიმდინარეობა და სამომავლო თანამშრომლობის საკითხები განიხილეს. აღინიშნა, რომ პროგრამის მიზანია სოციალური დაცვის სისტემის გაძლიერება და მოსახლეობისთვის ხარისხიან სერვისებზე ხელმისაწვდომობის გაუმჯობესება.ჯანდაცვის მინისტრის მოადგილის -  ირინე წაქაძის განცხადებით, პროგრამის პირველი ეტაპი სოციალურად დაუცველი ოჯახების ერთიან ბაზაში რეგისტრაციისთვის განაცხადის წარდგენის პროცესის გამარტივებას ისახავს მიზნად. კერძოდ, პირველი ივლისიდან სოციალურად დაუცველი ოჯახები განაცხადის შეტანას ონლაინ -  ელექტრონული სისტემის მეშვეობით შეძლებენ.ახალი სისტემა ხელმისაწვდომი იქნება სომხურ და აზერბაიჯანულ ენებზეც. ამასთან,  1-ელი ივლისიდან, 60 დღემდე შემცირდება საარსებო შემწეობის დანიშვნის ვადაც, რაც შესაძლებლობას მისცემს ოჯახებს, რომ მიიღონ ფინანსური დახმარება უფრო სწრაფად.ადამიანური კაპიტალის პროგრამა, რომელიც მსოფლიო ბანკის მიერ ფინანსდება, მოიცავს ჯანმრთელობის, განათლებისა და სოციალური დაცვის მიმართულებებს. პროგრამა 2022 წლის ივნისიდან მიმდინარეობს და 2028 წლამდე გაგრძელდება.

1779263952

მიხეილ სარჯველაძე ჯანმრთელობის მსოფლიო ასამბლეის ფარგლებში ბელგიის ფედერალური ჯანდაცვის სამინისტროს გენერალურ მდივანსა და პოლონეთის ჯანდაცვის მინისტრს შეხვდა

მიხეილ სარჯველაძე ჯანმრთელობის მსოფლიო ასამბლეის 79-ე სესიის ფარგლებში, პარლამენტის ჯანმრთელობის დაცვისა და სოციალურ საკითხთა კომიტეტის თავმჯდომარე ზაზა ლომინაძესთან ერთად, ბელგიის ფედერალური ჯანდაცვის სამინისტროს გენერალურ მდივანს - დირკ რამაეკერსს შეხვდა.შეხვედრაზე მხარეებმა ჯანდაცვის სფეროში მიმდინარე რეფორმები, პირველადი ჯანდაცვის გაძლიერების მიმართულებით არსებული გამოცდილება და ორ ქვეყანას შორის თანამშრომლობის პერსპექტივები განიხილეს. საუბარი შეეხო ჯანდაცვის სისტემების მდგრადობის, ციფრული ტრანსფორმაციისა და ხარისხიან სამედიცინო სერვისებზე ხელმისაწვდომობის საკითხებს. განსაკუთრებული ყურადღება დაეთმო იშვიათი დაავადებების მიმართულებით საერთაშორისო გამოცდილების გაზიარების მნიშვნელობას. აღინიშნა, რომ საკითხი დამატებით პროფესიულ განხილვასა და სიღრმისეულ შესწავლას საჭიროებს.მიხეილ სარჯველაძემ ასევე გამართა შეხვედრა პოლონეთის ჯანდაცვის მინისტრ იოლანტა სობიერანსკა-გრენდასთან. მხარეებმა ჯანდაცვის სფეროში თანამშრომლობის გაღრმავების შესაძლებლობები, პირველადი ჯანდაცვის მიმართულებით მიმდინარე რეფორმები და ჯანდაცვის სისტემების ეფექტიანობის გაზრდასთან დაკავშირებული საკითხები განიხილეს. შეხვედრაზე განსაკუთრებული ყურადღება დაეთმო ციფრული ჯანდაცვის განვითარებასა და ჯანდაცვის სისტემაში თანამედროვე ტექნოლოგიების ინტეგრაციის მნიშვნელობას.ჯანმრთელობის მსოფლიო ასამბლეის 79-ე სესიის ფარგლებში მიხეილ სარჯველაძე სხვადასხვა ქვეყნის ჯანდაცვის მინისტრებსა და საერთაშორისო ორგანიზაციების წარმომადგენლებთან შეხვედრებს განაგრძობს.შეხვედრებში ასევე მონაწილეობენ: ჯანდაცვის სამინისტროს სტრატეგიული განვითარებისა და ანალიტიკის დეპარტამენტის უფროსი ლელა სულაბერიძე და ჟენევაში გაეროს განყოფილებასთან და სხვა საერთაშორისო ორგანიზაციებთან საქართველოს მუდმივი წარმომადგენელი ალექსანდრე მაისურაძე.

