1783955601

რუბიო: დღეს, გავლენიან ძალებსა და შორეულ ცენტრებს მიაჩნიათ, რომ უფლებამოსილნი არიან, განკარგონ თქვენი კანონები, თქვენი ქვეყანა და თქვენი ცხოვრებაც კი და მათთვის სრულიად უმნიშვნელოა, ეთანხმებით თუ არა მათ ამ ნაბიჯს - დამოუკიდებლობა ჩვენი ბუნებითი, თანდაყოლილი უფლებაა და ჩვენ არასდროს მივცემთ უცხოელ ბიუროკრატებს იმის ნებას, რომ ის წაგვართვან

უკვე 250 წელია, რაც ამერიკელები, როგორც თავისუფალი და სუვერენული ერი, საკუთარ თავს თავად ვმართავთ. ჩვენ თავად ვირჩევთ ჩვენს ლიდერებს და თავად ვადგენთ ჩვენს კანონებს. როდესაც დანაშაულში გვდებენ ბრალს, ჩვენი ბედი ჩვენივე თანასწორთაგან დაკომპლექტებულმა ნაფიც მსაჯულთა სასამართლომ უნდა გადაწყვიტოს. ეს ჩვენი მმართველობის სისტემის არსებითი და შეუცვლელი ნაწილია, რომელიც ჩვენი საერთო ცხოვრების წესის საფუძველს ქმნის, - განაცხადა აშშ-ის სახელმწიფო მდივანმა, მარკო რუბიომ.„თუმცა დღეს, გავლენიანი ძალები და შორეული ცენტრები ცდილობენ, ეს უფლება წაგვართვან. მათ მიაჩნიათ, რომ უფლებამოსილნი არიან, განკარგონ თქვენი კანონები, თქვენი ქვეყანა და თქვენი ცხოვრებაც კი და მათთვის სრულიად უმნიშვნელოა, ეთანხმებით თუ არა მათ ამ ნაბიჯს.მსოფლიოს მეორე ბოლოში არსებობს დაწესებულება, რომელიც საკუთარ თავს „საერთაშორისო სისხლის სამართლის სასამართლოს“ უწოდებს. შესაძლოა, გსმენიათ კიდეც მის შესახებ, ან შესაძლოა - არა. თუმცა, დიდი ალბათობით, თქვენ არც მისი მოსამართლეების, არც პროკურორების და არც პრეზიდენტის ვინაობა გაგეგებათ. და სიმართლე ისაა, რომ არც უნდა იცოდეთ.თუმცა, სწორედ ამ წუთებში, საერთაშორისო სისხლის სამართლის სასამართლო და მისი თანამოაზრეები ჩვენი ქვეყნის წინააღმდეგ ომს აწარმოებენ - არა ტყვიებითა თუ რაკეტებით, არამედ კანონმდებლობით, შეთანხმებებითა და ე.წ. „საერთაშორისო სამართლის“ კარნახით.როდესაც 24 წლის წინ საერთაშორისო სისხლის სამართლის სასამართლო დაარსდა, გვპირდებოდნენ, რომ ის მხოლოდ შეზღუდული, დამხმარე მექანიზმის ფუნქციას შეასრულებდა: ეს იქნებოდა გლობალური ინსტანცია, რომელიც მხოლოდ უმძიმესი დანაშაულების - მაგალითად, გენოციდისა და სამხედრო დანაშაულების - დროს ჩაერეოდა, თანაც მხოლოდ მაშინ, თუ თავად ქვეყნის სასამართლო სისტემა აღმოჩნდებოდა უძლური, თავად აღესრულებინა მართლმსაჯულება.თუმცა, სინამდვილეში, საქმე გაცილებით უფრო რადიკალურ და უკიდურეს მოვლენასთან გვაქვს: ეს არის გლობალური ტრიბუნალი, დაკომპლექტებული არარჩეული გლობალისტი ბიუროკრატებით, რომლებიც პრეტენზიას აცხადებენ, რომ მათი ძალაუფლება პრაქტიკულად შეუზღუდავია.ამ გლობალური სასამართლოს საფრთხე დღითიდღე მძაფრდება. დღეს ის ჩვენი პოლიტიკური და სამართლებრივი სისტემის ყველა ფუნდამენტს ემუქრება - იქნება ეს სასაზღვრო სამსახურის აგენტები, რომლებიც მოძალადე დამნაშავეებს აძევებენ; ამერიკელი საზღვაო ქვეითები, რომლებიც სამშობლოს დასაცავად სიცოცხლეს სწირავენ; თუ პროკურორები, რომლებიც ამერიკელთა წინააღმდეგ მიმართულ ტერორისტულ შეთქმულებებს შლიან.თუ უმოქმედოდ დავრჩებით, ისინი ათასობით მილის იქით მყოფი უცხოელი მოსამართლეების განკარგულებაში აღმოჩნდებიან. მათ მუდმივად დაემუქრებათ დევნისა და პატიმრობის საფრთხე იმ ე.წ. „დანაშაულისთვის“, რაც საკუთარი სამშობლოს დაცვას გულისხმობს. ამერიკელ ხალხს ამაზე არასდროს განუცხადებია თანხმობა და არც არასდროს იტყვის.გადაიკითხეთ ჩვენი დამოუკიდებლობის დეკლარაცია: ჩვენ რევოლუციით დავუპირისპირდით უცხო ძალას, რომელიც „ოკეანეებს იქით გვგზავნიდა, რათა შეთითხნილი ბრალდებებისთვის გვეპასუხა“. დამოუკიდებლობა ჩვენი ბუნებითი, თანდაყოლილი უფლებაა და ჩვენ არასდროს მივცემთ უცხოელ ბიუროკრატებს იმის ნებას, რომ ის წაგვართვან.ეს ადმინისტრაცია არ იქნება გულგრილი დამკვირვებელი, როდესაც საერთაშორისო სისხლის სამართლის სასამართლო და მისი თანამოაზრეები ჩვენს ხალხს ემუქრებიან. თუ მათ მიაჩნიათ, რომ ჩვენი სუვერენიტეტის წართმევა შეუძლიათ, ჩვენ მათ ამერიკული სიმტკიცის ნამდვილ მნიშვნელობას დავანახებთ“, - აღნიშნა სახელმწიფო მდივანმა ვიდეომიმართვაში.  The International Criminal Court seeks to become the unaccountable arbiter of a new global law — empowered to prosecute and arrest our citizens at will and existentially threaten American sovereignty.We will teach the ICC the full meaning of American resolve. pic.twitter.com/2egHK1jA98 — Secretary Marco Rubio (@SecRubio) July 13, 2026