1779259604

მიხეილ სარჯველაძე ჯანმრთელობის მსოფლიო ასამბლეის 79-ე სესიის ფარგლებში გამართულ გენერალურ დისკუსიაზე სიტყვით გამოვიდა

მიხეილ სარჯველაძე  ჯანმრთელობის მსოფლიო ასამბლეის 79-ე სესიის ფარგლებში გამართულ გენერალურ დისკუსიაზე სიტყვით გამოვიდა. მინისტრმა საქართველოში განხორციელებულ ჯანდაცვის რეფორმებზე ისაუბრა და აღნიშნა, რომ საყოველთაო ჯანდაცვის პროგრამის ამოქმედების შემდეგ, სახელმწიფოს მიერ დაფინანსებულ სერვისებზე ხელმისაწვდომობა მოსახლეობის 95%-ზე მეტს აქვს.ჯანდაცვის მინისტრის განცხადებით, ბოლო წლებში გატარებულმა ფარმაცევტულმა რეფორმებმა, მათ შორის, რეფერენტულმა ფასწარმოქმნამ, მედიკამენტებზე ხელმისაწვდომობა მნიშვნელოვნად გააუმჯობესა.„ბოლო ათწლეულის განმავლობაში ჩვენ განვაგრძობთ ჯანდაცვის სისტემის გაძლიერებას ისეთი რეფორმების მეშვეობით, რომლებიც მოსახლეობისთვის ხელმისაწვდომობის, ხარისხისა და ფინანსური დაცვის გაუმჯობესებას ისახავს მიზნად.საყოველთაო ჯანდაცვის პროგრამის ამოქმედების შემდეგ, მოსახლეობის 95%-ზე მეტს აქვს წვდომა სახელმწიფოს მიერ დაფინანსებულ ჯანდაცვის სერვისებზე. მნიშვნელოვნად გაფართოვდა ხელმისაწვდომობა აუცილებელ სამედიცინო მომსახურებაზე, ხოლო მოქალაქეების ჯიბიდან გადახდები საგრძნობლად შემცირდა. ბოლო წლებში ჩვენ განვახორციელეთ მნიშვნელოვანი ფარმაცევტული რეფორმები, მათ შორის, რეფერენტული ფასწარმოქმნისა და მართული შესვლის შეთანხმების მექანიზმების დანერგვა, რამაც მედიკამენტებზე ხელმისაწვდომობა გააუმჯობესა და მოგვცა შესაძლებლობა - სახელმწიფო პროგრამების ფარგლებში ონკოლოგიური და ქრონიკული დაავადებების სამკურნალო მედიკამენტებზე წლიური ლიმიტები გაგვეუქმებინა“ - განაცხადა მიხეილ სარჯველაძემ.მინისტრმა ისაუბრა პირველადი ჯანდაცვის მიმდინარე რეფორმაზეც, რომელიც პრევენციაზე, ხარისხიან და პაციენტზე ორიენტირებულ სერვისებზეა დაფუძნებული. მიხეილ სარჯველაძემ აღნიშნა, რომ რეფორმა მოიცავს დაფინანსების ახალ მექანიზმებს, ციფრულ ტრანსფორმაციას, ხარისხის სტანდარტებისა და შედეგზე დაფუძნებული მიდგომების დანერგვას.ჯანმრთელობის მსოფლიო ასამბლეის 79-ე სესიაში, მიხეილ სარჯველაძესთან ერთად, მონაწილეობენ: პარლამენტის ჯანმრთელობის დაცვისა და სოციალურ საკითხთა კომიტეტის თავმჯდომარე ზაზა ლომინაძე, ჯანდაცვის სამინისტროს სტრატეგიული განვითარებისა და ანალიტიკის დეპარტამენტის უფროსი ლელა სულაბერიძე და ჟენევაში გაეროს განყოფილებასთან და სხვა საერთაშორისო ორგანიზაციებთან საქართველოს მუდმივი წარმომადგენელი ალექსანდრე მაისურაძე.