1783955484

ტრამპი: ჰორმუზის სრუტე ღიაა და დარჩება ღია, ირანთან ერთად ან მის გარეშე

ჰორმუზის სრუტე ღიაა და დარჩება ღია, ირანთან ერთად ან მის გარეშე, - განაცხადა აშშ-ის პრეზიდენტმა, დონალდ ტრამპმა.„ჩვენ ვაწესებთ „ირანულ ბლოკადას“, რომელსაც ასე იმიტომ ვუწოდებთ, რომ ის მხოლოდ ირანის გემებს ან მომხმარებლებს უშლის ხელს შესვლასა თუ გამოსვლაში. ყველა სხვა ქვეყანას ექნება სრუტის სამართლიანი და შეუფერხებელი გამოყენების შესაძლებლობა. ამიერიდან აშშ იქნება ცნობილი როგორც „ჰორმუზის სრუტის მცველი“. თუმცა, სამართლიანობის პრინციპიდან გამომდინარე, აშშ-ს აუნაზღაურდება გადაზიდული ტვირთის 20%-ის ოდენობით ის ყველა ხარჯი, რაც აუცილებელია მსოფლიოს ამ ძალიან არასტაბილური ნაწილისთვის უსაფრთხოებისა და დაცვის უზრუნველსაყოფად. პროცესი დაუყოვნებლივ დაიწყება“, - აღნიშნა აშშ-ის პრეზიდენტმა. 

1783954029

ჩინეთში, წყალდიდობის დროს, გველების ფერმიდან 900-მდე გველი გაიქცა - მათ შორის კობრები

ჩინეთის გუანსის ავტონომიურ რეგიონში, ტაიფუნ მაისაკით გამოწვეული ძლიერი წყალდიდობის შედეგად გველების ფერმა დაიტბორა, საიდანაც დაახლოებით 900 გველი გაიქცა, მათ შორის, მომაკვდინებლად შხამიანი კობრები.შემთხვევა ქალაქ ჰენჯოუს მახლობლად მოხდა. ადგილობრივმა ხელისუფლებამ მოსახლეობა გააფრთხილა, არ მიუახლოვდნენ ქვეწარმავლებს. ადგილზე გველების დასაჭერად სპეციალური ჯგუფები გაგზავნეს.ჩინური მედიის ცნობით, ფერმაში გველებს ტრადიციული მედიცინისთვის, შხამის საწინააღმდეგო პრეპარატებისა და საკვები პროდუქტების წარმოებისთვის ზრდიდნენ.