1779192959

თბილისის საკრებულოსა და ფარმაცევტულ კომპანია შპს „პსპ-ფარმას“ შორის ურთიერთთანამშრომლობის მემორანდუმი გაფორმდა

თბილისის საკრებულოსა და ფარმაცევტულ კომპანია შპს  „პსპ-ფარმას“ შორის ურთიერთთანამშრომლობის მემორანდუმი გაფორმდა, რომლის საფუძველზეც  თბილისში რეგისტრირებული მოქალაქეებისთვის, რომლებიც გამგეობას ან მერიას მედიკამენტების საჭიროების თაობაზე მიმართავენ,  „პსპ-ფარმას“ ნებისმიერი აფთიაქიდან კვირის ნებისმიერ დღეს მედიკამენტები ფასდაკლების დღეებში არსებული ფასებით გაიცემა.დოკუმენტს ხელი ჯანმრთელობის დაცვის და სოციალურ საკითხთა კომისიის ინიციატივით მოეწერა.ხელმოწერის ცერემონიალი დედაქალაქის წარმომადგენლობით ორგანოში გაიმართა.მემორანდუმს ხელი საკრებულოს თავმჯდომარემ, ზურაბ აბაშიძემ, ჯანმრთელობის დაცვის და სოციალურ საკითხთა კომისიის თავმჯდომარემ, ბექა მიქაუტაძემ და ფარმაცევტული კომპანია შპს „პსპ-ფარმას“ სოციალური პროექტების მომსახურების სამსახურის უფროსმა გიორგი ტალიაშვილმა მოაწერეს.ხელმოწერის ცერემონიალის შემდეგ დედაქალაქის საკრებულოს თავმჯდომარემ, ზურაბ აბაშიძემ, ისაუბრა აღნიშნული შეთანხმების მნიშვნელობაზე, რომელიც მოქალაქეებისთვის მედიკამენტებზე შეღავათიანი ფასების ხელმისაწვდომობის გაზრდას ითვალისწინებს.ჯანმრთელობის დაცვის და სოციალურ საკითხთა კომისიის თავმჯდომარემ, ბექა მიქაუტაძემ, გაფორმებულ დოკუმენტს მოქალაქეებისთვის ძალიან მნიშვნელოვანი უწოდა  და ფარმაცევტული კომპანიის გუნდს თანამშრომლობისთვის მადლობა გადაუხადა. გაფორმებული დოკუმენტის საფუძველზე შპს „პსპ-ფარმა“ იღებს ვალდებულებას თბილისის მუნიციპალიტეტის მერიის ქვეპროგრამების  -  „სამედიცინო და სხვა სოციალური საჭიროებების დახმარების ღონისძიებებისა“ და  თბილისის მუნიციპალიტეტის რაიონული გამგეობების  „სხვა სოციალური (დახმარების) ღონისძიებები რაიონებში“ ფარგლებში,  თბილისის მუნიციპალიტეტში რეგისტრირებული ბენეფიციარებისთვის მედიკამენტებზე (ფარმაცევტულ პროდუქციაზე) კალკულაციები გასცეს ფასდაკლების დღეებში არსებული ფასებით კვირის ნებისმიერ დღეს.კერძოდ, როდესაც თბილისში რეგისტრირებული მოქალაქე გამგეობას ან მერიას მედიკამენტების საჭიროების შესახებ განცხადებით მიმართავს,  მისთვის „პსპ-ფარმას“ ნებისმიერ აფთიაქში კვირის ნებისმიერ დღეს მედიკამენტი გაიცეს ფასდაკლების დღეებში არსებული ფასებით. მემორანდუმი ძალაში შედის მხარეთა მიერ მისი ხელმოწერის დღიდან და 1 წლის ვადით არის ძალაში.ხელმოწერის ცერემონიალს საკრებულოს ჯანმრთელობის დაცვის და სოციალურ საკითხთა კომისიის წევრები ქეთევან ჭავჭანიძე და ოთარ ჩრდილელი ესწრებოდნენ.

1779191562

„ახლა ვიმყოფები მსოფლიო ჯანდაცვის ასამბლეაზე, სადაც ძალიან ბევრ ქვეყანასთან მოგვიწია შეხვედრა. პრაქტიკულად არავის მსოფლიოში დღეს არ აქვს რეალური პასუხი - უკლებლივ ყველა არის ამ ძიების პროცესში“ - მიხეილ სარჯველაძე დიუშენის პრეპარატებზე

„ეს არ არის ის სფერო, სადაც მხოლოდ ემოციებზე დაყრდნობით უნდა მივიღოთ გადაწყვეტილება, აუცილებელი და უმნიშვნელოვანესია მეცნიერული  მტკიცებულებები, სხვა შემთხვევაში შეცდომის დაშვების რისკი მაღალია“ - ამის  შესახებ ჯანდაცვის მინისტრმა დიუშენის სამკურნალო მედიკამენტებთან დაკავშირებით განაცხადა.ჯანდაცვის მინისტრი უკვე შეხვდა ბელგიის ფედერალური ჯანდაცვის სამინისტროს გენერალურ მდივანს, პოლონეთის ჯანდაცვის მინისტრს, ასევე -  საერთაშორისო პარტნიორი ორგანიზაციების წარმომადგენლებს.საუბრის ერთ-ერთი მთავარი თემა იშვიათი დაავადებების სამკურნალო ახალ პრეპარატებზე ხელმისაწვდომობის საკითხი და სხვადასხვა ქვეყნის გამოცდილება იყო. მიხეილ სარჯველაძის განმარტებით, მნიშვნელოვანია სხვადასხვა ქვეყნის წარმომადგენლებისგან დიუშენის კუნთოვანი დისტროფიის სამკურნალო მედიკამენტებთან დაკავშირებით პრაქტიკაში არსებული გამოცდილების, კლინიკური შედეგებისა და რეალურ მონაცემებზე დაფუძნებული ინფორმაციის გაცვლა და ანალიზი.„ახლა ვიმყოფები მსოფლიო ჯანდაცვის ორგანიზაციის მიერ ორგანიზებულ მსოფლიო ჯანდაცვის ასამბლეაზე, სადაც ძალიან ბევრ ქვეყანასთან მოგვიწია შეხვედრა. გვაქვს შესაძლებლობა, ვესაუბროთ წამყვან ჯანდაცვის სისტემებს, ქვეყნებს, რომლებსაც აქვთ როგორც ფინანსური, ისე ძალიან დიდი ინტელექტუალური და სამეცნიერო შესაძლებლობები იმისთვის, რომ კონკრეტული გადაწყვეტილებები იქნას მიღებული. გასათვალისწინებელია, რომ პრაქტიკულად არავის მსოფლიოში დღეს არ აქვს რეალური პასუხები. აბსოლუტურად უკლებლივ ყველა ამ ძიების პროცესშია. ჩვენც, ბუნებრივია, ჩართული ვართ ამ პროცესში და მაქსიმალური იმედით ველოდებით იმ მომენტს, როდესაც გვექნება კონკრეტული პასუხები კონკრეტულ მედიკამენტებთან დაკავშირებით. ბუნებრივია, ეს მოგვცემს გადაწყვეტილების მიღების შესაძლებლობას“ - განაცხადა მინისტრმა.მინისტრის განმარტებით, აღნიშნულ საკითხთან დაკავშირებით კითხვები აქვს წამყვანი ჯანდაცვის სისტემის მქონე ევროპულ ქვეყნებსაც,  რაც დამატებითი დიალოგისა და ინფორმაციის გაცვლის საჭიროებას ქმნის.მისივე განცხადებით, მნიშვნელოვანია, რომ საკითხთან დაკავშირებით მუშაობა  პროფესიულ და კონსტრუქციულ ფორმატში გაგრძელდეს, რათა გადაწყვეტილებები რაციონალურ შეფასებებსა და ფაქტობრივ გარემოებებზე დაყრდნობით იქნეს მიღებული.