1783951920

ჩვენ შევინარჩუნებთ ჰორმუზის სრუტეს და, ალბათ, მას ვმართავთ, მის დასაცავად ჩვენ დიდ ანაზღაურებას მივიღებთ - ტრამპი

აშშ-ის პრეზიდენტმა, დონალდ ტრამპმა განაცხადა, რომ აშშ, სავარაუდოდ, ჰორმუზის სრუტეს დაიკავებს და ამ სასიცოცხლოდ მნიშვნელოვანი სანაოსნო გზის კონტროლისთვის თანხა უნდა აუნაზღაურდეს.„ჩვენ შევინარჩუნებთ სრუტეს და, ალბათ, მას ვმართავთ. ჩვენ გავხდებით სრუტის მცველი. შესაძლოა, ამას სრუტის მფარველი ანგელოზი ვუწოდოთ. და ამისთვის ანაზღაურება უნდა მივიღოთ. ჩვენ მას დავიცავთ. მის დასაცავად ჩვენ დიდ ანაზღაურებას მივიღებთ – დიდ ფულს. ჩვენ ანაზღაურებას მივიღებთ, რადგან სხვა ერები ძალიან მდიდრები არიან. ისინი ჩვენს მხარეს არიან და არ შეგვიძლია, რომ ეს უბრალოდ გავაკეთოთ. ჩვენ შეთანხმება გვქონდა. ეს შეთანხმება დასრულებული იყო და შემდეგ ისინი დაარღვიეს. ისინი ყოველთვის არღვევენ მას. ჩვენ ამ ადამიანებთან ათი შეთანხმება გვქონდა და ამიტომ მათზე ძალიან ძლიერ დარტყმას ვაპირებთ“, – განაცხადა ტრამპმა.თავის მხრივ ირანის რევოლუციის გუშაგთა კორპუსმა განაცხადა, რომ სრუტეში რეგულარული საზღვაო მიმოსვლის აღდგენის ერთადერთი გზა აშშ-ის სამხედრო ინტერვენციების შეწყვეტაა სანაოსნო გზაზე და გააფრთხილა, რომ „ჩარევის გაგრძელებამ შეიძლება, გამოიწვიოს უფრო დიდი ინციდენტები გლობალური ნავთობისა და გაზის სექტორში“.

1783949798

დიდმა ბრიტანეთმა და ევროკავშირმა რუსეთის მთავარი სადაზვერვო სამმართველოს ხელმძღვანელ პირებს „მავნე კიბერქმედებების“ გამო სანქციები დაუწესეს

დიდმა ბრიტანეთმა და ევროკავშირმა რუსეთის მთავარი სადაზვერვო სამმართველოს ხელმძღვანელ პირებს „მავნე კიბერქმედებების“ გამო სანქციები დაუწესეს.„ევროკავშირი და მისი წევრი სახელმწიფოები გმობენ რუსეთის მავნე კიბერქმედებებს და იმ კიბერეკოსისტემის გამოყენებას, რომელიც აერთიანებს როგორც სახელმწიფო, ისე არასახელმწიფო სტრუქტურებს, დაზვერვის სამსახურებიდან დაწყებული, კიბერდამნაშავეთა ჯგუფებით, ჰაკტივისტებითა და კერძო კომპანიებით დასრულებული“, – ნათქვამია ევროკავშირის საბჭოს განცხადებაში.ბრიუსელის ინფორმაციით, რუსეთის ფედერალური უსაფრთხოების სამსახურის მე-16 ცენტრი აკონტროლებს კიბერდამნაშავეთა არაერთ დაჯგუფებას, მათ შორის TURLA-ს. ევროკავშირის მტკიცებით, რუსეთის ფედერალური უსაფრთხოების სამსახური მრავალი წლის განმავლობაში ახორციელებდა კიბერშეტევებს ევროკავშირისა და მისი პარტნიორების, მათ შორის უკრაინის წინააღმდეგ, აღწევდა სამთავრობო ქსელებში და ახდენდა კრიტიკული ინფრასტრუქტურის საბოტაჟს.განცხადების თანახმად, 2010 წლიდან რუსეთის ფედერალური უსაფრთხოების სამსახურის მე-16 ცენტრი საფრანგეთში სტრატეგიული მნიშვნელობის სახელმწიფო უწყებების წინააღმდეგ კიბერჯაშუშობით იყო დაკავებული, ხოლო 2025 წლიდან ამავე საქმიანობას ახორციელებდა თავდაცვითი მრეწველობის წინააღმდეგ. გერმანიაში ცენტრის სამიზნე სახელმწიფო ინსტიტუტები იყო, ხოლო პოლონეთში კრიტიკული ინფრასტრუქტურა, მათ შორის თბოელექტროსადგურები.„ეს სანქციები დაარტყამს კიბერდამნაშავეთა იმ ქსელების ბირთვს, რომლებიც რუსეთის სახელმწიფო აგრესიას უწყობენ ხელს. გაერთიანებული სამეფო და ევროკავშირი მკაფიო სიგნალს უგზავნიან მოსკოვს, რომ ის ვეღარ შეძლებს მსგავსი შუამავალი ჯგუფების გამოყენებით პასუხისმგებლობის თავიდან არიდებას“,- განაცხადა დიდი ბრიტანეთის საგარეო საქმეთა მინისტრმა, ივეტ კუპერმა.დიდმა ბრიტანეთმა სანქციები დაუწესა 24 ფიზიკურ და იურიდიულ პირს, მათ შორის რუსეთის მთავარი სადაზვერვო სამმართველოს ხელმძღვანელ პირებს ვიაჩესლავ სტაფეევს, ივან სენინსა და ივან კასიანენკოს. ევროკავშირის შავ სიაში კი მოხვდა ცხრა ფიზიკური პირი და ოთხი კომპანია, მათ შორის ივან კასიანენკო.ცნობისთვის, მას შემდეგ, რაც ევროკავშირმა რუსეთი კიბერშეტევებში დაადანაშაულა, გერმანიის საგარეო საქმეთა სამინისტრომ რუსეთის ელჩი დაიბარა. რუსეთის ელჩის დაბარების შესახებ განაცხადეს საფრანგეთშიც.

1783946469

კაია კალასი: ევროკავშირი სომხეთში ჰიბრიდული საფრთხეების წინააღმდეგ ბრძოლის მიზნით მისიას გაგზავნის

ევროკავშირი სომხეთში ჰიბრიდული საფრთხეების წინააღმდეგ ბრძოლის მიზნით მისიას გაგზავნის, – ამის შესახებ ევროკავშირის საგარეო საქმეთა და უსაფრთხოების პოლიტიკის უმაღლესმა წარმომადგენელმა, კაია კალასმა განაცხადა.კალასის თქმით, აღნიშნულ გადაწყვეტილებას ევროკავშირის ქვეყნების საგარეო საქმეთა მინისტრები ბრიუსელში გამართულ შეხვედრაზე დაამტკიცებენ.„ჩვენ ასევე შევთანხმდებით სომხეთისთვის ახალ პარტნიორულ მისიაზე ჰიბრიდულ საფრთხეებთან, ასევე უცხოური ინფორმაციული მანიპულირებისა და ჩარევის წინააღმდეგ საბრძოლველად, რომელთა წინაშეც ის ამჟამად დგას“, – განაცხადა კაია კალასმა ევროკავშირის საგარეო საქმეთა მინისტრების შეხვედრაზე.

1783939101

საფრანგეთის დედაქალაქის სამხრეთით ტყის ხანძარი მძვინვარებს - ხელისუფლება სტიქიას „საშიშსა“ და „მასშტაბურს“ უწოდებს