1779084696

მიხეილ სარჯველაძე ციციშვილის კლინიკაში ნერვ-კუნთოვანი დაავადებების მართვის მიმართულებით არსებულ შესაძლებლობებს გაეცნო

ჯანდაცვის მინისტრი იშვიათი დაავადებების სამკურნალო სახელმწიფო პროგრამის ახალ კომპონენტში სერვისის მიმწოდებლად ჩართვის მსურველ ი.ციციშვილის სახელობის ბავშვთა კლინიკაში იმყოფებოდა. მიხეილ სარჯველაძე სამედიცინო დაწესებულებაში ამ მიმართულებით არსებულ შესაძლებლობებს  გაეცნო.პროგრამის ახალი კომპონენტი  სპინალურ კუნთოვანი ატროფიის, დიუშენისა და ბეკერის კუნთოვანი დისტროფიის მქონე პაციენტებისთვის ამბულატორიულ, სტაციონარულ და კვლევით მომსახურებებს უზრუნველყოფს.მიხეილ სარჯველაძემ დიაგნოსტიკისა და ამბულატორიის განყოფილებები დაათვალიერა და მათ ტექნიკურ აღჭურვილობას გაეცნო. კლინიკის ექიმებთან და  ხელმძღვანელებთან ერთად განიხილა ნერვ-კუნთოვანი დაავადებების მქონე პაციენტების მომსახურებებისთვის სამედიცინო დაწესებულებაში არსებული შესაძლებლობები, ამასთან, ისაუბრეს ბენეფიციართა საჭიროებებსა და პროგრამის ეფექტურად მართვის საკითხებზე.მინისტრის განცხადებით,  ნერვ-კუნთოვანი დაავადებების მკურნალობის ერთ-ერთი მნიშვნელოვანი კომპონენტი მათი მიმდინარეობის მონიტორინგია. როგორც მიხეილ სარჯველაძემ აღნიშნა, სიახლე ბენეფიციარებს შესაძლებლობას აძლევს -  მიიღონ საჭირო სერვისების ფართო სპექტრი, რაც მათი ჯანმრთელობის მდგომარეობის მართვის პროცესს უფრო ეფექტურს გახდის.იშვიათი დაავადებების სამკურნალო სახელმწიფო პროგრამის ახალი კომპონენტის ფარგლებში ბენეფიციარები ისარგებლებენ ნევროლოგის, კარდიოლოგის, პულმონოლოგის, ენდოკრინოლოგის, გასტროენტეროლოგის/ნუტრიციოლოგის, ორთოპედის კონსულტაციით, ასევე - კლინიკო-ლაბორატორიული და ინსტრუმენტული კვლევებით, როგორიცაა: ელექტროკარდიოგრაფია, ექოკარდიოსკოპია, 24-საათიანი ჰოლტერ-მონიტორინგი, სპირომეტრია, დენსიტომეტრია, ვიტამინ D კონცენტრაციის განსაზღვრა, გულმკერდის რენტგენოგრაფია, ხერხემლის რენტგენოგრაფია, სისხლის საერთო ანალიზი, შარდის საერთო ანალიზი, კრეატინკინაზას განსაზღვრა, თირკმლის ფუნქციური სინჯები (შარდოვანა, კრეატინინი), ღვიძლის ფუნქციური სინჯები (ტუტე ფოსფატაზა, ალტ, ასტ), ელექტროლიტების (ნატრიუმი, კალიუმი, ქლორი, მაგნიუმი, რკინა) განსაზღვრა, გლუკოზის განსაზღვრა სისხლში, განავლის კვლევა ფარულ სისხლდენაზე.