საფრანგეთის დედაქალაქის სამხრეთით მასშტაბური ტყის ხანძარი მძვინვარებს. „ბიბისის“ ცნობით, საფრანგეთის ხელისუფლება სტიქიას „საშიშსა“ და „მასშტაბურს“ უწოდებს.როგორც მედია წერს, ფონტენბლოს ტყეში ხანძრის ჩასაქრობად სასწრაფოდ გააგზავნეს ორი თვითმფრინავი. ხანძარმა სერიოზულად შეაფერხა სატრანსპორტო მოძრაობა. ნაწილობრივ გადაკეტილია ქვეყნის მთავარი ავტომაგისტრალი, რომელიც ჩრდილოეთსა და სამხრეთს აკავშირებს.მანამდე ხანძრის გამო პარიზიდან აღმოსავლეთის მიმართულების ავტომაგისტრალიც პარალიზებული იყო. შეფერხებით მუშაობს საფრანგეთის სამხრეთისკენ მიმავალი მაღალსიჩქარიანი სარკინიგზო ხაზიც.საფრანგეთის რკინიგზის ინფორმაციით, პარიზის ლიონის სადგურზე მიმავალი მატარებლები ექვსი საათის დაგვიანებით ასრულებდნენ რეისებს.ფონტენბლოს ტყე, სადაც ხანძარი მძვინვარებს, პარიზიდან დაახლოებით 60 კილომეტრში მდებარეობს. ხელისუფლებამ განაცხადა, რომ ცეცხლი სწრაფად გავრცელდა 800 ჰექტარზე და მისი ფართობი კვლავ იზრდება.ამჟამად პარიზის რეგიონში ცხელი და მშრალი ამინდია.ცნობისთვის, ზაფხულში ევროპის რამდენიმე ქვეყანაში ტემპერატურის რეკორდული მაჩვენებლები დაფიქსირდა, რასაც რამდენიმე მასშტაბური ტყის ხანძარი მოჰყვა. ესპანეთის ქალაქ ალმერიაში ტყის ხანძარს, სულ მცირე, 13 ადამიანის სიცოცხლე ემსხვერპლა. დიდ ბრიტანეთში კი მეხანძრეები ინგლისისა და უელსის სხვადასხვა რეგიონში ებრძოდნენ ხანძრებს.

1783933346

ილჰამ ალიევი: ბაიდენი სენატორობისას აზერბაიჯანის წინააღმდეგ სანქციების ერთ-ერთი ინიციატორი იყო

ბაიდენი როდესაც სენატორი იყო, ის აზერბაიჯანის წინააღმდეგ სანქციების შემოღების ერთ-ერთი ინიციატორი იყო, – ამის შესახებ აზერბაიჯანის პრეზიდენტმა, ილჰამ ალიევმა შუშის მეოთხე გლობალური მედიაფორუმის გახსნაზე განაცხადა.ალიევის თქმით, რეგიონის განვითარების შესახებ აშშ-ის ყოფილი პრეზიდენტის ხედვა ფრაგმენტაციას, კონფლიქტსა და კონფრონტაციას გულისხმობდა.„რა თქმა უნდა, ასეთ პირობებში მისი მიზნების მიღწევა უფრო ადვილი იქნებოდა. მაგრამ ბატონ ტრამპს განსხვავებული ხასიათი აქვს. ის მშვიდობისკენ ისწრაფვის და მშვიდობას შესაძლებლობად აღიქვამს. დღეს უკვე დამყარებულია მშვიდობა, რაც ახალ შესაძლებლობებს ქმნის“, – აღნიშნა აზერბაიჯანის პრეზიდენტმა.