1778998468

რესპუბლიკურ საავადმყოფოში ექთნების საერთაშორისო კვირეული აღინიშნა - ჯანდაცვის მინისტრმა მედპერსონალს მადლობის სიგელები გადასცა

ექთნების საერთაშორისო კვირეულის ფარგლებში აკადემიკოს ნ. ყიფშიძის სახელობის ცენტრალურ საუნივერსიტეტო კლინიკაში ღონისძიება გაიმართა. ჯანდაცვის მინისტრმა მედპერსონალს პროფესიული დღე მიულოცა, გაწეული საქმიანობისთვის მადლობა გადაუხადა და აღნიშნა, რომ მათი შრომა და წვლილი ჯანდაცვის სისტემის გამართულად ფუნქციონირებაში ფასდაუდებელია.რესპუბლიკური საავადმყოფოს ექთნებს ასევე სიტყვით მიმართა საქართველოს სამედიცინო ჰოლდინგის დირექტორმა მალხაზ ჟორჟიკაშვილმა და აღნიშნა, რომ ექთნების პროფესია ჯანდაცვის სისტემის ეფექტიანი ფუნქციონირების ერთ-ერთი მთავარი საფუძველია.მიხეილ სარჯველაძემ და მალხაზ ჟორჟიკაშვილმა რესპუბლიკური საავადმყოფოს ექთნებს პროფესიული საქმიანობისთვის მადლობის სიგელები გადასცეს.ღონისძიებას ესწრებოდა ჯანდაცვის მინისტრის მოადგილე თეა გიორგაძე, ასევე - რესპუბლიკური საავადმყოფოს სამედიცინო პერსონალი.

1778962502

იწვევს თუ არა ტატუ ლიმფომასა და კანის კიბოს - მაია ბუწაშვილი უახლესი კვლევის შედეგებს აზიარებს

ინფექციონისტი მაია ბუწაშვილი ახალი კვლევის შესახებ მნიშვნელოვან ინფორმაციას აზიარებს.„სხვადასხვა კვლევა აჩვენებს ტატუს ასოციაციას ლიმფომასა და კანის კიბოსთან. პირდაპირი მიზეზ-შედეგობრივი კავშირი ჯერ განსაზღვრული არ არის, თუმცა კვლევების შედეგად გამოიკვეთა, რომ ლიმფომის დიაგნოზის მქონე ადამიანებს უფრო ხშირად ჰქონდათ ტატუ ლიმფომის არმქონეებთან შედარებით. ერთ-ერთი ასეთი კვლევა ჩატარდა ასეულობით წყვილ ტყუპებში, რათა სხვა გარეგანი ფაქტრორების შესაძლო გავლენა გათვალისწინებული ყოფილიყო და დადგინდა, რომ ტატუს მქონე ტრუპისცალებს 62%-ით მაღალი ქონდათ ამ ჯგუფის სიმსივნეების რისკი.რისკი მატულობს ტატუს ზომასთან ერთად და დიდი ტატუს შემთხვევაში მკვეთრად მაღალია მექანიზმი შემდგომ შესწავლას საჭიროებს, თუმცა მიზეზი შეიძლება იყოს ის, რომ ტატუს ადგილიდან პიგმენტის ტრანსპორტირება ხდება ლიმფურ სისტემაში, სადაც წლების მანძილზე რჩება და ბიოლოგიურად აქტიურია. ასევე რისკის შემცველია ტატუში მძიმე მეტალების და სხვადასხვა კარცინოგენების არსებობა. ამ საკითხის შესახებ მეცნიერების ინტერესი სულ უფრო მატულობს და შემდგომში ჩატარებული უფრო კომპლექსური კვლევები მეტ ინფორმაციას მოგვცემს ტატუს და სიმსივნის ასოციაციის შესახებ.“ - წერს მაია ბუწაშვილი.

1778923679

დევნილთა სააგენტო იძულებით გადაადგილებულ 500-ზე მეტ ოჯახს საცხოვრებელ სახლებს შეუსყიდის

დევნილთა სააგენტო იძულებით გადაადგილებულ 500-ზე მეტ ოჯახს - მთელი ქვეყნის მასშტაბით, საცხოვრებელ სახლებს შეუსყიდის.იმ ოჯახების სია, რომელთა განსახლების თაობაზე დევნილთა საკითხების შემსწავლელმა კომისიამ დადებითი გადაწყვეტილება მიიღო, სააგენტოს ვებგვერდზე უკვე გამოქვეყნდა, - ინფორმაციას ჯანდაცვის სამინისტრო ავრცელებს.უწყების ცნობით, იძულებით გადაადგილებულ ოჯახებს ექვსთვიანი ვადა ეძლევათ, რათა სახლები საქართველოს ნებისმიერ რეგიონში თავადვე შეარჩიონ და სააგენტოს წარუდგინონ."აღსანიშნავია, რომ დევნილი ოჯახების განსახლების მიზნით, საცხოვრებელი კომპლექსების მშენებლობის პარალელურად, სახლების შესყიდვის პროგრამამ ბოლო პერიოდში განსაკუთრებული მასშტაბები შეიძინა. მიმდინარე წელს სააგენტომ სახლი უკვე 1 050 დევნილ ოჯახს შეუსყიდა.იძულებით გადაადგილებული ოჯახების საცხოვრებლით უზრუნველყოფის პროცესი მომავალში კიდევ უფრო აქტიური რეჟიმით გაგრძელდება," - ნათქვამია გავრცელებულ ინფორმაციაში.

1778498400

ბათუმში წლის ყველაზე მასშტაბური დასაქმების ფორუმი გაიმართება

აჭარის ჯანმრთელობისა და სოციალური დაცვის სამინისტროს დასაქმების სააგენტოს, დასაქმების ხელშეწყობის სახელმწიფო სააგენტოსა და ბათუმის შოთა რუსთაველის სახელმწიფო უნივერსიტეტის ორგანიზებით, ქალაქ ბათუმში „დასაქმების ფორუმი 2026“ გაიმართება.ფორუმი სამუშაოს მაძიებლებს 300-ზე მეტ ვაკანსიას და 2000-მდე სამუშაო ადგილს შესთავაზებს. ღონისძიება მონაწილეებს მისცემს შესაძლებლობას, პირისპირ შეხვდნენ დამსაქმებლებს, გაეცნონ რეგიონის წამყვან კომპანიებს და იპოვონ საკუთარი ადგილი შრომის ბაზარზე.ფორუმი მიმდინარე წელს სამუშაოს მაძიებლებს სრულიად ახალი ფორმატითა და მასშტაბური შესაძლებლობებით უმასპინძლებს. ღონისძიება მიზნად ისახავს დამსაქმებლებისა და სამუშაოს მაძიებლების ერთმანეთთან დაკავშირებას, კარიერული განვითარების ხელშეწყობასა და შრომის ბაზარზე დასაქმების შესაძლებლობების გაფართოებას.„დასაქმების ფორუმი 2026“-ის ფარგლებში, 18-22 მაისს, გაიმართება კარიერული კვირეული, რომელიც 18 მაისს საზეიმოდ გაიხსნება და 22 მაისს დასაქმების ფორუმითდასრულდება.კვირეულის განმავლობაში მონაწილეებს შესაძლებლობა ექნებათ, დაესწრონ საჯარო ლექციებს, პრაქტიკულ ვორქშოფებსა და საინფორმაციო შეხვედრებს. დაგეგმილია პანელური დისკუსია შრომის ბაზრის აქტუალურ საკითხებზე. საჯარო ლექციებს წარუძღვებიან წამყვანი ტრენერები - ანდრო დგებუაძე, ზურაბ მხეიძე და ლატავრაჩუბინიძე.კვირეულის მთავარი ღონისძიება - „დასაქმების ფორუმი 2026“ 22 მაისს უნივერსიტეტის ეზოში გაიმართება. წარმოდგენილი იქნება 80-ზე მეტი კომპანია სხვადასხვა სექტორიდან, კერძოდ, ადმინისტრაციული, საზღვაო, ვაჭრობა/დისტრიბუციის, სასტუმრო/სარესტორნო, მრეწველობის, ტრანსპორტი/ლოჯისტიკის, მშენებლობის, ფინანსების, ჯანდაცვისა და განათლების სფეროებიდან.