1783930685

დიდ ბრიტანეთში, 71 წლის წინ სიკვდილით დასჯილი ქალი შეიწყალეს

დიდი ბრიტანეთის ვიცე-პრემიერისა და იუსტიციის მდივნის, დევიდ ლემის განცხადებით, მეფე ჩარლზ III-მ მისი რეკომენდაციის საფუძველზე პირობითად შეიწყალა რუთ ელისი — ქალი, რომელიც ბრიტანეთის ისტორიაში სიკვდილით დასჯილი უკანასკნელი ქალი იყო. ამის შესახებ The Guardian წერს.რუთ ელისი 1955 წელს, 28 წლის ასაკში ჩამოახრჩვეს. იგი დამნაშავედ ცნეს თავისი საყვარლის, დევიდ ბლეიკლის მკვლელობაში, რომელსაც ორი წლის განმავლობაში იცნობდა.ელისის პირობითი შეწყალების მოთხოვნით შუამდგომლობა მისმა ოთხმა შვილიშვილმა წარადგინა. მათი თქმით, მკვლელობა წლების განმავლობაში გადატანილი ფიზიკური და ფსიქოლოგიური ძალადობის, ასევე ტრავმის შედეგი იყო, თუმცა სასამართლომ ეს გარემოებები სათანადოდ არ გაითვალისწინა.The Guardian-ის ინფორმაციით, თუ საქმე დღეს განიხილებოდა, ნაფიც მსაჯულებს შეეძლოთ ემსჯელათ იმაზე, რომ ელისი მოქმედებდა კონტროლის დაკარგვისა და შემცირებული პასუხისმგებლობის მდგომარეობაში. ასეთ შემთხვევაში ბრალდება შესაძლოა განზრახ მკვლელობიდან გაუფრთხილებლობით მკვლელობად გადაკვალიფიცირებულიყო, რაც მნიშვნელოვნად მსუბუქ სასჯელს გამოიწვევდა.პირობითი შეწყალება არ აუქმებს გამამტყუნებელ განაჩენს. ის მხოლოდ ცვლის სასჯელს უფრო მსუბუქით. რუთ ელისის შემთხვევაში ეს ნიშნავს, რომ სიკვდილით დასჯა ფორმალურად სამუდამო პატიმრობით ჩანაცვლდა.„შეწყალება ვერ შეცვლის იმას, რაც 71 წლის წინ მოხდა. ის ვერ დააბრუნებს დანგრეულ ცხოვრებას, მიტოვებულ შვილებსა და დაკარგულ წლებს. თუმცა, ოფიციალურად და საბოლოოდ ადასტურებს, რომ რუთი სიკვდილით არ უნდა დაესაჯათ და რომ მართლმსაჯულების სისტემამ იგი ვერ დაიცვა. ეს ჩვენი ოჯახისთვის ძალიან ბევრს ნიშნავს“, — განაცხადა ელისის შვილიშვილმა, ლორა ანსტონმა.რუთ ელისი მარტოხელა დედა იყო და ორ შვილს ზრდიდა. სასამართლო პროცესის დროს იგი ცივსისხლიან მკვლელად იყო წარმოჩენილი, თუმცა მოგვიანებით გაირკვა, რომ დევიდ ბლეიკლის მხრიდან წლების განმავლობაში ფიზიკური და ემოციური ძალადობის მსხვერპლი იყო.ელისისა და მისი ახლობლების ჩვენებების მიხედვით, მამაკაცი მას საჯაროდ სცემდა, კიბეებიდან გადმოაგდო, იმდენად ძლიერად დაარტყა ყურში, რომ დროებით სმენა დაკარგა, მუცელში მიყენებული დარტყმის შედეგად ორსულობა შეუწყდა და არაერთხელ დაემუქრა სიკვდილით.მიუხედავად ამისა, სასამართლო პროცესზე ძალადობის გავლენა ელისის ფსიქოლოგიურ მდგომარეობასა და მის ქმედებაზე პრაქტიკულად არ განხილულა. მეტიც, მოსამართლემ ნაფიც მსაჯულებს ურჩია, დაცვის მხარის არგუმენტები იმის შესახებ, რომ „მისი საყვარელი მას ცუდად ექცეოდა“, გადაწყვეტილების მიღებისას არ გაეთვალისწინებინათ.

1783930508

ბანკის ძარცვა სათამაშო იარაღებით და გატანილი 19 მილიონი დოლარი - არგენტინაში მომხდარი უპრეცენდენტო დანაშაულის დეტალები

2006 წლის 13 იანვარს არგენტინაში მოხდა ერთ-ერთი ყველაზე ცნობილი ბანკის ძარცვა, რომელსაც მოგვიანებით „საუკუნის ძარცვა“ უწოდეს.ყველაფერი ჩვეულებრივ სამუშაო დღეს დაიწყო. ხუთი ნიღბიანი მამაკაცი ბუენოს-აირესის გარეუბანში მდებარე Banco Río-ს ფილიალში შევიდა. მათ თანამშრომლები და კლიენტები მძევლად აიყვანეს და პოლიციას აცნობეს, რომ შენობაში შეიარაღებული მძარცველები იყვნენ.ბანკთან მალე ათასობით სპეცრაზმელი და პოლიციელი მივიდა. ყველას ეგონა, რომ დამნაშავეები შენობაში იყვნენ და მოლაპარაკებებს აწარმოებდნენ.მაგრამ სინამდვილეში ყველაფერი სხვა გეგმით მიმდინარეობდა.სანამ პოლიცია შენობის გარეთ ელოდებოდა, მძარცველების ნაწილი ბანკის სარდაფში მდებარე სეიფებს ცლიდა. მათ დაახლოებით 147 საცავი გახსნეს და იქიდან ფული, ძვირფასეულობა და სხვა ფასეულობები წაიღეს. ნადავლის ღირებულება დაახლოებით 19 მილიონ დოლარად შეფასდა.ყველაზე საინტერესო კი მათი გაქცევის გზა იყო - წინასწარ გათხრილი გვირაბის საშუალებით მძარცველები ქალაქის საკანალიზაციო სისტემაში ჩავიდნენ, შემდეგ კი ნავით გაიქცნენ. როდესაც რამდენიმე საათის შემდეგ სპეცრაზმი ბანკში შეიჭრა, დამნაშავეები იქ აღარ იყვნენ.მძარცველებმა ადგილზე მხოლოდ სათამაშო იარაღები და პატარა წერილი დატოვეს, რომელზეც ეწერა:„მდიდრების უბანში, იარაღისა და სიძულვილის გარეშე. ეს მხოლოდ ფულია და არა სიყვარული.“ძარცვამ მთელი არგენტინა შოკში ჩააგდო. მიუხედავად იმისა, რომ დამნაშავეების ნაწილი მოგვიანებით დააკავეს, მოპარული ქონების დიდი ნაწილი ვეღარ იპოვეს.ეს საქმე დღემდე მსოფლიოში ერთ-ერთ ყველაზე კარგად დაგეგმილ ბანკის ძარცვად ითვლება და მასზე 2020 წელს ფილმიც გადაიღეს – „El Robo del Siglo“ („საუკუნის ძარცვა“), რომელიც სწორედ ამ რეალურ ისტორიას ეფუძნება.

1783930362

ძლიერ სიცხეს ევროპაში სულ მცირე 10 ათასი ადამიანი ემსხვერპლა

მხოლოდ ივნისის ბოლო კვირაში, ევროპაში ძლიერი სიცხის გამო 10 ათასზე მეტი ადამიანი გარდაიცვალა. ინფორმაციას Reuters-ი ევროპული სიკვდილიანობის მონიტორინგის ქსელის, EuroMOMO-ს მონაცემებზე დაყრდნობით ავრცელებს.სტატისტიკის თანახმად, რისკის ქვეშ ყველაზე მეტად ხანდაზმული ადამიანები იმყოფებიან - გარდაცვლილთაგან 9 ათასზე მეტი 65 წელს გადაცილებული იყო. სპეციალისტების შეფასებით, ჭარბი სიკვდილიანობის ასეთი მაღალი დონის ახსნა ექსტრემალური სიცხის გარდა სხვა რამით „უკიდურესად რთულია“.სიკვდილიანობის ყველაზე მაღალი მაჩვენებლები საფრანგეთსა და ბელგიაში დაფიქსირდა. ბელგიის საზოგადოებრივი ჯანდაცვის ინსტიტუტის, Sciensano-ს მონაცემებით, ქვეყანაში სიკვდილიანობის მაჩვენებლებმა პიკს მიაღწია 2000 წლიდან მოყოლებული დაკვირვების მთელი ისტორიის განმავლობაში.

1783926924

ნავთობი ისევ გაძვირდა

ახლო აღმოსავლეთში ვითარების ესკალაციის ფონზე, ნავთობის ფასმა ისევ მოიმატა. ღირებულება, საშუალოდ 3%-ით გაძვირდა.Brent-ის მარკის სექტემბრის ფიუჩერსების ფასმა ბარელზე $76.48 შეადგინა, რაც 23 ივნისის შემდეგ ყველაზე მაღალი მაჩვენებელია. აზიის საფონდო ბირჟებზე არაერთგვაროვანი ტენდენცია დაფიქსირდა: ტოკიოსა და სეულში აქციების ფასები მკვეთრად დაეცა, ხოლო ტაიბეისა და ჰონგ-კონგში მატება აღინიშნა.ბაზარზე ბოლო დროის ეს მერყეობა მოჰყვა აშშ-ის მიერ ირანზე განხორციელებულ თავდასხმებსა და ირანულ ნავთობზე სანქციების დროებითი გამონაკლისის გაუქმებას, რაც ჰორმუზის სრუტეში სამ კომერციულ გემზე მომხდარ თავდასხმებს მოჰყვა.